“Rama e la të hapur mundësinë e zgjedhjeve të parakohshme”

Në një intervistë për gazetën Dita, Kristaq Kume, ish-kryetari i KQZ-së i propozuar nga socialistët, analizon ngërçin e krijuar orët e fundit për djegien e mandateve të deputetëve të opozitës.

Kume thotë se “nuk ka asnjë ngërç ligjor” por “problemet janë politike, më shumë se sa ligjore”.

“Ndoqa intervistën e Ramës dje në të përditshmen italiane Corriere della Sera dhe më bëri përshtypje prononcimi i tij kur tha në fillim se nuk do të japë dorëheqjen, pastaj në fund tha se po të zhvillohen zgjedhjet unë fitoj përsëri. Pra e la të hapur mundësinë e zgjedhjeve të parakohshme. Problemi gjithsesi është i vështirë për modalitetet me të cilat do të hyhet në këto zgjedhje” – thotë Kume.

Më poshtë intervista e tij me gazetarin Xhevdet Shehu:

– Zoti Kume, opozita thotë se ka marrë vendim për djegien e mandateve. Çfarë ndodh nëse e bëjnë realisht?

– Unë e thashë dje gjatë një prononcimi se djegia e mandateve është veprim ekuivalent me dorëheqjen dhe nuk ka asnjë ngërç ligjor. Nëse realizohet, Kuvendi i Shqipërisë krijon vakanca dhe për këtë njofton KQZ.

– Po çfarë ndodh më pas, është parashikuar një situatë e tillë në Kodin Zgjedhor?

– Mënyra si ndodh më pas nuk është parashikuar në Kodin Zgjedhor por për analogji mund të merret rasti i vakancave për një deputet. Nisur nga kjo analogji hap shtegun që të marrin mandatin partitë politike që nuk kanë garuar por kanë herësin më të madh që mund ta përfitojnë një gjë të tillë. Por ky është një akt in ekstremis i opozitës dhe krijon probleme të tjera.

– Çfarë problemesh?

– Problemet janë politike, më shumë se ligjore.

– Mazhoranca i ka numrat për të qeverisur…

Jemi fiks si para zgjedhjeve të përgjithshme të vitit 2017. Opozita nuk donte të hynte në zgjedhje. Edhe atëherë mazhoranca i kishte numrat për të qeverisur. Nga ana ligjore atëherë, si edhe sot, nuk kishte ngërç, pra mazhoranca dhe Parlamenti mund ta vazhdonin punën dhe zgjedhjet mund të zhvilloheshin normalisht edhe pa opozitën. Por nga ana politike për një shoqëri demokratike me parimin e përfaqësimit është e papranueshme që vendi të ngelet pa opozitë.  Pushteti përbëhet nga dy komponentë të rëndësishëm mazhorancë + opozitë, dhe me rënien e opozitës ka rënë dhe pushteti.

– Cilat mund të jenë pasojat?

– Pasojat janë të pashmangshme. Ky veprim shpie drejt një ngërci të madh politik, është një situatë që do të kërkojë reflektim të shumicës për të gjetur zgjidhje se si mund të realizohen zgjedhjet, a do i lihet kohë për kuadrin ligjor apo për kodin, nuk është aspak pozitive, pasi vendi ndodhet në prag të marrjes së ftesës për të hapur negociatat. Shumica mund të vijojë punën pa qenë asnjë deputet i opozitës, pasi ka mbi gjysmën, por nuk mund të miratojë ligje që i takojnë reformave. Përsëris, në çdo rast kjo është e pamjaftueshme. Ne pretendojmë të ndërtojmë një shoqëri demokratike sipas të gjitha standardeve bashkëkohore.

– Atëherë cila është zgjidhja zoti Kume?

Vetëm nëpërmjet një marrëveshjeje politike si në 2017-n mes Ramës dhe Bashës. Sot problemi është edhe më i thekshëm pasi opozita ka bërë fakt të kryer mospjesëmarrjen në pushtet, në këto kushte vendimi dhe zgjidhja e këtij ngërçi politik ngelet në duart e mazhorancës. Mazhoranca  duhet të pranojë zgjedhje të parakohshme. Ndoqa intervistën e Ramës dje në të përditshmen italiane Corriere della Sera dhe më bëri përshtypje prononcimi i tij kur tha në fillim se nuk do të japë dorëheqjen, pastaj në fund tha se po të zhvillohen zgjedhjet unë fitoj përsëri. Pra e la të hapur mundësinë e zgjedhjeve të parakohshme. Problemi gjithsesi është i vështirë për modalitetet me të cilat do të hyhet në këto zgjedhje.

– Ku qëndron vështirësia?

– Opozita i kërkon zgjedhjet e parakohshme, por pa Ramën Kryeministër. Ajo kërkon qeveri teknike. Si do të zgjidhet ky ngërç. Rama nuk ka arsye të japë dorëheqjen edhe po shpalli zgjedhjet e parakohshme. Por opozita këmbëngul për një qeveri transitore, si në 2017-n kur në kabinetin qeveritar u futën gjashtë ministra të saj. Nuk besoj se opozita mund të kënaqet me kaq. Ajo kërkon rrëzimin e Ramës, pra të hyjë në zgjedhje pa Ramën Kryeministër, gjë që më duket në kufijtë e së pamundurës. Këtu qëndron vështirësia.