Ç’ndodhi mes djalit të Meidanit dhe drejtoreshës Elisa Spiropali

Drejtoresha e Përgjithshme e Doganave, Elisa Spiropali nëpërmjet një letre ka sqaruar dje arsyet e pezullimit të drejtorit të Departamentit të Antikontrabandës në Administratën Doganore, Denion Meidani.

Sipas Spiropalit, Denion Meidani u pezullua për paaftësi dhe për shkelje të “Kodit të Etikës”. Ndër të tjera, në letrën e saj të djeshme Spiropali shkruan: “Ish-shefi i Antikontrabandës në administratën doganore, ai të cilin asnjë gazetë dhe asnjë televizion nuk harron ta cilësojë çun i cilit babi është, nuk mban mend kur, si dhe pse, është pezulluar. Nëpër tym përmend “Kodin e Etikës”.

Ky është një problem i madh. Jo për ish-shefin e Antikontrabandës, se ish-shefi, meqenëse shkelësi është vetë ai, flet si i intereson. Problem është për gjithë të tjerët që zënë kokën me duar kur shohin dhe dëgjojnë cilin paskan pasur shef të Antikontrabandës, emëruar në të ngrysur të qeverisë që na la të gjitha përveç shëndetit.

Kur Etika respektohet, harrohen shkeljet e rralla të saj. Kur Etika nuk respektohet harrohen shkeljet e shpeshta. Ky i dyti është rasti me ish-shefin”.

Në vijim, Spiropali shkruan: “ Pohimet publike të Denion Meidanit, gjoja i pezulluar prej meje për shkak të lidhjeve të mia të errëta ekonomike krijuar me kompaninë në fjalë, janë thjesht broçkulla të neveritshme.

Me këtë rast dua t’i bëj me dije publikut se ish-shefi nuk ka asnjë talent tjetër veç të përdorurit pa vend të mbiemrit të tij të nderuar. Ai është pezulluar nga detyra për paaftësi, mungesë profesionalizmi, dëmtim të imazhit të institucionit. Denion Meidani është krejt i papërshtatshëm për t’i shërbyer shtetit në atë detyrë të lartë e delikate. Me pezullimin, jam plotësisht e bindur se ndaj tij kam marrë masën e duhur. Denion Meidani do kalojë në komision disiplinor ku do gjykohet për performancën e tij etike-profesionale. Lidhur me pretendimet e tij për kompaninë në fjalë, Kurum do paguajë një më një të gjitha detyrimet ndaj shtetit shqiptar. Unë vetë, në shembullin e prindërve të mi, të edukatës me të cilën ata më kanë brumosur, po jetoj dhe do jetoj me atë që siguroj vetëm dhe vetëm nga puna e pareshtur”.

Reagon Meidani: Spiropali, vajzë e nxituar dhe e papjekur

Dy ditë më parë, Denion Meidani, djali i ish-presidentit Rexhep Meidani, gjatë një interviste televizive, rrëfeu ngjarjen që i kushtoi pezullimin nga puna si shef i Antikontrabandës. Shkak për këtë është bërë përplasja me drejtoreshën e Përgjithshme të Doganave, Elisa Spiropali, e cila kishte vetëm pak ditë në detyrë. Meidani tregoi detajet e konfliktit me Spiropalin dhe gjithçka tjetër lidhur me aksionin e Antikotrabandës te “Kurum”, çka i kushtoi atij vendin e punës.

“Pas një informacioni, nga disa burime të brendshme, në datën 8 tetor, për një gjendje fiktive të magazinave doganore të kësaj kompanie, bëra verifikimet po atë ditë, më datë 8 tetor, me drejtorinë përkatëse monitoruese se si rezultonin në sistem këto magazina. Të nesërmen, më datë 9 tetor, njoftova drejtoreshën e Përgjithshme dhe eprorin tim të drejtpërdrejtë dhe organizova dy grupe të Antikontrabandës Tokësore për kryerjen e kontrollit te magazinat doganore në Durrës dhe paralelisht dy grupe të Antikontrabandës Tokësore për kontroll te magazinat doganore në Elbasan. Ndërkohë që çdo gjë ishte në rregull gjatë kontrollit në Durrës, m’u raportua se ishin konstatuar probleme të mëdha në Elbasan. Njoftova drejtoreshën e Përgjithshme dhe drejtorin e Departamentit Operativ Hetimor si eprori direkt i imi, dhe u nisa për në Elbasan me një nga grupet e Durrësit”, thotë Meidani.

Më tej ai tregon se si e priti Spiropali këtë aksion. “Vlen të përmendet se drejtoresha, znj. Spiropali, rreth orës 14:00 priti në takim përfaqësuesit e kompanisë, ndër të cilët ishte dhe personi i autorizuar si mbikëqyrës i magazinës doganore. Ai, në fakt, pas njoftimit të bërë nga ne, pritej që në zbatim të ligjit të paraqitej pranë magazinave të kompanisë, ku po kryhej kontrolli. Më pas, rreth orës 17:00, drejtoresha Spiropali m’u hakërrye në telefon që të bllokoja rrjedhjen e informacionit në media. E nxorët ju informacionin në media, ndaj Spiropali ua kërkoi këtë bllokim? Ndoshta Spiropali, duke mos pasur fare eksperiencë, por dhe idenë se si funksionojnë institucionet shtetërore dhe administrata, nuk e kuptonte që kjo kërkesë realisht nuk hynte te detyrat e mia funksionale si drejtor, por dhe të Antikontrabandës në tërësi. Për sa kohë e kishim ne në dore operacionin, pra nga ora 10:00 e deri në ora 15:00, kur ai përfundoi nga ana jonë me sukses, nuk pati asnjë problem apo rrjedhje informacioni. Do të kishte qenë më e hijshme nga ana saj që në vend këtij hakërrimi të uronte strukturën tonë dhe mua personalisht për punën e kryer dhe suksesin e arritur”. Më tej Meidani tregon se për këtë çështje ka komunikuar edhe me Kryeministrin.  “Po, të premten i jam drejtuar me mesazh Kryeministrit të vendit për këtë sjellje të çuditshme të kreut të Doganave, të emëruar nga ai vetëm pak ditë më parë. Përgjigjja e tij ishte që të komunikoja me ministrin e Financave, për të cilin i komunikova sërish me SMS që nuk gjendej në Shqipëri (sepse kisha tentuar më parë të lidhesha disa herë, por telefoni i tij me dilte i fikur dhe e-maile-ve të mia nuk i ishte përgjigjur). Pas kësaj, ai tregon edhe si ka ndodhur pezullimi. “Të hënën, më datë 14 tetor, u njoha me një shkresë që isha i pezulluar për shkelje të Kodit të Etikës. Ia kërkova me shkrim drejtoreshës që të më njihte me ç’pjesë të Kodit të Etikës kisha shkelur dhe sa e rëndë ishte ajo sa të pezullohesha!”.

Një debat që nuk la shije të mirë

Nga Xhevdet Shehu

Kemi ndjekur me vëmendje ditët e fundit replikat dhe kundërreplikat lidhur me një shkarkim në drejtorinë e doganave. Ndoshta çështja nuk do të kishte bërë dhe aq shumë bujë në rast se nuk do përmendej emri i ish-Presidentit Rexhep Meidani. Në një intervistë televizive denion Meidani tha se ishte shkarkuar pa të drejtë nga drejtorja e re e doganave, Elisa Spiropali. Nuk vonoi dhe një ditë më pas, pra dje, Spiropali boton një letër të hapur. Nuk njoh as njërin dhe as tjetrin, por si qytetar i këtij vendi dhe si gazetar më lejohet të jap një gjykim timin për këtë rast, pasi kam ndjekur me vëmendje debatin mes tyre.

Po e them qysh në fillim: Ky debat publik nuk ka lënë shije të mirë. Letra e zonjës Spiropali është e mbushur me një retorikë jo bindëse. Më shumë merret me moralizim, me mbiemrin e të shkarkuarit, me edukatën familjare, etj, por pak merret me argumentim. t’i biem shkurt, e gjithë kjo replikë ngjan disi si punë kalamajsh. Shteti kërkon më tepër seriozitet.