Mblidhet “Minishengeni Ballkanik”. Nga lëvizja pa teste COVID tek “korridori i gjelbër” për udhëtim, firmoset memorandum mes Ramës, Zaev, Brnabiç

Në një mbledhje të përbashkët online, kryeministri i Shqipërisë Edi Rama, ai i Maqedonisë Zoran Zaev dhe kryeministrja e Serbisë Ana Brnabiç kanë nënshkruar një memorandum bashkëpunimi sa i takon përballimit të pandemisë së shkaktuar nga Covid 19.

Kryeministri maqedonas Zoran Zaev zbulon se fillimisht lëvizja mes Shqipërisë, Serbisë dhe Maqedonisë së Veriut do të jetë pa teste PCR, pra lirshëm, si dhe në rast se një shtetas i këtyre vendeve infektohet në një vend tjetër të Mini-Shengenit, atëherë shpenzimet i mbulon shteti ku u infektua.

Kryeministri i Maqedonisë së Veruit, Zoran Zaev ka deklaruar se shtetet do të ndihmojnë njëra-tjetrën edhe në rastet kur ka mbingarkesë të sistemit shëndetësor.

“Që nga sot do të punojmë për koordonim për të siguruar vaksinën për Covid-19 për qytetarët tanë. Do të mbështesim dhe do tëndihmojmë njëri-tjetrin në momente nëse vjen deri te mbingarkesa e sistemeve shëndetësore”, pohoi Zaev.

“Hapim “koridore të gjelbra” për udhëtim të qytetarëve tanë si dhe të operatorëve ekonomikë. Shtetasit, por mbi gjitha operatorët ekonomikë të këtyre tre shteteve, do të udhëtojnë pa pasur nevojë për PCR-test, natyrisht duke respektuar masat, që janë thuajse identike”, ka thënë Zaev.

“Shpresoj që dy vendet e mbetura të Ballkanit Perëndimor (Bosnje Hercegovina dhe Mali i Zi) patjetër do të bashkohen në mënyrë që të gjithë të mund të hapim së bashku drejt një të ardhme më të mirë,” tha Rama.

“Unë besoj fuqimisht se kjo iniciativë do të rritet dhe do të na ndihmojë të njihemi më mirë kur bëhet fjalë për ekonominë, sfidat sociale dhe gjithashtu do të lehtësojë atmosferën për gjetjen e zgjidhjeve. Nuk ka asnjë mënyrë ose shans tjetër për një të ardhme më të mirë se sa të flasim, të shkëmbejmë mendime”, tha Rama.

Kosova nuk mori pjesë por Avdullah Hoti i Kosovës sipas Ramës dhe Zaevit pritet të marrë pjesë në takime të ngjashme.

j.l./ dita