Për Kapo Lenën, komandantin e batalionit Vërçë-Sulovë dhe ata që duan heqjen e bustit të tij

Qëndrim nga Shoqata Atdhetare Kulturore “Gramshi”

Ndërkohë që në kuadër të 75-vjetorit të çlirimit të Atdheut nga pushtuesit nazifashistë dhe përfundimit të Luftë së Dytë Botërore në Shqipëri, flitet dhe merren masa për kremtimin e kësaj ngjarjeje të shënuar, këto ditët e fundit ka pasur një thirrje nga një qytetar i Gramshit, për heqjen nga lulishtja e qytetit të bustit të luftëtarit antifashist dhe komandantit të batalionit Vërçë-Sulovë, Kapo Lenës, qytetar nderi i qytetit Gramsh, pas vdekjes.

Shoqata Kulturore Atdhetare “Gramshi” e cila ka në misionin e saj edhe ruajtjen e vlerave dhe traditave më të mira që përcjell Lufta Antifashiste Nacionalçlirimtare, jo vetëm që distancohet nga kjo thirrje e veçuar, por po ashtu e shikon me vend të mbajë një qëndrim ndaj saj, duke përmbledhur në pak rreshta për lexuesin, kontributin e komandant Kapos gjatë Luftës Antifashiste Nacionalçlirimtare.

***

LANҪ e rreshtoi Shqipërinë përkrah koalicionit Anglo-Sovjeto-Amerikan, në krahun e duhur të historisë. Kjo është padyshim një meritë e luftës dhe e atyre që e udhëhoqën luftën. Një arritje që i bën edhe sot ndere vendit. Për herë të parë bota i pa shqiptarët ndryshe nga ç’i mendonte; një komb i qytetëruar e i organizuar, një komb që çmonte lirinë e pavarësinë e atdheut, që ishte i gatshëm e i vendosur që me çdo çmim e me çdo sakrificë t’ia kthente ato vendit.

Në themelet e institucioneve mё tё larta tё Europёs sё sotme, ёshtё pra edhe gjaku i martirëve shqiptarë. Është ky gjaku i shenjtë i dëshmorëve dhe heronjve, me të cilën u shkrua historia e Luftës Antifashiste Nacionalçlirimtare dhe s’ka forcë që ta deformojë apo ta njollosë atë.

Ashtu si edhe prof. Aleks Buda shprehej, më 29 nëntor 1944 mori fund historia e pushtimeve të Shqipërisë, e pazarllëqeve në kurriz të saj, që kishin çuar në rrudhje të kufijve etnikë, në shkëputje e aneksime të territoreve shqiptare nga shtetet fqinje. Të mbrosh të vërtetat historike është jo thjeshtë çështje morale, por atdhetare, sepse vetëm kështu lidhen kohët, bashkohen brezat, harmanizohen ndjenjat dhe forcohen idealet!

Sa i përket bustit të komandant Kapos, ai është vendosur në përputhje të plotë me ligjet e shtetit, me vendim të këshillit bashkiak të Gramshit. Meritë e familjarëve është investimi për lulishten ku u vendos busti. Dhe për këtë gjë familjarët e tij meritojnë lavdërime, e në veçanti Skënderi, i cili i fali qytetit një ambient të rehatshëm e të këndshëm, ku pushojnë qytetarët e Gramshit.

Këshilli bashkiak i Gramshit duhet të  përgëzohet për përjetësimin e veprës së këtij burri të thjeshtë, i cili as e kishte idenë në atë kohë se çfarë ishte komunizmi, por mori pushkën e luftoi për çlirimin e atdheut nga nazifashistët. Ai bëri detyrën e tij si patriot e si shqiptar i ndershëm, ashtu si shume bij e bija të këtij populli, që luftuan e derdhën gjakun për lirinë e këtij vendi.

Kush ishte Kapo Lena?

Kapo Lena lindi në vitin 1893 në fshatin Rashtan të rrethit Gramsh, nё një familje të varfër fshatare, por të pasur me traditat dhe vlerat më të mira atdhetare, patriotike, luftarake e liridashëse, që kishin në themel të tyre besën, mikpritjen, bujarinë, trimërinë dhe humanizmin. Prindërit e tij kanë marrë pjesë në  kryengritjet e vitit 1912  dhe  kanë luftuar e ndihmuar  për pavarësinë e Shqipërisë. Në këtë djep patriotik u lind, u përkund e u rrit trimi  Kapo Lena.

Viti 1924 e gjeti Kapon në krahun e forcave mbështetëse të Fan Nolit. Më 6 prill 1939, kur mori vesh rrezikun e sulmit fashist, ngriti bashkëfshataret e tij të fshatit Rashtan dhe i kërkuan Nënprefekturës armë. Po përgjigjja që mori ishte: “Të ruajnë qetësinë dhe patriotizmin”.

Kapo Lena e ndjente shpirtërisht  se atdheu  i pushtuar nga  Italia fashiste duhej çliruar, ndaj u lidh  që në fillim me  Lëvizjen Nacionalçlirimtare. Ai zbërtheu parmendën e qetë e punës nga teliga e zgjedha dhe rrëmbeu dyfekun e torbën me fishekë dhe bashkë me luftëtarë të tjerë të fshatrave përreth të Vërçës, më 31 janar dhe 2 shkurt, u shkoi në ndihmë e u bashkua me çetat  partizane të Mokrës, Gorë-Oparit e Skraparit, dhe goditën postën e Snosmit. Ku u zhvilluan luftime shumë  të ashpra dhe pas 8 orësh luftime pa ndërprerje, në Snosëm e Kodovjat, forcat fashiste u shpartalluan përfundimisht.

Me formimin e batalionit partizan Vërçë-Sulovë, Kapo Lena, inkuadrohet në këtë formacion. Ndërsa më vonë, në fillim të  prillit 1944, caktohet Komandant  i Komandës së Vendit  në komunën e Kukurit me qendër  në Kishë.

Pas Operacionit të Qershorit të vitit 1944, me organizimin e Batalionit Vërçë-Sulovë më 29 qershor  të atij viti, ai u emërua komandant  i këtij batalioni, detyrë që e kreu  me devotshmëri  deri në çlirimin e plotë të  Shqipërisë.

Pas përfundimit të luftës dhe çlirimit  të Shqipërisë ai u kthye përsëri në fshatin e tij të lindjes. La dyfekun  dhe mori prapë parmendën. Përveç lirisë dhe daljes një herë në vit në tribunën e festës që organizohej në 18 Gusht për nder të krijimit të Batalionit Vërçë-Sulovë, ai u trajtua si gjithë të tjerët.

Ishte rastësi që  Kapo Lena shpëtoi e  nuk u vra gjatë luftës, siç u vranë vartësit e tij si Shefqet Guzi apo Afëz  Berbiu e partizane të tjerë të batalionit. Ndryshe ai sot mund të kishte varrin në varrezat e dëshmorëve të Atdheut. Ne duhet të përulemi përpara atij busti të vogël, të komandanti trim  dhe njeriu të thjeshtë por  me zemër të madhe.

Duhet të ruajmë kujtime të pashlyeshme pёr ata njerëz të thjeshtë dhe ato figura të paharruara, të ajkës të plejadës të shkëlqyer të  atyre luftëtarëve që luftuan e drejtuan me profesionalizëm e përkushtim Luftën.

Kapo Lena, ishte  një burrë  i zgjuar, trim e bujar, cilësi këto që e bënin të ishte  njëri ndër nga më të përmendurit burra të zonës, që meritojnë  respekt e mirënjohje  për punën e besnikërinë në gjithë fushat e jetës.

Nderim e respekt pёr  këtë luftëtar të LANҪ-it. Njerëzit që e mbyllin jetën me nder meritojnë  të kujtohen e nderohen për kontributet që kanë dhënë në tërë veprimtarin tyre, për t’ua transmetuar ato  brezave që do të vijnë.

Me respekt,

Shoqata Atdhetare Kulturore “Gramshi”