Meta pas parashikimit ekonomik pesimist të Berzh: Të shumëfishojmë prodhimin

Parashikimet e BERZH për ekonominë shqiptare ishin pesimiste. Në raportin e pubikuar sot, “Perspektiva Ekonomike Rajonale në rajonet e BERZH”, ekonomia shqiptare parashikohet të bjerë me -9%, që është më e thella në rajon dhe në gjithë vendet në zhvillim, pjesë e BERZH, me përjashtim të Libanit (-11%).

Për këtë raport të BERZH vjen reagimi i presidentit Meta. Në një postim në rrjetet sociale, Meta shkruan se këto paralajmërime të BERZH janë jo vetëm shqetësuese por tregojnë edhe krizën e thellë strukturore të ekonomisë tonë.

Çfarë propozon Meta?

Duhet të punohet seriozisht për të mbështetur aktivitetet ekonomike aktuale, por dhe të mendohet për të tejkaluar krizën strukturore duke rishikuar modelin ekonomik.

Modeli ekonomik duhet të mbështetet në diversifikimin e ekonomisë për të ulur riskun e krizave dhe për të siguruar një zhvillim ekonomik të qëndrueshëm.

Ne duhet të punojmë për të shfrytëzuar kapacitetet potenciale të vendit tonë për të rritur prodhimin e energjisë, për të rritur vlerën e burimeve minerale dhe natyrore nëpërmjet përpunimit të tyre, për të rritur prodhimin industrial dhe për të shumëfishuar prodhimin bujqësor dhe atë agro-industrial.

Zgjerimi i kapaciteteve portuale, i rrjetit të transportit, si dhe i transmetimit të energjisë është potencialisht një mundësi tjetër për të shfrytëzuar avantazhin tonë gjeografik rajonal.

Në Shqipër debati është fokusuar tek plani i qeverisë për të legalizuar kanabisin për prodhim mjekësor.  Presidenti Meta nuk ka shprehur deri më tani një qëndrim. Drafti ende nuk është publikuar. Kreu i PD-së gjithashtu nuk ka shprehur qëndrimin e tij, ndërsa Kryemadhi dje e quajti Ramën mashtrues.

l.h/ dita