Holanda kushte shtesë Shqipërisë për çeljen e negociatave?

Dy ditë më parë, kryeministri Edi Rama deklaroi se nuk do të veshë më  “kostumin e dasmës” për hapjen e negociatave.

Edhe pse kësaj radhe, të gjitha gjasat janë që vendi ynë të marrë më në fund “dritën jeshile” për nisjen e bisedimeve të anëtarësimit, “kostumit të dasmës” së Ramës mund t’i shtohen edhe dy “arna” të reja.

Kërkesat e fundit ishin ato të Parlamentit të Gjermanisë, e cila vendosi nëntë kushte për hapjen e negociatave. Por një tjetër parlament, ai holandez mund të ketë tani disa kushte të mëtejshme për hapjen e negociatave me Shqipërinë.

Në fund të marsit, kur të gjithë liderët e BE-së të mblidhen për të marrë vendimin e shtyrë prej më shumë se dy vitësh, Holanda ka shumë të ngjarë të shtojë dy kushte të tjera në tryezën e negociatave.

Kjo u sinjalizua një ditë më parë nga Hans Joachim Falenski, Këshilltari i grupit parlamentar CDU/CSU për çështje të politikës së jashtme dhe një nga njohësit e gjendjes politike në Shqipëri.

Duke folur në një panel diskutimi në ambientet e Parlamentit Gjerman Falenski do të ishte i pari që do të njoftonte se Shqipërisë mund t’i shtohen edhe kushte të tjera, përveç nëntë kushteve të caktuara nga Bundestagu.

Në tetor, Holanda ishte e gatshme për ndarjen e dosjeve të Shqipërisë nga Maqedonia e Veriut, duke dhënë dritën jeshile për këtë të fundit, por jo për vendin tonë. Ndarja e Tiranës dhe Shkupit u kundërshtua nga Franca që vendosi veton për negociatat.

Franca duket se ka zbutur qëndrimin e saj, duke thënë se do të japë miratimin nëse Komisioni Europin rekomandon hapjen e negociatave,

Në qershor të vitit ta kaluar, kryeministri holandez u shpreh i gatshëm të hiqte veton ndaj Shqipërisë, nëse vendi ynë merrte “bekimin” e Francës, por mesa duket ka ndryshuar mendje.

Një nga kushtet e Holandës për hapjen e negociatave është bërë i qartë dy muaj më parë nga Ministri i Jashtëm holandez, Stef Blok në një intervistë për mediat kroate.

Duke folur më 9 janar, Blok ka deklaruar se përpara se të hapen negociatat, Shqipëria duhet të tregojë një angazhim të qëndrueshëm në luftën kundër korrupsionit.

Por edhe krimit të organizuar dhe lidhjeve të klasës politike me të.

Blok deklaroi se Shqipëria nuk po arrin rezultate të prekshme në këto, pavarësisht presionit të BE-së.

“Shqipërisë nuk do t’i hapen negociatat pa rezultate në luftën kundër korrupsionit dhe krimit të organizuar. Ky qëllim përfundimtar është i palëkundshëm”, është shprehur ministri holandez në një intervistë për gazetën kroate “Jutrnji List”.

Një nga nëntë kushtet e vendosura nga Bundestangu Gjerman është në fakt edhe arritja e rezultateve në luftimin e korrupsionit dhe krimit të organizuar, përfshirë dhe ndjekja penale e të ashtuquajturve “peshq të mëdhenj”.

Por për Holandën ky kusht nuk ka qenë i mjaftueshëm. Kjo iu bë e qartë Gjermanisë edhe nga kryeministri Mark Rutte, gjatë një takimi në Berlin, në tetor.

“Si shumë vende të tjera të BE-së, edhe ne jemi të shqetësuar. Pak më pak për Shkupin dhe më shumë për Tiranën. Ne pyesim se sa përparim ka pasur në Shqipëri dhe jemi edhe më të shqetësuar për këtë”, u shpreh kryeministri holandez gjatë konferencës me Merkel.

Në qershor të këtij viti, parlamenti holandez votoi kundër fillimit të negociatave me Tiranën dhe ka kërkuar rikthimin e regjimit të vizave me Shqipërinë.

Ministri holandez i Drejtësisë dhe Sigurisë Ferdinand Grapperhaus kishte paralajmëruar në fillim të vitit të kaluar Tiranën zyrtare për ndikimin në rritje të kriminelëve shqiptarë në botën e krimit në vendin e tij. Ministri ka zhvilluar një vizitë në kryeqytetin shqiptar për të nxitur qeverinë që të bëjë më shumë kundër këtyre shqetësimeve, – shkruan “SI”.

j.l./ dita