Një vend me dy parlamente që marrin vendime të kundërta nga njëri-tjetri. Në këtë situatë e ka katandisur kriza e thellë ekonomike Venezuelën. Në njërën nga sallat e parlamentit në Karakas, deputetët mbështetës të presidentit Maduro, i hoqën imunitetin Huan Guaidos, i njohur nga perëndimi si president legjitim i Venezuelës.
“Hapi i radhës i takon gjykatës supreme që të nisë një proces dhe të lëshojë urdhër arrest për Guaidon. Ai akuzohet për abuzim me postin publik, grabitje të parave të popullit dhe tradhti kombëtare”, tha German Escarra, deputet mbështetës i Maduros.
Më herët, Guaido mori pjesë në një seancë me deputetët mbështetës në një tjetër sallë parlamentare, ku komentoi edhe vendimin e deputetëve pro-Maduros.
“Ata nuk kanë të drejta ligjore për të më hequr imunitetin. Nëse u vëmë gjërave emrin e duhur, ky quhet persekutim politik dhe terrorizëm shtetëror”, tha Juan Guaido, president i përkohshëm i Venezuelës.
Deputetët e Guaidos miratuan një ligj që mbron punonjësit publikë nga persekutimi shtetëror. Ligji ishte kundër-reagim ndaj dekretit të Maduros që ndalonte protestat e opozitës, që prej muajsh janë gjithnjë e më të dhunshme. Vendi po përballet me një krizë të thellë ekonomike, e shoqëruar me kolaps të sistemit energjetik, mungesë të theksuar të ujit të pijshëm dhe ushqimeve në dyqane.
o.j/dita
Jepet lajmi i shoqeruar me shifra ! Sa deputete ka parlamenti , nga ishte shumica e tyre dhe si doli shumica aprovuese numerikisht ,atehere eshte lajm….tung