Pakti për Universitetin, PD: Rama gënjen studentët, nuk plotëson kërkesat

Kryetarja e Komisionit Parlamentar të Arsimit, Albana Vokshi e ka cilësuar “Paktin për Universitetin” si një shfaqje të shëmtuar të paaftësisë politike e propagandës së qeverisë Rama.

Ajo argumentoi në një deklaratë për mediat se pakti nuk përmbush kërkesat e studentëve,  është antiligjore, shkel autonominë e institucioneve të arsimit dhe lirinë akademike që sanksionohet në Kushtetutë.

Teksa mbështetej në një grafik të ilustruar në ekran, Vokshi u shpreh se kërkesa e parë e studentëve, për përgjysmim tarifash apo përmirësim kushtesh të konvikteve, sikurse edhe ato 7 të tjerat, nuk do të plotësohen pasi Rama dhe qeveritarët e tij e kanë mendjen të jetojnë në luks.

“Aktualisht Rama ka alokuar për arsimin, duke përfshirë të gjitha nivelet e arsimit, vetëm 313 milionë euro, ndërkohë që kërkesa e studentëve është 702 milionë euro për të arritur në nivelin 5 %. Pra, duket qartë që kemi buxhet të munguar. Pra, kjo është kërkesë e paplotësuar nga Rama për studentët.

Kalojmë tek pjesa e dytë e kërkesës së parë për rritjen e buxhetit 5 %, që është përgjysmimi i tarifave: Aktualisht, Rama ka alokuar në buxhetin e vitit 2019-të, 64.5 milion euro. E ka alokuar këtë buxhet përpara se sa studentët të ngriheshin në protestë, ndërkohë që e pranuar edhe nga ministri Ahmetaj, në mënyrë që të përgjysmohen tarifat apo të jepen bursa studentët nga familje në nevojë, të verbër, para dhe tetraplegjikë, pra një serë kategorish, e gjithë kjo paketë përgjysmimi apo dhëniesh bursash kërkon rreth 2 miliardë lekë të reja, që do të përkthehet ndryshe 16 milion euro“, tha Vokshi.

o.j/dita