Dhoma e Ulët e Parlamentit të Rusisë e kaloi në leximin e dytë ligjin që do ta shkëpusë internetin rus nga rrjeti global. Ligjvënësit në Dumën shtetërore votuan me 320 vota për dhe 15 kundër.
Sipas kritikëve, ligji është pjesë e përpjekjeve të Qeverisë së presidentit Vladimir Putin për të rritur kontrollin shtetëror në internet dhe për të lehtësuar censurën.
Ligji i ashtuquajtur “Interneti sovran” do të kërkojë që trafiku i të dhënave në mes të qytetarëve dhe organizatave ruse të mbetet brenda Rusisë dhe të mos qarkullojë ndërkombëtarisht. Mbështetësit e ligjit thonë se ai do ta bëjë segmentin rus të internetit, të njohur si Runet , më të pavarur.
Sipas tyre, ligji është i nevojshëm për të mbrojtur Rusinë kundër sulmeve potenciale kibernetike. Legjislacioni do të kërkojë instalimin e pajisjeve të posaçme që do ta bënin më të lehtë bllokimin e ueb-faqeve të ndaluara nga qeveria. Masa pritet të kalojë edhe në leximin e tretë dhe të nënshkruhet nga presidenti Putin.
j.l./ dita