SHENIM: A do përgjigjen Berisha e Bode për cënim me paramendim të sigurisë kombëtare?

Dje, Sali Berisha ftoi qytetarët në protestë përpara kryeministrisë. Motivi? Buxheti i ri i “qeverisë Rama” sipas tij po sjell një injektim të skemës piramidale në financat e shtetit. Baza e argumentit mbi të cilin është ngritur ky pretendim i Berishës është rritja e akcizës dhe çmimit të karburanteve, që sipas Berishës do sjellë një proces zinxhir në rritjen e të gjitha çmimeve. Një pretendim i pabazuar dhe i painterpretuar ende nga vetë Berisha dhe që do të jetë objekt i zbërthimit  nga DITA në numrat e ardhshëm.

Por Berisha ndërkohë po lufton dhe në një plan të dytë ai është në betejë për bilancet e shtetit. FMN-ja dhe qeveria socialiste kanë shpallur së bashku situatën e rëndë ekonomike dhe borxhin por dhe abuzimin stratosferik të bërë nga qeveria Berisha. Ky i fundit i quan të manipuluara këto shifra, ka implikuar dhe FMN-në madje në këtë lojë manipulative sipas tij. Ky është një moment shumë serioz për Berishën, pasi vërtetë në media kjo betejë e orëve të fundit etiketohet si “debati për shifrat” por në thelb ajo ç’ka është në lojë është fatura e rëndë dhe përgjegjësit e destabilizimit arbitrar të financave të vendit deri në cenimin e sigurisë kombëtare. Fakti që Berisha po del dhe po e konsideron si të manipuluar raportin e fundit të FMN-së, shërben si provë e qartë se ai e di mirë se sa serioze dhe katastrofike ka qenë për financat dhe destabilizimin e tyre situata që ai vetë ka krijuar dhe kurrsesi s’do mundet dot ta pranojë dot autorësinë.

Ky reagim i fundit i Berishës tregon intencionin e tij, destabilizimin me paramendim të financave të shtetit. Kjo nuk ka qenë një lojë dhe aq e fshehtë e Berishës, që prej datës 19 Korrik, DITA ka sqaruar lexuesit mbi situatën e agravuar të financave shqiptare, duke parashikuar dhe  sjelljen e Berishës pasi socialistët të merrnin frenat e pushtetit. Ai ka hyrë aktualisht në këtë fazë, “të protestës në rrugë”.

Por Berisha tashmë ka një problem të madh: Protestat nuk ngjisin më për të. Por të supozojmë se do arrijë të mbledhë 20 mijë vetë në shesh, çfarë do bëjë? Do të sulmojë institucionet me mjete dhune? Nëse e bën thjesht sa do të përshpejtojë një procedurë që dhe ndërkombëtarët e kanë me shumë  merak këto kohë: Arrestimin e tij. Nëse i mbledh dhe thjesht proteston, vështirë do e ketë t’i mbajë gjatë në shesh mbështetësit e tij më fanatikë, pasi zbardhja e situatës dita-ditës do tregojë në mënyrë të faktuar, me evidenca të qarta, se destabilizimi i financave ka autorë ekskluzivë Sali Berishën dhe Ridvan Boden. Dëmi i krijuar është kolosal, ndaj dhe Berisha është i ndërgjegjshëm se zbardhja e situatës dhe krijimi i dosjes me evidenca është më se e mjaftueshme për nisjen e një procedimi penal për çështjen më të madhe dhe më të rëndësishme që mund të ketë trajtuar ndonjëherë drejtësia shqiptare: Sabotimin dhe destabilizimin e financave dhe cenimin me paramendim të sigurisë kombëtare të vendit. Protestat nuk ngjisin, laku po i ngushtohet. Mjafton që “dora që mban lakun” të zbatojë në mënyrë rigoroze ligjin, të tjerat do jenë formalitet.

* * *

Korrik 2013, “DITA” paralajmëroi strategjinë  e Berishës me krizën ekonomike

Berisha e di mirë se ka lënë pas tokë të djegur, një gropë të zezë ekonomike,  mjaftueshëm sa për të stërmunduar qeverisjen e re dhe për të tentuar rritjen e pakënaqësisë popullore ndaj saj.  Për këtë skenar kemi ndërkohë disa të dhëna të rëndësishme:

Së pari, ai ka nisur të artikulojë se “Shqipëria ka potenciale reale për rritjen e rrogave në vazhdimësi”, ndërsa një gjë e tillë nuk përputhet aspak me situatën e vështirë të buxhetit që vetë ministri i tij i Financave e ka të shpallur në portalin e institucionit. Kjo mendon se do t’i sigurojë alibinë për të thënë më pas “unë e lashë shkëlqyeshëm ekonominë, shikoni si e katandisën vendin këta”. Shpreson që publiku do ta gëlltisë dhe këtë manovër. Pra Berisha tenton një rrënim politik të qeverisjes së re si pasojë e faturës së rëndë që ai vetë u ka lënë.

Së dyti, ndërsa koalicioni fitues i majtë nisi kontaktet me FMN-në si një burim kreditimi për injektim të ekonomisë në mënyrë efiçente dhe me plan zhvillimi, një përfaqësues i asaj që quhet Konfindustria(që ende nuk  dihet se cilët biznese konkretisht përfaqëson) doli dhe e dënoi këtë mundësi përtëritje të ekonomisë nëpërmjet FMN-së. Është e njëjta Konfindustri që e di mirë se Berisha u ka shkaktuar rreth 230 milionë euro borxhe kompanive të ndërtimit në 4 vite, por që nuk ka pipëtirë kurrë për këtë problem. Për FMN-në ama, me vrap.

Së treti, bilanci energjetik i vendit është si mos më keq. Të gjitha të dhënat sugjerojnë se dimri do të jetë i vështirë për shqiptarët, pasi realisht sistemi energjetik është i falimentuar dhe i zhytur në kolaps. Berisha e di mirë dhe këtë. Katër vitet e fundit i ka pasur të dhënat e këtij bilanci negativ mbi tavolinën e punës, por e lejoi të thellohet e të thellohet më tej.
Të treja këto të dhëna, në të vërtetë, flasin për sfida serioze  të koalicionit të majtë, sidomos në vitin e parë të qeverisjes. Por loja e Berishës në këto vite të sjell ndërmend skemën që përdori dikur kompania e falimentuar “ENRON” në Shtetet e Bashkuara. Drejtuesit e “ENRON” bënin llogaritë bazuar në atë që quhej “Bilanci me Fitim nga Perspektiva”. Skema ishte e thjeshtë, “ENRON” që në vitin 1996 mendonte dhe parashikonte se tre vite më pas, në vitin 1999 do fitonte X miliardë dollarë. Dhe këtë shifër e fuste si fitim që tre vite para kohe, duke ulur automatikisht borxhet e këqija të kompanisë dhe bilancin e saj negativ. Drejtuesit e “ENRON” e dinin mirë se çfarë ishin duke shkaktuar se si po e zhysnin korporatën drejt një rruge pa krye. Por ishte shumë vonë për të kthyer.  Skema e “ENRON” funksionoi për ca kohë, derisa dikush pa me vëmendje bilancet reale të kompanisë. Aty u zbulua se ku ishte realisht me gjendjen kompania dhe sa larg së vërtetës ishin mediat që e propagandonin si korporatën më të suksesshme të SHBA-ve.
Njësoj si drejtuesit e ENRON-it dikur Berisha e ka të qartë se në çfarë derexheje i ka bilancet shteti shqiptar sot.  Njësoj si ata dikur edhe Berisha flet sot për sukses dhe rritje ekonomike “rrotë më rrotë me Gjermaninë” ndërsa të dhënat reale i sugjerojnë se kriza është në pikën e vlimit .

Por “ENRON”-i ishte një korporatë private dhe pronarët e aj nuk kishin se kujt t’ia ngecnin katrahurën që kishin krijuar kur u ra rrufeja.
Këtë shqetësim nuk mund ta ketë Doktori. Ai ka drejtuar për 8 vite si pronar fuqiplotë një “korporatë shtetërore”. Korporatë, të cilën po pret t’ua dorëzojë kundërshtarëve politikë në Shtator.  Duket pak a shumë si një dhuratë e hidhur, duket sikur po u thotë: “Urdhëroni tortën, pak me kujdes kur ta kafshoni, brenda kam montuar dhe një minë me sahat. Gjak e dhjam”.
Partia Socialiste nga ana e saj ka njoftuar se do pajtojë një audit ndërkombëtar për të zbardhur bilancin ekonomik të shtetit që ka bërë peshqesh Berisha. E sigurt është se auditi ndërkombëtar do nisë punën pas Shtatorit, sepse deri në këtë kohë do jetë në zyrë vetë Berisha.  Pra në rastin më të mirë auditi do nisë nga puna në dimër, atëherë kur pret dhe Berisha efektet e rënda të krizës energjetike . Ai po e shtyn me sa të mundë zbardhjen e situatës ekonomike, i duhet kohë, i duhet dimri, i duhet kriza energjitike, i duhet mllefi në popull, i duhen protestat, i duhet PD-ja agresive, sepse vetëm tensioni politik….e shpëton pa u lagur nga zbardhja e një bilanci që do na bëjë të gjithëve të kuptojmë se mund të mos jemi “dhe aq pranë Gjermanisë”.       (Boruar në DITA, 19 korrik 2013)