Shkarkimi i Hysen Ketës, shtëpia e babait të tij Myslymit dhe një letër nga SHBA (faksimile)

Drejtuesi i Prokurorisë Përmet,  Hysen Keta është shkarkuar sot nga detyra me vendim të Komisionit të Pavarur të Kualifikimit.

Vendimi u shpall mëngjesin e së enjtes nga trupa gjyqësore e drejtuar nga Xhensila Pine, me relatore Brunilda Bekteshin dhe anëtare Suela Zhegun.

Pavarësisht se ka patur mosdakordësi brenda trupës (anëtarja Zhegu nuk ishte dakord me vendimin) me dy votat e tjera vendimi u mor kundër Ketës.

Problemet që penalizuan subjektin sipas KPK lidhen me një shtesë në shtëpinë e trashëguar nga i ati dhënë më pas me qera si dhe mungesën e dokumentacionit për të ardhurat e përfituara si avokat rreth 30 vjet më parë, në filim vitet ’90.

KPK nuk ka marrë parasysh që godina dhe trualli janë trashëguar nga i ati.

I ati i Hysen Ketës është Myslym Keta

Myslym Keta është një figurë e shquar e historisë së popullit shqiptar, i njohur gjerësisht për veprimtarinë e tij antifashiste gjatë luftes dhe atë ushtarake pas çlirimit.

Për këtë kontribut i është dhënë titulli Hero i Popullit.

Hysen Keta nuk është përfolur kurrë për probleme korrupsioni nga të cilat është prekur në tërësi sistemi i drejtësisë, tashmë nën Vetting.

Një nga pikat që e ka penalizuar (shtesa dhe qeraja e saj) është një marrëdhënie korrekte e dokumentuar mes familjes Keta dhe qeramarrësit, funksionar me detyra të rëndësishme në projektet e Bankës Botërore dhe USAID.

Ai quhet Gerald Edward Meyerman dhe ka punuar për 30 vjet në projekte të këtyre dy institucioneve në shumë vende, mes të cilave edhe në Shqipëri.

Gjatë periudhës së shërbimit në Tiranë ai ka jetuar me qera në shtesën penalizuese të familjes Keta.

Z.Meyerman i ka dërguar një letër organeve të Vettingut, e cila botohet sot nga Dita.

Ai ka drejtuar një program kundër korrupsionit në Shqipëri dhe duket ironike që një funksionar i lartë anti-korrupsion të jetonte në shtëpinë e një të korruptuari.

Meyerman e ve në dukje këtë në letrën e vet, ku shkruan se USAID ka bërë kontrollet e duhura mbi ligjshmërinë e banesës dhe se qeraja është paguar rregullisht në rrugë bankare.

Pagesa për këtë qeradhënie bëhej me bankë nga projekti i USAID.

Meyerman ve në dukje gjithashtu sjelljen dhe mënyrën e jetesës së familjes Keta.

Ai shkruan se si hetues me eksperiencë, ekonomist dhe avokat nuk ka vënë kurrë re në banesën dhe jetën e Hysen Ketës shenja të një personi të korruptuar.

Ai shton se 12 vjet më pas është vështirë të ruash gjithë dokumentacionin, por ofrohet të dëshmojë personalisht në Tiranë nëse i kërkohet.

Më poshtë, faksimile e letrës së tij botuar nga Dita.

Hysen Keta e ka nisur karrierën e tij në vitin 1979 dhe përveç pozicionit si prokuror,  ka punuar për një periudhë edhe si avokat.

Për më shumë se një dekadë, ai e ka ushtruar funksionin në Prokurorinë e Përgjithshme, ndërsa në vitin 2015 u transferua.

Keta u përball me vetingun si kreu i Prokurorisë së Përmetit, pas komandimit në këtë pozicion në vitin 2017.

Gjatë seancës së sotme Keta foli pak në mbrojtje të tij.

Ai tha se ishte dakord me gjetjet e KPK-së dhe se parashtrimet e tij i kishte paraqitur me shkrim.

Komisioni kishte rrëzuar më herët me vendim të ndërmjetëm një kërkesë të tijën për të bërë ekspertizë të pavarur për kostot e ndërtimit; shtesës mbi shtëpinë e ndërtuar në vitet 60’.

Për dokumentacionin që i kërkohet për fillim vitet ’90 ai tha se Tatimet nuk kishin kthyer përgjigje, por shtoi se mbante mend edhe zyrën edhe personin tek i cili kishte derdhur detyrimet.

Ai ka paraqitur dokumentacion alternativ nga Sigurimet Shoqerore, por trupa gjykuese e ka konsideruar të pamjaftueshëm.

Një zyrtar tatimor tha për Dita se për kohën kur bëhet fjalë pagesa per tatimet ishte e detyrueshme një herë në 3 muaj.

Por të dhënat e atyre viteve u asgjësuan pasi kaluan nga Bashkia në drejtori më vete.

Nën zë, punonjësit e vjetër të Tatimeve e quajnë këtë “historia e thasëve të asgjësuar” që eprorët nuk duan ta pranojnë publikisht.

“Kur filloje punë në shtet personi tatimor ishte i detyruar të dorëzonte kartonin identifikues në zyrat tatimore. Për mendimin tim nëse ky dokument nuk gjendet dot sot nga shteti, është e padrejtë të penalizohet pas 30 vitesh qytetari, cilido qoftë ai” – tha i njëjti burim tatimor për Dita.

Ndërkohë një version i plotë në shqip i letrës së z.Meyerman mund të lexohet më vonë në faqen online dhe nesër në Dita print.

a.d. / dita