Nesër mblidhet Këshilli i Sigurisë Kombëtare, Meta fton Ramën dhe Bashën

Kreu i PD Lulzim Basha ka zbuluar mbrëmjen e sotme se Presidenti Ilir Meta do të thërrasë nesër Këshillin e Sigurisë Kombëtare ku prezent do të jetë ai dhe kryeministri Rama.

Në një emision televiziv, Basha tha se Presidenti e ka njoftuar për mbledhjen e nesërme, dhe sipas tij ky është një hap i rëndësishëm pasi Meta fton për herë të dytë kreun e opozitës në Këshill.

“Sot Presidenti më ka njoftuar se do të thërrasë nesër Këshillin e Sigurisë Kombëtare. Presidenti për herë të dytë po fton dhe kryetarin e opozitës në tryezë”, tha Basha.

Ndërkohë, i pyetur për ftesën e Ramës ndaj opozitës për të bashkëpunuar për përballimin e situatës së shkaktuar nga Covid-19, Basha e refuzoi atë. “Përgjigja ime është se unë s’do angazhohem në retorikë politike. Sa i përket retorikës politike, atë që kam bërë prej pesë javësh, duke mos u bërë pjesë e retorikës politike, do ta bëj derisa qytetarët të kalojnë këtë situatë. Këtë ja kam thënë dhe kryeministrit”, shtoi kreu i PD.

Më tej, kreu i PD i bëri thirrje Ramës që të gjithë vëmendjen dhe energjinë e tij ta fokusojë për të mbrojtur jetën, shëndetin dhe ekonomikë e shqiptarëve.

“Gjithë vëmendjen dhe energjinë e tij ta fokusoj të puna për të mbrojtur jetën, shëndetin dhe ekonominë e shqiptarëve. Dhe këtu opozita do të japë gjithë kontributin e saj. Natyrisht këtu do të ndihmonte nëse propozimet e opozitës do të zbatoheshin ashtu siç na është premtuar në Këshillin e Sigurisë Kombëtare”, përmbylli kryedemokrati Lulzim Basha.

e.k. / dita