Drejtori i Policisë Kufitare Korçë: Më futi në kurth vartësi

Gjykata e Korçës jep masën e sigurisë arrest në burg për ish-drejtorin e kufirit, Ylber Zyberi, i cili akuzohet për korrupsion dhe kontrabandë mallrash. Në seancën gjyqësore të djeshme,  gjykata ka vendosur që Ylber Zyberi do të qëndrojë në “arrest në burg”, deri në përfundim të hetimeve. Vetë, ish-drejtori i Kufirit dhe Migracionit në qarkun e Korçës, në sallën e gjyqit ka mohuar akuzat e ngritura ndaj tij, duke i cilësuar si trillime. Ai ka theksuar se “për kontrabandën ka njoftuar edhe strukturat e policisë për goditjen e personave përgjegjës”.

“Hedh poshtë dhe përçmoj çdo akuzë të ngritur ndaj meje, janë të gjitha trillime. Nuk kam shpërdoruar detyrën, prokuroria më akuzon për korrupsion, por nuk ka asnjë provë nëse unë kam marrë para dhe kë mund të kem shpërblyer. Kam marrë të dhëna për kontrabandën dhe kam vënë në lëvizje strukturat e duhura për goditjen e personave”, ka thënë Zyberi i pyetur nga gjyqtari i gatshëm. Ai ka pranuar të japë të gjitha shpjegimet duke u mbrojtur dhe quajtur sajesë akuzat e ngritura.

“Informacionin për kontrabandën e kam shqyrtuar me kujdes dhe kam kërkuar ndihmë për çështjen. I kam kërkuar ndihmë shefit të Krimit Ekonomik dhe policisë së qarkut Korçë për të goditur fenomenin. Kam dërguar mjete motorike për të prishur vendin ku kryhej kontrabanda e gjedhëve në Gorricë. Prokuroria dhe SHKB ka marrë informacione të trilluara nga vartësi im, shefi i stacionit Nikolin Muçollari. Kam pasur dijeni për ditën kur do të kryhej kontrabanda dhe për këtë kërkova takim me shefin e Krimit Ekonomik për të organizuar aksionin, por ai më nxori justifikime”, ka deklaruar në gjyq Zyberi.

Pavarësisht kësaj, gjykata aprovoi kërkesën e prokurorisë për arrestin me burg, deri në sqarimin e plotë të rrethanave dhe çështjes. Zyberi tre ditë më parë ka pasur edhe probleme shëndetësore në qeli. Policia dhe prokuroria e akuzojnë se prej kohësh favorizonte kontrabandën e konfeksioneve dhe industrialeve në Liqenas, ndërsa e kapën në momentin që po kalohej një kamion me targa bullgare. Policia sekuestroi kamionin, ndërsa shpalli në kërkim edhe një grup kontrabandistësh, mes tyre shoferë, tregtarë dhe ndihmës, ndërsa prangosi kreun e kufirit në qark për shpërdorimin e detyrës, korrupsion dhe kontrabandë mallrash për të cilat paguhet akciza.