I vendosi gjobë për parkimin, qytetari bën për spital policin në Shkodër, i thyen nofullën

Një ngjarje aspak e këndshme ka ndodhur një ditë më parë në qytetin e Shkodrës.

Bëhet me dije se një qytetar ka goditur në mënyrë brutale një punonjës policie.

Shtetasi është identifikuar nga policia e Shkodrës si Indrit Shtegu, i cili ka rrahur punonjësin e policisë vendore Hysni Idrizi.

Ngjarja ka ndodhur në qendër të qytetit në lagjen ‘Parrucë’ në orët e pasdites të 8 tetorit..

Shtegu, i cili është shpallur në kërkim ka parkuar në kundërvajtje mjetin triçikël në lagjen ‘Parrucë’ duke e vendosur në një parkim dysh.

Në atë moment efektivi Idrizi është gjendur aty dhe i ka vendosur një gjobë drejtuesit për parkim në kundërvajtje.

Në atë moment Shtegu ka debatuar me efektivin e policisë, Idrizi dhe pas debatit të tyre e ka goditur në fytyrë me grushte ndërsa mësohet se e ka dëmtuar konsiderueshëm.

Pas kësaj ngjarje efektivi i policisë, Idrizi është dërguar në spitalin rajonal të Shkodrës ndërsa mësohet se ka thyer nofullën dhe është nën kujdesin e mjekëve.

Menjëherë në vendngjarje kanë mbërritur forca të tjera të policisë duke nisur hetimet për ngjarjen e rëndë të ndodhur në qendër të qytetit.

Nga kontakti i policisë me familjarët mësohet se këta të fundit janë shprehur duke i thënë efektivëve se Shtegu ka probleme të shëndetit mendor megjithatë kjo mbetet për t’u verifikuar.

Tashmë policia vijon kërkimet për arrestimin e Shtegut, i cili akuzohet për veprën penale “goditje për shkak të detyrës ndaj punonjësit të policisë” si dhe “kundërshtim me forcë i punonjësit të policisë”.

j.l./ dita