Gjejeni kush ndihet “keq dhe i trishtuar” nga publikimet e Bild

Kryetari i Partisë Demokratike Lulzim Basha ka dalë në një komunikim për mediat të hënën në darkë në lidhje me përgjimet e bëra publike nga gazeta gjermane “Bild”, ku ka komentuar, atë që ai quajti, skema e manipulimit qeveritar dhe blerjes së zgjedhjeve.

Basha tha se duhej të ndihej i shpaguar sot por se ndihej keq dhe i trishtuar për gjendjen ku kemi përfunduar si shoqëri, si popull, duke theksuar se ai dhe demokratët nuk do të tërhiqen dhe se ndihen më të sigurt në drejtësinë e kauzës që ndjekin.

“Disa arsye pse pas përgjimeve të BILD ndjehem keq dhe i trishtuar, në vend që të ndjehesha i shpaguar për luftën 6-vjeçare. Si njeriu që për gjashtë vjet rresht është përpjekur çdo ditë t’i bëjë njerëzit të shikojnë atë, që sot është shpalosur hapur para syve dhe veshëve të gjithë botës, do të duhej që sot të ndjehesha mirë dhe i çliruar nga një barrë e madhe.

Sot, kur nuk ka më njeri që nuk është bindur se i vetmi projekt që ka pasur Edi Rama është plaçkitja e Shqipërisë përmes pushtetit në ortakëri dhe aleancë me çdo keqbërës të mundshëm, nga ata të botës së malavitës tek ata të botës së mercenarëve publikë;

Sot, që çdo njeri e ka kuptuar se Edi Rama ka ardhur në pushtet dhe e ka mbajtur pushtetin përmes bashkëpunimit me krimin për të blerë, frikësuar, dhunuar dhe ndëshkuar qytetarët, me qëllim manipulimin e votës.

Pikërisht sot, unë dhe të gjithë demokratët, duhet të ndiheshim të shpaguar për shpërfilljen, përçmimin, sharjet, sulmet, dhe dhunën e padrejtë që është derdhur mbi ne nga të gjitha anët, që nga qeveritarët e korruptuar tek interesaxhinjtë, servilët dhe mercenarët e tyre por edhe nga naivët, edhe të pafajshmit dhe të paanshmit që nuk shikonin dot atë që shikonim ne.

Por unë sot ndjehem keq dhe i trishtuar. Ndihem keq për gjendjen ku kemi përfunduar si shoqëri, si popull”, deklaroi Basha.

Në vijim ai tha se ishte i trishtuar, sepse sot një votë kushton 4 mijë lekë në pazarin e mosbesimit dhe tradhtisë që politika i ka bërë interesave të njerëzve të thjeshtë.

“Ky është dënimi më i rëndë që mund t’i bëhet politikës, sepse një politikë që ka humbur besimin e njerëzve ka humbur çdo gjë. Ky është dënimi më i madh që mund t’i bëhet një shoqërie, sepse kur politika nuk është më mjet në duart e njerëzve do të thotë se në atë shoqëri nuk ka më liri dhe demokraci. Së dyti, jam i trishtuar nga niveli ku ka përfunduar shteti i shqiptarëve:

Sot shteti është një lukuni banditësh qëllimi i vetëm i të cilëve është plaçkitja dhe dhunimi i njerëzve, për t’u mburrur dhe gëzuar pastaj në gostitë e financuara me plaçkën e vjedhur.

Në këtë shtet edhe nëse ka njerëz të ndershëm- ata dhunohen, çnderohen dhe vihen përditë para zgjedhjes fatale, ose të bëhen hajdutë për partinë ose të flaken në rrugë”, u shpreh Basha.

Në përfundim Basha theksoi: “Unë dhe demokratët nuk do të tërhiqemi”. “Sot më shumë se kurrë ne ndjehemi të sigurt në drejtësinë e kauzës sonë dhe rrugës që kemi ndjekur pa kompromis”.

e.ll./dita