15-vjeçarja kosovare përjashtohet nga shkolla dhe dëbohet nga Franca

Zemëratë dhe protesta ka ngjallur në të gjithë Francën çështja e Leonarda Dibranit: kërkesa e familjes së saj për azil u refuzua, ndërsa agjentët e morën adoleshenten nga autobusi, para shokëve të saj të klasës dhe e dërguan bashkë me prindërit e saj në Kosovë. Reagon elita politike

Quhet Leonarda, është 15 vjeçe dhe deri pak ditë më parë frekuentonte me rezultate të shkëlqyera një lice francez. Vajza me origjinë nga Kosova, u ndalua nga policia ndërsa po zhvillonte një ekskursion me shokët e klasës. U mor me forcë mbrapa autobusit të shkollës, në sytë e mësuesve dhe shokëve të saj duke i tmerruar këta të fundit. Më pas “u ngarkua” në një avion bashkë me familjen dhe u dërgua në Mitrovicë, në vendin e lindjes. Dëbimi ka shkaktuar indinjatë dhe protesta në të gjithë Francën.

Leonarda Dibrani konsiderohej një nxënëse e shkëlqyer, frekuentonte shkollën prej tre vitesh dhe jetonte bashkë me familjen e saj në një strehë pritjeje për personat që kërkojnë azil në Levier, një komunitet i vogël në lindje të vendit, afër kufirit me Zvicrën.

“U respektua ligji”, komentoi ministri i Brendshëm, Manuel Valls, i cili prej disa javësh predikon “vendosmërinë republikane” ndaj emigrantëve pa letra. Valls gjithashtu ka shkaktuar polemika duke pohuar se “romët nuk kanë prirje që të integrohen në Francë”.

Por, në rastin e Dibranit mesa duket është e kundërta: Leonarda dhe vëllezërit e saj shkonin rregulisht në shkollë dhe kishin rezultate shumë të mira. Ishin plotësisht të integruar. Sipas burimeve të ndryshme, familja Dibrani kishte bërë gati edhe dosierin për të marrë dokumente të rregullta. Megjithatë për këtë rast, ministri i Brendshëm jep një version kontradiktor: “Kërkesa për azil e kësaj familjeje ishte refuzuar disa javë më parë dhe prandaj largimi i saj nga Franca ishte i pashmangshëm”.

“Përzënia” e Leonardës ndodhi më 9 tetor, por u bë publike gjatë orëve të fundit nga shoqata “Reseau Education Sans Frontières”, e cila gjithashtu ka denoncuar shumë dëbime të tjera të padrejta gjatë presidencës së Nicolas Sarkozy. Janë ndërruar rolet dhe tani është e majta nën akuzë.

François Hollande tani për tani nuk ka dashur të hyjë në polemika. “Para se të komentohen faktet duhen kontrolluar”, u shpreh zëdhënësja e qeverisë, Najat Vallaud-Belkacem. Qeveria ka nisur një hetim të brendshëm, në veçanti mbi urdhrat e lëshuara nga prefekti ndaj agjentëve lokalë.

“Nuk duhet të ndodhë kurrë më, shkollat duhet të mbeten vende të mbrojtura”, u shpreh ministri i Arsimit, Vincent Peillon. “Ky çështë ligji dhe janë vlerat që e majta duhet të mbrojë gjithnjë”, komentoi Claude Bartolone, presidenti i Asamblesë Kombëtare. Sekretari i përgjithshëm i Partisë Socialiste, Harlem Desir, kërkoi që adoleshentja të mund të kthehej në klasë.

Ndërsa, lideri i ekstremit të majtë, Jean-Luc Melenchon, duke u bazuar mbi këtë rast ka kërkuar dorëheqjen e Valls, i cili sipas tij “nuk është i denjë për Republikën”. Nga Mitrovica Leonarda ka folur me media të ndryshme franceze. “Është një makth”, thotë, “çdo gjë që kërkoj unë është që të kthehem me familjen time në Francë, në shkollën time. E ardhmja ime është atje”./Dorina Gjuzi