Mesila Doda: Unë me PDIU? I pëlqej apo nuk i pëlqej dikujt, harrojeni, nuk iki nga PD

Deputetja Mesila Doda hodhi poshtë zërat se “shumë shpejt do të bashkohet me grupin parlamentar të PDIU-së, partisë së Shpëtim Idrizit”. Në një prononcim telefonik dhënë mbrëmë për DITA, Doda tha se “janë të gjitha thashetheme dhe tërësisht të pavërteta”

“Harrojeni, nuk luaj vendit, nuk iki në asnjë mënyrë nga Partia Demokratike. I pëlqej apo nuk i pëlqej dikujt apo disave qoftë dhe në PD, kjo nuk është aspak një arsye për tu larguar. Dua të jem e qartë për të gjithë: Mesila Doda do të qëndrojë e palëkundur në PD, do të luftojë për PD-në dhe do të bëjë sa ka mundësi për të forcuar dhe zhvilluar Partinë Demokratike. Nuk është fare në diskutim largimi im”, – tha mbrëmë Doda.

E pyetur më tej se si mund të ishte kaq e sigurtë për qëndrimin në PD, në kushtet kur kontratat politike nuk janë të përjetshme, Doda është shprehur se: “Dua thjesht t’iu konfirmoj se asnjë thashetheme i kohëve të fundit që po përflitet nuk ka lidhje me të vërtetën dhe planet e mia. Sigurisht që kontratat nuk janë të përjetshme, por unë i kam kontratat të qarta me njerëzit dhe demokratët që më votuan dhe më besuan. Ndaj dhe besoj jeni të qartë se nuk ka asnjë lidhje me të vërtetën ky thashethem”.

************

Mesila Doda në pritjen e Ramës, demokratët i bëjnë gjyq në FB

Në 9 dhjetor  kishte dy aktivitete  paralele për 23 vjetorin e Lëvizjes Studentore. Një që organizohej nga studentët e kësaj lëvizje dhe ku merrte pjesë dhe kryeministri Edi Rama dhe tjetri nga demokratët dhe PD-ja, të cilët e konsiderojnë dhe festë përfaqësuese të tyren. U vu re që deputetja e PD, Mesila Doda gjendej në pritjen ku merrte pjesë Rama dhe jo në pritjen e PD-së.  Doda shkruajti më pas në FB:

“Sot isha e pranishme në ceremoninë e festës së 8 Dhjetorit organizuar nga Lëvizja Studentore Shqiptare. I kërkova zyrtarisht kryeministrit shqiptar, i pranishëm në këtë ceremoni, të distancohet nga shfaqja e portretit të Enver Hoxhës në ceremoninë zyrtare të 29 nëntorit.Përgjigja ishte përsëri mëdyshëse, me një gjysëm zëri tentoi të thoshte se nuk kish lidhje për Enverin, por ende nuk e dëgjova të ngrinte zërin kundër kësaj shfaqjeje të shëmtuar. Ende pres një distancim të prerë nga forca qeverisëse për të dënuar krimet e komunizmit. Pres që për të mirën e shqiptarëve të na bashkohen në iniciativat ligjore për të zbardhur të kaluarën dhe për t’u ndarë përfundimisht me të”.

Mirëpo i menjëhershëm ka qenë reagimi i fansave. Ja çfarë shkruajnë disa prej tyre: “Ishte gracke kjo e sotmja Mesila! Sidoqofte Rama fitoi me shume nga ç’i kerkove të humbte….” “Prit gomar të mbijë bar, i thonë kësaj Mesila” “Bravo Mesila, je e madhe, njashtu vazhdo se je mirë, të përgëzoj” “Astrit, sot ajo zvogëloi madhështinë e saj” “E para do të ishte rithemelimi i PD e nderuar…” “Ndërroni kuajt e karrocës se u kanë rënë patkonjtë”. “Duhet të ishe e “rrethuar” nga burra gazetarë ose miks. Vetëm njëra nga gazetaret ishte e vërtetë”, etj, etj Kuptohet se ata që lexojnë faqen e Mesilës në Facebook janë më së shumti anëtarë ose simpantizantë të PD-së.

Edi Rama iu përgjigj  deputetes së PD-së:  “Ne me Mesilën kemi qenë gjithnjë në një mendje për Enverin e vdekur, aty ku jemi ndarë gjithë këto vite është te Enveri i gjallë, por me siguri 23 vjet janë një fjalë gojë por edhe një shpresë jetë, shumë shpresa, përplasje, ndarje, por edhe pa rigjetje si kjo e sotmja. Ju faleminderit që krijuat një mundësi shumë të veçantë për të pasur në podium dy protagonistë që janë nisur nga e njëjta korsi dhe sot janë në të njëjtën rrugë edhe pse janë në dy korsi të ndryshme unë majtas ndërsa Mesila djathtas. Por ju na dhatë mundësinë të dëshmoj se, kur dy korsitë janë pjesë e një rruge dhe gara bëhet kush ecën më shpejt në korsinë e vet e jo kush i bllokon korsinë tjetrit gjithmonë ka më shumë se një arsye për të shpresuar, jetuar dhe bindjen se në të gjitha rastet, pikërisht ekzistenca e një korsie tjetër bënë që gjërat të shkojnë më mirë në rrugën tonë të përbashkët” – deklaroi Rama.

Po atë ditë, deputetja demokrate  iu përgjigj gazetës ‘DITA’ për reagimet kundër saj në Facebook:  “Në të vërtetë unë nuk shqetësohem nga këto reagime në Facebook. Është e drejta e gjithsecilit të shprehet dhe të thotë atë që mendon. Kjo është demokracia, që në fakt ai zotëria (Rama) nuk e bënte kur ishte në opozitë. Mua më pëlqen fryma, kur mendimet thuhen hapur. Ne kemi kurajën të marrim pjesë në këto takime dhe t’i themi gjërat hapur…”