Sali, je turpi ynë. Turpi i dhjetoristave

Letër e nënshkruar

Albert Kërçiku

Përshëndetje Dita! Të flasin për Lëvizjen e Dhjetorit dinë të gjithë, por ta jetosh atë lëvizje janë më pak. E them këtë pasi jam një ndër banorët e vjetër të Q.Studenti dhe kam shumë për të treguar, por nuk më vjen mirë kur disa politikanë puro komunistë, fshehur nën petkun e demokracisë na thonë se “çfarë i dhamë ne këtij populli, çfarë sollëm me kontributin tonë”.

E papranueshme që një Sali, apo disa Salinj na sollën demokracinë, kurrën e kurrës, ata vetëm na e vodhën demokracinë. Pasi fitoi zgjedhjet për herë të parë PD-ja, më kujtohet vetëm një fjalë e Sali hajdutit që me zë të lartë tha: “Ne nuk do t’i kërkojmë Amerikës bukë, por punë!” Dhe ne brohorisnim nën thirrjet: “Rroftë PD-ja, Liri-Demokraci!”. Por ti punësove vetëm malokërinë që solle padrejtësisht në Tiranë o komunisti i fundit i këtij vendi. Ku janë shumica e atyre njerëzve që ti kishe në krah, ku i çoi Enveri shokët e tij që kishte në krah? Ti thua që çmontove bllokun. Në fakt ti thjesht ngrite një bllok tjetër, nuk ke më Hekuran Isaj, por ke Shkëlzenin, nuk ke më Lenka Çuko, por Argitën, nuk ke më Hysni Kapo, por Lulzim Basha.

Ti je turpi i dhjetoristave, harram për çfarë e gënjeve këtë popull, ti me larot e tu, por drejtësia një ditë do të flasi, për ty dhe larot e tu, që i trëmbeni dhjetoristit të vërtetë që po ju pret fijet përditë e nga pak.