‘Jam kundër dhunës, por…’ Çfarë thonë disa nga protestuesit e djeshëm

Arsyet e atyre që iu bashkuan dje protestës së thirrur nga opozita janë të ndryshme dhe të shumta.

BIRN intervistoi disa prej tyre për arsyet pse ndodheshin në protestë.

“U ankuan për keqqeverisjen, papunësinë, mungesën e të ardhmes për fëmijët e tyre si dhe  mosfunksionimin e institucioneve apo lidhjet e politikës me krimin” – shkruan gazetari Edmond Hoxhaj.

Naftëtari i papunë, thotë se udhëtoi nga Patosi të shtunën për t’iu bashkuar protestës së thirrur nga opozita përpara Kryeministrisë.

“Kam punuar 38 vjet në naftë dhe na kanë mashtruar. Na kanë nxjerrë nga puna, na kanë mashtruar për statusin e naftëtarit. Ka dy vjet e gjysmë që është ligji dhe nuk e ka zbatuar, na ka hedhur në rrugë,” tha Dervishi.

Kurse Shaban Koltraka, me origjinë nga Dibra dhe banues në Tiranë, thotë se ndonëse ishte kundër akteve të dhunës, do të qëndronte në protestë deri në largimin e qeverisë së drejtuar nga Edi Rama, të cilën e quajti të korruptuar. Si motiv personal për daljen në protestë, Koltraka përmendi sagën e vet me legalizimet dhe rrezikimin për prishje të shtëpisë së tij.

“Letër nga bashkia…nga drejtoria e rrugëve. Aty tek unë ka mbaruar rruga, por dje më erdhi prapë njoftim nga Shqipëria që duam që ti je vendosur sipër objektit rrugë [Rr. Isuf Balta],”tha protestuesi.

“Kjo është arsyeja. Unë do dal këtu sot, nesër, pasnesër, le të bëjnë çfarë të duan. Unë kërkoj të japë dorëheqjen, të vijë një qeveri kush të dojë, dhe ai po s’bëri punën ta rrëzojmë. PD, PS, LSI, të zhduken, të dalë një forcë e re dhe vetëm të mos ketë më korrupsion. Na ikën fëmijët,” shtoi Koltraka.

Ndërsa Zamira Kazazi, pasardhëse e shtresës së të persekutuarve thotë se varfëria e tejskajshme dhe keqqeverisja po i detyron fëmijët të largohen nga vendi.

“Varfëria e tejskajshme, krimi sheshit. Fëmijët po na ikin jashtë shtetit. Ai [Edi Rama] duhet të largohet sa më parë, sepse fëmijët tanë po marrin rrugët e botës. Ka ardhur momenti që ai duhet të japë dorëheqjen,” tha Kazazi.

Një protestues pas saj është gjithashtu i revoltuar.

“Kanë 30 vite eksperimenti me shqiptarët mo, turpi i Zotit,” tha protestuesi Bardhok Ramaj, i cili e konsideron situatën ekonomike mjaft të vështirë për masën më të gjerë të qytetarëve.

Protesta e 16 shkurtit u thirr nga partitë opozitare, të cilat kërkojnë largimin e kryeministrit Edi Rama, të cilët e akuzojnë për korrupsion dhe manipulim të zgjedhjeve. Në fund të protestës, kryetari i Partisë Demokratike, Lulzim Basha tha se “kryengritja do të vazhdojë deri në largimin e kryeministrit Rama”.

Përgjatë pesë orëve, një pjesë e protestuesve thyen kordonin e policisë dhe sulmuan hyrjen e godinës së Kryeministrisë duke tentuar të hyjnë brenda. Policia iu përgjigj duke hedhur gaz lot sjellës për të shpërndarë turmën. Protestuesit gjithashtu hodhën gurë dhe fishekzjarrë ndaj një markize e instaluar nga skulptori Philipe Parreno, ndërkohë që policia u përgjigj duke hedhur gaz lotsjellës nga taraca e ndërtesës.

Opozita paralajmëroi rikthimin në sheshin e protestës të enjten më 21 shkurt.

b.m. / dita