Përse më është kujtuar Xhavit Hoxha?

Nga Bedri Islami

Nga ajo që po ndodh në Kosovë.

Presidenti i saj thërret tri herë në takim fituesin e zgjedhjeve të 6 tetorit. Në tri herët merr tri përgjigje mohuese, “nuk jam në Prishtinë”, “kam punë të tjera”, “do të vij një herë tjetër”.

Duket si një lojë fëmijësh, por nuk është kaq e thjeshtë.

Edhe presidenti dhe shefi i ardhshëm i qeverisë, kanë kabinetet e tyre, njerëz të ditur dhe servilë të hatashëm, protokollarë dhe sekretarë dhe gjithçka mund të zgjidhej përmes tyre. Ndërlidhjet institucionale nuk bëhen përmes rrjeteve sociale.

Pak më pas, shefi i ardhshëm i qeverisë i çon haber presidentit, do të vij mw 6 janar.

Presidenti publikon orën dhe shton diçka nga vetja. Tek ajo shtesa nga vetja është inati i fshehur.

Takohen, shkurt, nuk kanë kohë as për një kafe, askush nuk e di përse u takuan, mandatari i ardhshëm deklaron se është një takim rutinë, presidenti, përsëri përmes rrjeteve sociale, i përgjigjet se ke afat 48 orë, për të sjellë emrin e mandatarit. Në cilin ligj e gjen presidenti këtë afat kohor, askush nuk e di; as këshilltarët e tij që i rrinë rrotull.

Shkojnë 48 orë. Askush nuk ka pritur që në 48 orë të ketë një emër mandatari. As vetë presidenti nuk e ka pritur. As shefi i ardhshëm i qeverisë nuk ka menduar se do ia dërgojë.

Në fund, pas 48 orëve, vjen haberi tjetër: do ta sjellim në ditët e ardhshme, nuk ka datë fikse, do ta sjellim përmes postës, dhe do të presim mandatimin po përmes postës. Sikur të jetë fjala për një emërim bakalli e jo për njeriun në postin më të rëndësishëm të Kosovës: zemërimi mes tyre vazhdon.

Kosova ka 6 muaj që e di se cili do të jetë shefi i ardhshëm i qeverisë: VV nuk e di ende? E di, pak ditë më parë Kurti ka thënë se qeveria e tij varet nga LDK-ja e jo nga presidenti. LDK e Mustafës ka hesapet e saj.

Lojë force apo dëshirë mos qeverisje?

Kosova nuk është as e Hashim Thaçit e as e Albin Kurtit! Aq më pak e Isa Mustafës! Ata, të dy, në daç të flasin me njëri tjetrin, e, po të duan të mos flasin kurrë , por Kosova nuk mund të mbahet peng.

Presidenti dhe shefi i ardhshëm i qeverisë nuk do të takohen më. Mandatimi do të bëhet përmes postës.

Tani pritet përgjigja e shefit të presidencës. E çfarë rëndësie ka?

Dhe më është kujtuar Xhavit Hoxha.

Xhavit Hoxha ishte një ndër figurat më fisnike që kam njohur në të gjithë jetën time. I mënçur si pak kush, fjalë urtë dhe njeri i ndershëm, atdhetar dhe i vendosur, profesor i shquar, i burgosur politik, mik i madh dhe mikëpritës si pak kush; askush nuk u nda prej tij pa mësuar diçka të mirë dhe të dashur. Kur i vëllai, Heroi i Kosovës, Edmond Hoxha, lideri i studentëve, u vra në 31 janar 1997, nuk i pikoi loti, por i buroi fjala e mirë.

Një herë, pas luftës, në një qëndrim në shtëpinë e tij, duke parë se çka ndodhte në Kosovë, na pat thënë:

-More, këto nuk janë të zot me drejtues as terminalin e autobusëve në Prishtinë, e jo një qeveri!!!

I pata kundërshtuar, e sot, ndërsa më kujtohet kjo thënie, e di mirë se unë isha i gabuari.

Eh, Xhavit Hoxha, mik i madh, shkove para kohe , bashkë me Jashar Salihun, dy burra të mëdhenj e të urtë!