Paloka: Komision Hetimor për votat e Korçës

Grupi Parlamentar i Partisë Demokratike gjatë mbledhjes së sotme ka vendosur ngritjen e një komisioni hetimor parlamentar për votat në Bashkinë e Korçës.

Nismën e grupit të PD, e bëri publike, kreu i grupit parlamentar, Edi Paloka, që pas mbledhjes, në një prononcim për mediat, u shpreh se: “Në mbledhjen që sapo zhvilluam si grup parlamentar, ne diskutuam më shumë se 2 orë, lidhur me fenomenin e rëndë i cili u faktua, pra e theksoj që vetëm u faktua me zë e figurë dje në një emisionin “Fiks Fare”, pasi dihej që ishte një fenomen i njohur për të gjithë ne dhe i denoncuar nga ne. Prandaj, si hap të parë kemi vendosur ngritjen e një komisioni hetimor në Parlament dhe sigurisht ky do të jetë vetëm hapi i parë pasi një ngjarje kaq të rëndë ne nuk mund ta lëmë as në heshtje dhe as në harresë. Bëhet fjalë për vetë themelet e demokracisë, për vetë themelet e pluralizmit në Shqipëri”.

Deputeti, Paloka theksoi se: “E kemi denoncuar këtë fenomen që nga 23 Qershori, e kemi denoncuar blerjen e votave në të gjithë Shqipërinë, nga dy aleatët që sot drejtojnë dhe kanë pushtetin në dorë, Rama dhe Meta”.

Një ditë pas denoncimit ne“Fiks Fare”, se PS ka blerë votat për zgjedhjen e Sotiraq Filos në krye të Bashkisë së Korçës , Partia Demokratike përveçse ka dënuar aktin e blerjes së votës, ka kërkuar gjithashtu përsëritjen e zgjedhjeve, si edhe hetimin e plotë nga ana e Prokurorisë.