Letra drejtuar Ramës: Universiteti i Mjekësisë duhet mbyllur

Rikthehen sërish në vëmendje debatet për ekzistencën e Universitetit të Mjekësisë. Nëpërmjet një letre të hapur dhjetëra mjekë të rinj shqiptarë që punojnë e studiojnë jashtë vendit kërkojnë nga strukturat Qeveritare që të marrin vendimin për mbylljen e këtij universiteti, hapja në mënyrë abuzive e të cilit vetëm sapo e dëmton procesin e zhvillimit të profesionistëve të rinj, që do jenë mjekët e së nesërmes. Në letrën dërguar kryeministrit Edi Rama, ministrit të Shëndetësisë Ilir Beqaj, asaj të arsimit Lindita Nikolla, rektorit të UT-së Dhori Kule, si dhe rektores së Universitetit të Mjekësisë Jera Kruja, profesionistët e rinj argumentojnë se hapja e këtij universiteti “fantazmë”, po shfaq probleme të shumta në formimin e mjekëve të rinj.

Nëpërmjet kësaj letër të hapur, mjekët e rinj u bëjnë thirrje për zhbërjen e Universitetit të Mjekësisë, dhe riintegrimin e Fakultetit të Mjekësisë nën siglën e Universitetit të Tiranës. Kërkesë të cilën e argumentojë me mangësitë që ka ky universitet në përgatitjen jo vetëm të mjekëve të formuar nga ana akademike, por edhe të ekselencës, pasi nuk ka kapacitetet e duhura. Sipas tyre, vetëm riintegrimi tek Universiteti i Tiranës, si i vetmi institucion i arsimit të lartë në vendin tonë që mund të përgatisë specialistë të zotë dhe të formuar, mund të jetë zgjidhja e kësaj dileme e cila prej gati një viti ka shfaqur probleme të shumta sa i takon zhvillimit të shkencave mjekësore. Rreth një muaj më parë, probleme dhe polemika të shumta u ngritën mbi hapjen abuzive të këtij universiteti, i cili sipas dekanit Bajram Hysa solli vetëm zhdukjen e fondeve të mbledhura nga të ardhurat dytësore.

Zhdukja e të cilave u argumentua si një ngërç i madh që po çon drejt falimentimit fakultetin, pasi në mungesë të fondeve jo vetëm nuk mund të bëhen investime në zhvillim të cilësisë apo bazës didaktike, teksa vonesa janë shfaqur edhe në shlyerjen e pagave të personelit akademik që punon pranë këtij fakulteti. Rrjeti i profesionistëve/studentëve të shkencave bio‐mjekësore që punojnë e studiojnë jashtë Shqipërisë i bën thirrje personaliteteve të sipërpërmendur të rishikojnë vendimin në lidhje me ekzistencën e Universitetit Mjekësor,Tiranë. “Atributi kryesor që duhet të ketë një institucion akademik që edukon mjekë të rinj është aftësia për të prodhuar profesionistë ekselentë, të mirë përgatitur në aspektin klinik dhe shkencor për t’i shërbyer me përgjegjësi morale e sociale komunitetit ku jetojnë. Në konceptin tonë, universiteti duhet të ofrojë një gamë të gjerë diturish dhe një ndër-fertilizim të disiplinave të lidhura ose jo drejtpërdrejtë me mjekësinë. Elementi kryesor i përparimit akademik për të prodhuar risi e shkencë, është jo vetëm ekspertiza e aftësive profesionale, por debati konstruktiv ndër studentë e  profesorë të fushave të ndryshme. Tendenca e shumë universiteteve të Evropës Perëndimore, por edhe në botë, është të bashkojnë strukturat akademike universitare mjekësore në institucione më të mëdha multi‐disiplinore mendimi akademik”, argumentojnë profesionistët e rinj.

Arsyet pse Universiteti i Mjekësisë duhet të ketë statusin e fakultetit   

 Të ndash Fakultetin e Mjekësisë nga një prej institucioneve më të mira akademike që ka sot Shqipëria,Universiteti i Tiranës, ka në potencialin e saj pasoja të rënda të dëmtimit të reputacionit të edukimit mjekësor në Shqipëri. Historia dhe përvoja akademike përbëjnë vlerë të shtuar në identitetin e çdo institucioni akademik. Në disa prej eksperiencave tona gjatë aplikimeve për studime të ciklit të tretë (doktoraturës), universitet evropiane kanë refuzuar njohjen e diplomave si rrjedhojë e ambiguitetit në universitetin që e ka lëshuar. Studentët e Fakultetit të Mjekësisë kanë të drejtën të dinë që diploma dhe titulli qe ata marrin në përfundim të studimeve respektohet dhe pranohet nga çdo institucion akademik në botë.

Gjithashtu mund të konkludojnë që mirëfunksionimi i një institucioni të tillë akademik si Universiteti Mjekësor, i përbërë tashmë nga pesë fakultete, ka kosto disa herë më të lartë se Fakulteti i Mjekësisë. Nga ana tjetër, shumë degë të quajtura fakultete në Universitetin Mjekësor, nuk arrijnë të plotësojnë kriteret për një status të tillë. Pra, jo vetëm nuk është kosto-‐efektiv, por ka mangësira në përmbushjen e standardeve akademike.

Shumë prej nesh, si ish-studentë të tij, dekurajojmë fortësisht, që një institucion akademik i një rëndësie të madhe sociale dhe me prurjen e studentëve më të mirë në të gjithë Shqipërinë, të bjerë pre e axhendave politike jo vetëm në gjenezën e një Universiteti fantazmë, por edhe në konfliktet mediatike të kohëve të fundit në Këshillin e Profesorëve. Shqetësimi ynë rri vazhdimisht konstant në reformën e edukimit mjekësor, si hallka kryesore e suksesit së reformës në shëndetësi.