Veliaj: Më 30 qershor nuk votojmë për inat, por për dashurinë ndaj Tiranës

Këtë të premte, kryebashkiaku i Tiranës, Erion Veliaj në kërkim të një mandate të dytë vazhdoi fushatën e tij elektoral me banorët e njësisë 8. Në fjalën e tij në takimin me banorët e zonës Veliaj nënvizoi se falë rikonstruksionit të godinave ekzistuese dhe ndërtimit të çerdheve dhe kopshteve të reja, situate në Tiranë në lidhje me këtë çështje ka ndryshuar rrënjësisht .

Veliaj theksoi se tashmë edhe vetë demokratët preferojnë që t’i çojnë fëmijët e tyre në çerdhet dhe kopshtet publike që kanë tashmë standarde më të larta se ato privatet.

“U duhet thënë shokëve demokratë: çerdhja ku po shkon biri yt, a është pak më e mirë sot? Është më e mirë sepse shumë demokratë kanë futur mik për t’i çuar fëmijët në çerdhe publike, edhe pse kanë lekë për t’i çuar në privat. Sepse publiket janë bërë më të mira. Demokratëve të njësisë 8 duhet t’u themi: këto kopshtet që kemi bërë, kopshtet e njësisë tuaj, ku ju çoni fëmijët, sepse Luli i ka jashtë ose në privat, a janë më të mira sot? Janë shumë më të mira dhe ushqimi është më i mirë. Sot kemi 10 aplikime për 1 vend, ndërkohë më parë njerëzit s’i shihnin me sy çerdhet dhe kopshtet publike. Sa prej këtyre demokratëve janë futur mik për të futur fëmijët në çerdhe publike sepse janë bërë më të mira”, tha ai.

Veliaj kujtoi se një nga vendimet e para të bashkisë së Tiranës, pasi ai mori mandatin  ka qenë dhe rikthimi i çekut të bebes, që Basha e pati hequr. Ai tha: “Vetëm fakti kur një bebe vjen në jetë, që merr një çek të bebes, të cilin Edi Rama e vuri 50 mijë lekë, por e 8-fishoi tani për të parin dhe e 16-fishoi për të dytin. Për një demokrat kjo është më mirë apo më keq? Unë them se kjo është shumë më mirë.

Në vijim Veliaj theksoi se njësia 8 ishte edhe njësia ku banonte ish-kryebashkiaku Basha: “Jemi sot, patjetër te zemra e Tiranës, në një vend transformues, por jemi te lagjja e Lulit, i cili s’kishte asfaltuar as rrugicën e lagjes së tij. Nuk kishte mbjellë një pemë te lagjja e vet.”

”Sot vetëm në këtë njësi kemi rritur 320% investimet. Do të thotë që në ditët më të vështira, kur sapo e morëm një bashki të falimentuar bëmë kaq shumë, imagjino sa mund të bëjmë bashkë nëse më 30 qershor, nuk shkojmë në votime për inat të tyre, por për dashurinë për këtë qytet dhe të familjeve tona, në një fitore spektakolare. Sot që jemi në ditë të mira mund të bëjmë akoma më shumë për njësinë 8”, teksa përmendi një sërë investimesh të rëndësishme të mandatit të tij të parë, si Bregu i Lumit, Pazari i Ri, dhe  sheshi “Skënderbej”.

e.ll./dita