Një histori e pabesueshme pedofilie që ka vënë në siklet gjithë Francën

Shkrimtari 83-vjeçar francez, Gabriel Matzneff ka pranuar se gjatë gjithë jetës së tij ka patur marrëdhënie seksuale me adoleshentë midis moshave 8 dhe 16 vjeç në Paris dhe shpesh udhëtonte për turizëm seksi në Tajlandë.

Ai e kishte zakon që t’i përshkruante me detaje eksperiencat e tij seksuale dhe t’i cilësonte si vepra letrare.

Një nga viktimat e tij, Vanessa Springora, drejtoreshë e botimeve Juilliard ka denoncuar marrëdhënien që ai kishte me të në moshën 14 vjeçare (kur ai ishte 50 vjeç) në një libër të titulluar “Pëlqimi”.

Pas rasteve #MeToo, Weinstein dhe Epstein, skandali ka rishpërthyer.

Në qendër të polemikave janë pedofilia e pretenduar e Gabriel Matzneff, por mbi të gjitha dekadat e pandëshkueshmërisë për të.

Matzneff është një fytyrë e njohur mes shtëpive botuese të Saint-Germain -des-Prés dhe bronzit Lipp, por jo vetëm.

Deri në vitet ’90, Matzneff bëri disa dalje publike në TV, ku fliste me modesti rreth eksperiencave të tij në një Francë ku abuzimi seksual me një të mitur 15 vjeç edhe në rast pëlqimi reciprok dënohet deri në 7 vite burgim.

Matzneff nuk është hetuar kurrë për veprimet që ka rrëfyer në shumë faqe intervistash.

Vëmendjen më të madhe e kanë marrë fragmentet e tij letrare me nota të theksuara pedofilie.

Ka shkruar pasazhe si “shkrihesh në gojën time si një sorbetto (…), vogëlushja ime e dashur. Nesër në orën e gjimnastikës, kur të tjerët do vrapojnë rreth kopshtit të Luksemburgut, unë do jem duke të të mësuar ledhatime të reja”

Për dikë mund të jetë art, por në to mbi të gjitha ishte jeta reale, e tij dhe ajo e fëmijëve të përfshirë.

“Si është e mundur që Matzneff mori medaljen e “Officier des Arts et des Lettres” nga Ministri i Kulturës Zhak Toubon në 1995?”, shprehen kritikët.

Në 2013, Matzneff mori edhe çmimin prestigjoz Renaudot për esenë “Séraphin, c’est la fin!”, një koleksion tekstesh, ku përfshihen tregime me vajza dhe djem, të shkruara midis 1964 dhe 2012.

“Më në fund, kjo është zgjidhja – shkruan shkrimtarja Springora – për ta futur gjahtarin në grackën e tij, për ta mbyllur në një libër”.

Më në fund pas botimit të Springora, Prokuroria ka njoftuar ndjekjen penale ndaj tij.

******

Marrë nga Corriere. Përkthimi në shqip, Johana Lubonja, Dita.