Pas testit me shkrim, debat publik për 13 drejtorët e rinj të DAR

Qindra arsimtarë janë në garë për postin e titullarit të Drejtorive Arsimore. Por, për të fituar këtë post ata duhet t’i nënshtrohen një testimi me shkrim, i cili do të jetë i pari i këtij lloj dhe do të ndalet në vlerësimin e aftësive profesionale të aplikuesve.

Zëvendësministri i Arsimit Arbjan Mazniku ka detajuar gjatë ditës së djeshme rrjedhën që do të ndjekë konkursi për drejtuesit e rinj të arsimit, për të 13 rrethet në vend. Sipas Maznikut, po përzgjidhen edhe ekspertët që do të vlerësojnë testet e aplikuesve. Pas testimit me shkrim kandidatët do t’i nënshtrohen fazës tjetër, e cila ka të bëjë me konkursin publik, nëpërmjet të cilit duhet të kalojnë edhe përballjen me mësuesit, prindërit dhe nxënësit e shkollave që mbulojnë. Masa këto që synojnë rikthimin e institucioneve arsimore në duart e profesionistëve, duke shmangur kështu përzgjedhjet apo favorizimet me prapavijë politike.

Juria do të jetë e përbërë nga pesë veta, 3 përfaqësues të  Ministrisë së Arsimit dhe Sportit, si dhe dy ekspertë të jashtëm.”Aplikantët do të marrin pjesë në një testim me shkrim. Aplikantët me rezultatet më të larta do të vazhdojnë më tej konkurrimin në një finale publike përballë mësuesish prindërish dhe intelektualësh të qarqeve respektive, si dhe një jurie prestigjioze. Do të ketë një grup ekspertësh nga ministritë që do të bëjnë edhe testimin. Kemi marrë një numër jashtëzakonisht të lartë kërkesash për këtë pozicion nga e gjithë Shqipëria. Deri në mesditën e djeshme, numri i aplikimeve i ka kaluar të 100-at dhe po vazhdojnë aplikimet”, ka deklaruar zëvendësministri i Arsimit Arbjan Mazniku.

Fluksi i aplikimeve të bëra për të fituar këto poste rezulton të jetë shumë i lartë. Lufta më e ashpër bëhet për kryeqytetin dhe qytetet e mëdha si Durrësi, Fieri, Shkodra e Berati. “Numri më i madh i kërkesave i referohet pozicionit për drejtorin e Drejtorisë Arsimore Rajonale Tiranë, deri mbi 30 aplikime deri tani. Ndiqet nga Drejtoria Arsimore Rajonale në Durrës, Fier, Berat, e kështu me radhë. Ministria e Arsimit shpreh vendosmërinë për të përzgjedhur kandidatët në mënyrën më rigoroze dhe transparente të bazuar në ligj. Këto do të jenë kushtet e vetme për përzgjedhjen e drejtuesve të Drejtorive Arsimore Rajonale. Në këtë frymë i bëjmë thirrje të gjithë atyre të cilët kanë kontribuar me devotshmëri dhe integritet në arsimin shqiptar, atyre që mendojnë se vlerat dhe eksperienca e tyre në fushën e edukimit do të mund ti vënë në shërbim të cilësisë së arsimit tonë kombëtar, të aplikojnë për këto pozicione”, ka shtuar më tej Mazniku.

Gara për drejtuesit e arsimit nuk do të ndalet me kaq. Pas drejtorive arsimore, radhën do ta kenë shkollat e arsimit parauniversitar. Në këto kushte edhe drejtorët në shkolla do të përzgjidhen në bazë të konkurseve të hapura. Në vijim pritet që autoritetet e arsimit të detajojnë në mënyrë të specifikuar të gjithë procedurën që do të ndiqet për drejtuesit e shkollave.

Hapat që ndiqen deri në shpalljen e fituesve

 Janë 13 Drejtori Rajonale të Arsimit në të gjithë vendin, për të cilat është hapur tashmë një proces konkurrimi për zgjedhjen e drejtuesve të rinj.

• Numri më i madh i kërkesave i referohet pozicionit të kreut të drejtorisë Arsimore në Tiranë, me mbi 30 kandidatë, e më pas vijnë Durrësi, Fieri, Berati e Shkodra.
• Pas verifikimit paraprak, më datë 05 Nëntor 2013 në selinë e Ministrisë së Arsimit dhe Sportit do të shpallet lista e konkurrentëve, të cilët kanë plotësuar kërkesat e paraqitura në rubrikën “Kërkesat e veçanta të kandidatit”
• Më pas aplikantët do të marrin pjesë në një testim me shkrim.  Aplikantët me rezultatet më të larta do të vazhdojnë më tej konkurrimin në një finale publike përballë mësuesish, prindërish, intelektualë të qarqeve respektive, si dhe një jurie prestigjioze.

Kërkesat e veçanta që u janë kërkuar aplikuesve

• Të ketë mbaruar arsimin e lartë në ciklin e dytë për master shkencor në mësuesi
• Të ketë së paku 5 vjet përvojë profesionale dhe menaxhuese, parapëlqehet përvoja
• në nivele të larta të administrimit arsimor dhe në fusha që ndërlidhen me punën e DAR-së.
• Të ketë kompetenca në përcaktimin dhe arritjen e objektivave strategjikë dhe operacionalë të institucionit.
• Të ketë aftësi shumë të mira organizative dhe drejtuese.
• Të ketë aftësi shumë të mira të komunikimit dhe të negocimit.
• Të ketë aftësi të mira të përdorimit të programeve kompjuterike
• Njohja e gjuhëve të huaja përbën avantazh për kandidatin.
• ·