TAP nis punën në terren për blerjen dhe marrjen me qira të tokës

Përfaqësues të Konsorciumit të gazsjellësit Trans-Adriatik, kanë nisur takimet e para me pronarët e tokave nga ku do të kalojë kjo vepër e gjatë prej 870 kilometra në Shqipëri, Greqi dhe Itali. Kontraktorët në Shqipëri, kanë nisur zhvillimin e takimeve në Qarkun e Korçës, për të biseduar me pronarët nga ku do të kalojë kjo gjurmë rreth mundësisë së blerjes apo të marrjes me qira të tokës. Lajmi bëhet i ditur nga zyra qendrore e konsorciumit në vendin tonë. TAP njofton se, janë autorizuar kontraktorët për fillimin e anketimeve dhe mbledhjen e informacionit mbi pronarët e tokabve për të plotësuar të dhënat kadastrale ekzistuese. Procesi i mbledhjes së të dhënave pritet të zgjasë deri në fund të muajit Nëntor. Konsorciumi do të kërkojë akses të përkohshëm në tokë për korridorin e ndërtimit dhe akses të përhershëm atje ku do të vendosen instalimet, si stacionet e valvulave, të bllokimit etj. Në këtë proces, TAP po zbaton standardet ndërkombëtare të Bankës Europiane për Rindërtim dhe Zhvillim dhe në vitin 2014 planifikon nisjen e marrëveshjeve me pronarët e tokave. TAP ka kontraktuar kompaninë holandeze “Royal Haskoning DHV”, që ka mobilizuar 200 topografë në terren. Gazsjellësi TAP pritet të përfundojë rreth vitit 2019 dhe do të transportojë gazin nga fushat e Shah Deniz II në Azerbajxhan drejt Europës, ky gazsjellës është parashikuar që fillimisht të transportojë 10 miliardë metër kub gaz në vit me opsion të dyfishimit të kësaj vlere.