Vrasja në Shkodër, vrasësi i la krushkut 4 orë afat

I la katër orë kohë për të zgjidhur një konflikt në Amerikë, por e ekzekutoi brenda afatit që i kishte përcaktuar. Ermir Gjergji është penduar dhe vrasjen e vjehrrit të motrës, Zef Ejlli e cilëson në gjaknxehtësi e sipër. Gjykata e Shkodrës vendosi “Burg pa afat” për autorin e krimit në Gur të Zi. Pendesa e autorit të vrasjes nuk ka mjaftuar për të ndryshuar vendimin e gjykatës në seancën e vlerësimit të masës së sigurisë duke e lënë në burg. Prokuroi i çështjes Vat Staka paraqiti përpara togave të zeza prova për motivin e krimit të ndodhur në Gur të Zi.

Sipas përfaqësuesit të organit të akuzës autori 32 vjeçar, Ermir Gjergji dhe viktima Zef Ejlli ishin në konflikt të hershëm, konflikt ky i importuar nga larg. Motra e autorit dhe djali i viktimës, burrë e grua në Amerikë, ndodheshin në një situatë mosmarrëveshjesh. Autori është informuar për këtë dhe ka kërkuar zgjidhje prej babait të djalit. Ai i kishte lënë një afat kohor prej katër orësh për zgjidhjen e konfliktit në Amerikë, por ai e vrau brenda afatit që i kishte përcaktuar. Për prokurorin Staka, vrasja është kryer me paramendim, pasi më herët ishte e planifikuar nga autori 32-vjeçar, i cili kishte shkuar i armatosur në takim.

Ai kërkoi për autorin e krimit “Burg pa Afat”, duke e cilësuar arrestimin si të ligjshëm. Mbrojtja, duke u bazuar në vetdorëzimin e klientit të tij pas vrasjes, kërkoi një masë më të butë. Vetë i pandehuri në rivlerësimin e masës së sigurisë shprehu pendesë për vrasjen e vjehrrit të motrës, duke pohuar se gjithçka ka ndodhur në gjaknxehtësi e sipër dhe se qëllimi i tij nuk ishte ekzekutimi fizik i Zef Ejllit.

Por, pendesa e autorit nuk ka ndikuar në vendimin e trupi gjykues i kryesuar nga Hasan Selimi, i cili pasi ka dëgjuar akuzën e mbrojtjes vendosi masën e sigurisë së kërkuar nga prokurori “Burg pa afat”. Ngjarja e rëndë ku një person u vra me armë zjarri, ndodhi mbrëmjen e së mërkurës. Pak para se të vritej viktima po luante domino dhe dëshmitarë në vendngjarje treguan se mes autorit e viktimës kishte një debat të fortë verbal, e cila u pasua me ekzekutimin e njërit prej tyre dhe pikërisht Zef Ejllit. Dëshmitarët ndër të tjera treguan se viktima u qëllua në momentin që u ngrit nga loja dhe po shkonte drejt shtëpisë. Pikërisht në atë moment Ejlli u qëllua nga një breshëri automatiku e qitur nga arma e Ermir Gjergjit, duke e lënë të vdekur në vend.

Dëshmia në polici

“Motra ime, Albina Gjergji është martuar me Arben Ejllin, i cili është djali i Zefit. Të dy bashkë jetojnë në Shtetet e Bashkuara të Amerikës dhe marrëdhëniet midis tyre janë të acaruara. Për këtë arsye, motra ime e ka denoncuar disa herë bashkëshortin e saj, si në Shqipëri, ashtu edhe në Amerikë, por ata nuk kanë gjetur gjuhën e përbashkët. Në këto kushte kam kërkuar ndërhyrjen e babait të dhëndrit, por ai më fyeu dhe unë e vrava”, kështu dëshmoi para oficerit të policisë gjyqësore Ermir Gjergji.