Evazion, mashtrime, falsifikime. Paditet e gjithë familja Taçi

Manjati i arit të zi, Rezart Taçi dhe familja e tij çohen në prokurori për pastrim parash, evazion fiskal, mosderdhjen e detyrimeve tatimore, falsifikime, etj. Bosi i “Taçi Oil”, blerësi i kompanisë “ARMO” në 2007, tashmë gjendet familjarisht në qendër të një cikloni juridik me të paktën 6 akuza të rënda.  Drejtoria e Përgjithshme e Doganave e Drejtoria e Tatimeve, së bashku me Zyrën Kundër Krimit Financiar të Policisë së Shtetit, pas dy muaj hetimesh në sekret të plotë, kanë ”kopsitur” dosjen “Taçi Oil” dhe disa ditë më parë, në datën 16 dhjetor të këtij viti, dosja është depozituar në Prokurorinë e Tiranës, duke ia kaluar Task-Forcës për procedim. Të denoncuarit janë përveç Rezartit, babai i tij Mustafa Taçi, motra Anika Taçi, nëna Drita dhe dy ndihmës në biznes që kanë firmosur veprimet e Taçit, Arjan Kolgega dhe Irgen Selfo, nipi i Taçit. Nën akuzë janë edhe drejtues të Tatimeve dhe Doganave. Veprimi i ardhshëm i Prokurorisë do jetë  nëse do priten fletët e arrestit direkt, apo do kryhen një herë verifikimet për pyetjen e të denoncuarve.

 

Dosja penale

Hetimi paraprak përfshin ditën kur nisën procedurat për blerjen e “ARMO”-s me ngritjen e një kompanie provizore posaçërisht për këtë privatizim strategjik. Dhe janë thelluar me veprimet financiare ndër vite, ku Rezart Taçi i është shmangur me miliona dollarë detyrimeve financiare, nga fshehja e karburanteve, mosdeklarimi i tyre, mosderdhja e gjobave, tatimeve, veprimet bankare në transaksione dhe deri tek pastrimi i parave së fundmi, pas përpjekjes për shitjen e kompanisë tek një tjetër koncesionar. Në këtë veprimtari antiligjore, në produktin e pastrimit të parave, dyshohen se janë përfshirë edhe dy kompani të huaja, njëra në Zvicër dhe tjetra në Ishujt Virgjine. Veprimi i fundit në transaksion është shitja e kompanisë me 80 milionë euro, të cilat ai nuk i ka deklaruar si veprime ligjore, duke iu fshehur detyrimeve. Në veprimet për tërheqjen e shumave marramendëse, janë përdorur të gjithë familjarët.

 

Miliardat

Dyshohet se abuzimi kap shifrën e rreth 15 milionë dollarëve, pra 1.5 miliardë lekë të reja. Së bashku edhe me punonjës të tatimeve dhe me persona të tjerë, shqiptarë apo të huaj, thuhet në kallëzim, këta persona kanë kryer dhe vazhdojnë të kryejnë veprime të kundraligjshme, që përbëjnë elementë të veprave penale si evazion fiskal apo mashtrim financiar, përfshirë edhe falsifikimin e dokumenteve. Veçohen mosdeklarimi i shitjeve pranë organeve tatimore i naftës, një numër i lartë eksportesh me shkelje të kryera nga kompania “TAÇI OIL” për shoqërinë malazeze “IK REAL D.O.O Podgorica”, mosshlyerja e detyrimeve tatimore dhe gjobave, krijimi i disa kompanive prej Taçit, me të njëjtin objekt aktiviteti (“A.R.M.O” SHA; “Kuid” SHPK; “Taçi Oil” apo “Kuarta”) të angazhuara në një sërë transaksionesh financiare e bankare ndërmjet tyre, për të mashtruar me TVSH-në dhe fshehjen e të ardhurave, etj.

 

Firma misterioze

Ka edhe një tjetër mashtrim gjigant. Në shtator të këtij viti, një kompani zvicerane e quajtur “Societe Generale de Surveillance”, me seli në Gjenevë, ka lëshuar nje faturë në favor të “Niti Petroleum Company”, ku në pjesën përshkruese të mallit është shënuar: “Deklaratë për humbjen e produktit me vlerë totale 28.4 milionë dollarë”. Sipas antikrimit ekonomik, ka dyshime se ky mund të jetë një tjetër mashtrimi i shoqërisë “Niti Petroleum Company”. Burimet thonë se kjo dyshohet të jetë aferë e pastër korruptive dhe po hetohet për personat e përfshirë në të.

Rezart Taçi njihet si biznesmen i lidhur kryesisht me fushën e naftës dhe përflitet për lidhje të forta me familjen Berisha. Mashtrimi i tij i fundit spektakolar ishte futja në tenderin për blerjen e Albpetrol, ku deklaroi një shifër blerje të jashtëzakonshme 850 milionë euro, për të cilën nuk arriti të derdhte as 10 përqindshin e garancisë si pagesë fillestare.

 

Disa nga veprimet e hetuara të super-dosjes Taçi

-Mosdeklarimi i shitjeve pranë organeve tatimore i 565 820 litrave gazoil me vlerë  485 633 USD eksportuar nga kompania“TAÇI OIL International Trading&Supply”, sha me administrator Rezart Taçi, për shoqërinë malazeze“IK REAL D.O.O Podgorica

-Mosshlyerja e detyrimeve tatimore dhe gjobave nga shoqëria A.R.M.O.”sha me administrator të përgjithshëm shtetasin Razart Taçi, për shumën  1 494 692 782 lekë(rreth 8.2 milion euro) dhe transferimi i 80 % të aksioneve nga aksionari “Anika Enterprises SA(i cili zotëronte 85 % të aksioneve të “A.R.M.O-s.”) tek aksionari i ri Heaney Asset Corporation.

– Mosshlyerja e detyrimeve tatimore dhe gjobave  për shumën 1 375 824   nga subjekti Taçi Oil International & Suplly Company”  me administrator të përgjithshëm Rezart Taçi, dhe transferimi i 100 % të aksioneve  tek aksionari i ri Heaney Asset Corporation.

– Mosshlyerja e detyrimeve tatimore dhe gjobave  për shumën 138 543 000 lekë nga subjekti Kuid”shpk me Nipt K 63005203 O me administrator Rezart Taçi dhe transferimi i 100 % të aksioneve  tek aksionari i ri Heaney Asset Corporation.

-Mosveprimi i organeve tatimore për kontrollin e plotë të gjitha subjekteve në administrim të shtetasit Rezart Taçi dhe personave të lidhur me të, si dhe mos marrja e masave ligjore për të penguar transferimin e aksioneve të këtyre shoqërive debitorë tek aksioner të tjerë.

 Krijimi i disa kompanive nga i njëjti person Rezart Taçi, me të njëjtin objekt aktiviteti tregtar(si A.R.M.O. sha; “Kuid” shpk; “Taçi Oil International Trading& Supply Company” sha; “Kuarta” sha  etj.) dhe kryerja e transaksioneve financiare e  bankare ndërmjet tyre mund të jenë bërë me qëllim mashtrimin me TVSH-në dhe fshehjen e të ardhurave.

-Kryerja e transaksioneve derdhje-tërheqje në vlerë të larta me para në dore dhe tërheqja  e menjëhershme e tyre nga bankat nga familjarët e shtetasit Rezart Taçi.

-Faktin se nuk ekzistojnë transaksione bankare dhe kontrata noteriale që të justifikojnë qëllimin e përdorimit të këtyre fondeve, për periudhën pas tërheqjes së tyre.

-Transferta prej 4.5 milionë euro në favor të shoqërisë “A.R.M.O.” me arsyetimin kalim fondi.

-Transferta në vlera të larta nga shoqëria “A.R.M.O.”sha për likuidim detyrimesh dhe tërheqje e këtyre shumave menjëherë brenda ditës.

-Kontrata për blerje e 20 % të aksioneve të shoqërisë në vlerë tepër të lartë. Megjithëse e pa ekzekutuar ende.

-Lidhja e një deklarate noteriale midis Anika Taçi dhe shoqërisë “A.R.M.O.” për shumën 20 milion euro për njohje dhe shlyerje detyrimi.

-Prania e të njëjtëve persona në cilësinë e anëtarit të këshillit mbikëqyrës, apo  të aksionerit në disa kompani në pronësi të Rezart Taçit.

-Shitja fiktive e menjëhershme e katër kompanive nga shtetasi Rezart Taçi. Fakti që ”shitësi” dhe ”blerësi” janë në të njëjtën adresë.

– Me datë 31.102011 në llogarinë e kësaj shoqërie është transferuar nga shoqëria “Fokus Group” shuma 1 633 410 euro më përshkrim “shlyerje detyrimi sipas kontratës”. Shoqëria “Fokus Group” shpk me Nipt L11618006J është krijuar në prill 2011 me objekt të veprimtarisë në fushën e mediave elektronike dhe të shkruar, shitblerje e pasurive të paluajtshme  me ortakë Bashkim Hysenbelliu dhe Asllan Grezda.

– Etj, etj.

Të denoncuarit në prokurori:

1. Rezart Mustafa Taçi, 42 vjeç

2. Anika Mustafa Taçi, 38 vjeç

3. Mustafa Nevrus Taçi, 78 vjeç

4. Drita Riza Aliçka, 67 vjeçe, nëna

5. Arjanit Bexhet Kolgega, 37 vjeç

6. Irgen Arian Selfo, 27 vjeç, nipi i Taçit

7. Kërkohet edhe hetimi i administratës tatimore

 

Akuzat e ngritura:

 “Fshehja e të ardhurave”

“Mospagimi i taksave dhe tatimeve”

“Moskryerja e detyrave nga organet tatimore”

“Falsifikimi i dokumenteve”

“Krijimi i skemave mashtruese lidhur me tatimin mbi vlerën e shtuar”

“Pastrimi i produkteve të veprës penale, ose veprimtarisë kriminale”