Ambasadori: Informacioni që kanë holandezët për ne është i mangët

Ambasadori i Shqipërisë në Holandë, Gazmend Barbullushi, shpjegon arsyet e skepticizmit të këtij vendi lidhur me dhënien e statusit Shqipërisë. Në një intervistë për GSH, Barbullushi thotë se në opinionin e gjerë në Holandë nuk ka entuziazëm për zgjerimin.

“Pyetja më e drejtë do të ishte përse partitë parlamentare që përgatitën rezolutën dhe votuan pro saj kanë arritur në konkluzionin se qeveria holandeze duhet të bllokojë dhënien e statusit për vendin tonë. Gjatë një sesioni të gjatë në Komisionin për Çështjet Europiane dhe një seance plenare që vijoi sesionin, partitë parlamentare holandeze dhanë dhe mbrojtën qëndrimet e tyre. Këto qëndrime janë përcjellë gjerësisht dhe nga mediat tona. Pa rënë në përsëritje, do të përmendja faktin që më bie në sy se për momentin në opinionin e gjerë në Holandë, çka pasqyrohet dhe në qëndrimet e partive parlamentare, nuk ka entuziazëm për zgjerimin”, thotë ai.

“Janë bërë të gjitha përpjekjet për të bindur jo vetëm autoritetet, por dhe çdo parti parlamentare, se e meritojmë plotësisht statusin për këtë vit. Fushata lobuese  është shtrirë edhe tek grupet e ekspertëve  dhe opinionistëve për çështjet europiane, tek organizatat joqeveritare dhe formacionet  e biznesit. Arritëm të organizojmë me sukses ditët e fundit një vizitë  të rëndësishme të ministrit të Jashtëm, Ditmir Bushati dhe ministres së Integrimit, Klajda Gjosha”, shprehet ai.

Barbullushi thekson se “ Nuk më rezulton se në Holandë ka një imazh veçanërisht negativ për Shqipërinë. Nëse e krahasoj me vendet e tjera të Europës Perëndimore , ku më ka rënë rasti të punoj, nuk mendoj se në Holandë kemi probleme shtesë. Por,kam vënë re se informacioni që kanë holandezët për ne dhe vendin tonë është i mangët”.