Ashtu edhe si ishte paralajmëruar, ish-prokurori i posaçëm Robert Mueller filloi të mërkurën dëshminë e tij para Kongresit amerikan. Ai dëshmon lidhur me ndërhyrjen ruse gjatë zgjedhjeve presidenciale në favor të presidentit Donald Trump dhe nëse presidenti, më pas, pengoi drejtësinë, duke u përpjekur të ndalte hetimin e prokurorit.
Në komentet e tij në fillim të seancës, zoti Mueller tha se hetimi arriti në përfundimin se qeveria ruse ndërhyri në zgjedhjet amerikane në mënyrë të gjerë dhe sistematike.
Mueller. Në lidhje me një nga përfundimet më të rëndësishme dhe më të debatueshme të raportit që tashmë mban emrin e tij, deklaroi: “Ne nuk e trajtuam bashkëpunimin me qëllim, që nuk është një term ligjor. Mbështetur tek politikat dhe parimet e Departamentit të Drejtësisë për drejtësinë (e procesit), ne vendosëm që të mos japim një përcaktim, lidhur me faktin nëse presidenti kreu krim”, tha ai.
Zoti Mueller theksoi gjithashtu se dëshmia e tij do të ishte e kufizuar, pasi ajo mund të ndikonte në çështje që nuk janë përfundimtare dhe sepse Departamenti i Drejtësisë kishte përdorur provilegjin që të mos ta lejonte të fliste për disa tema.
Presidenti Trump ka deklaruar se nuk mendonte ta ndiqte seancën pesë orëshe të dëshmisë së Mueller që do të transmetohet drejtpërdrejt në televizionet amerikane, ose ndoshta vetëm pjesë të vogla të saj. Ai këmbëngul se seancat janë një humbje e jashtëzakonshme kohe dhe se është bërë e qartë se ai nuk ka bashkëpunuar në mënyrë të qëllimshme me rusët, dhe nuk ka ndërhyrë me hetimin e zotit Mueller.
Por miliona amerikanë që nuk e kanë lexuar raportin prej 448 faqesh të prokurorit të posaçëm, pritet t’i shohin seancat para komisioneve juridik dhe të zbulimit të Dhomës së Përfaqësuesve, që pritet të jenë të nxehta dhe interesante.
Seancat janë kritike për 235 demokratët e opozitës në Dhomën e Përfaqësuesve, një e treta prej të cilëve kanë bërë thirrje për fillimin e një procesi shkarkimi ose një hetimi për shkarkim për presidentin Trump.
Aleatët e Presidentit Trump në Kongres thonë se zoti Mueller nuk gjeti asgjë inkriminuese për zotin Trump dhe se kjo çështje duhet mbyllur. Por ata e kanë bërë gjithashtu të qartë se kanë ndër mend ta pyesin zotin Mueller për një hetim që ata thonë se është defektoz dhe me fillesa të dyshimta.
Një gjë është e qartë: prokurori me përvojë dhe ish-drejtori i FBI-së, nuk do të thotë asgjë që nuk është pjesë e raportit përfundimtar që i dorëzoi Prokurorit të Përgjithshëm, William Barr.
Në maj, zoti Mueller u tha gazetarëve të mos presin shumë përtej asaj që përmban raporti, me fjalët: “Raporti është dëshmia ime. Nuk do të jepja para Kongresit informacion tjetër përveç asaj që është bërë tashmë publike”.
Nga ana tjetër, zyrtarët e qeverisë ruse vazhdojnë të mohojnë se Moska ka ndërhyrë në zgjedhjet presidenciale të vitit 2016.
Zëvendësministri i Jashtëm rus Sergei Ryabkov u shpreh se “Ne do të ndjekim dëshminë e Mueller,” dhe shtoi: “Nuk ka arsye për të pohuar se Rusia u përpoq ose ndërhyri (në zgjedhjet presidenciale), siç tha kreu i FBI së fundi”.
Burimi: VoA
e.ll./dita