Merkel përgjigjet: Nuk reduktojmë eksportet

Kancelarja gjermane Angela Merkel i ka kthyer përgjigje Shteteve të Bashkuara të Amerikës dhe Komisionit Europian në lidhje me akuzat se, Berlini po dëmton rritjen ekonomike në kontinent dhe në botë duke i dhënë përparësi eksporteve. “Gjermania ja arriti të dalë në gjendje të mirë nga kriza financiare dhe tani është nën shënjestrën e Brukselit për shkak të madhësisë së surplusit tregtar.

Mund të shohim se si janë trendet e konsumit dhe të prodhimit në vend, por do të ishte absurde të reduktonim prodhimin dhe kualitetin e produkteve tona për të qënë në linjë me kërkesat e Brukselit”, deklaroi  kancelarja Angela Merkel, e pranishme në një forum mbi ekonominë të organizuar nga e përditshmja gjermane Sueddeutche Zeitung. “Absolutisht, një gjë e tillë nuk është e mundur”, shtoi kancelarja.

Gjithashtu Merkel i ka bërë thirrje zyrtarëve të mos i shikojnë gjërat vetëm në këndvështrimin e Brukselit dhe brenda kufijve të Europës, por të shohin edhe të aspektin e sfidave të mëdha të konkurrueshmërisë në nivel global. Surplusi i llogarisë korrente të Gjermanisë në Eurozonë është më pak se 3%, çka tregon se situata është e ekuilibruar në Gjermani. “Kemi një borxh prej 80% të Prodhimit të Brendshëm Bruto dhe po përpiqemi të realizojmë objektivat e Bashkimit Europian për ta ulur borxhin në 60%.

Dhe për këtë, nuk do bëjmë gjë tjetër veçse do punojmë fort që brenda 10 vitesh ta realizojmë këtë objektiv”, deklaroi kancelarja Merkel.  Në anën tjetër Merkel u shpreh e gatshme për të aplikuar një pagë minimale në nivel kombëtar, duke përmbushur edhe një ndër kërkesat e Social-Demokratëve për të krijuar koalicionin qeverisës.