SHËNIM: A është dinjitoze qaravitja për buxhetin e Presidencës?

Pa e paragjykuar aspak hallin e Presidencës dhe Nishanit vetë për buxhetin e pamjaftueshëm, sipas tyre, që qeveria i ka akorduar, a nuk do ishte më e udhës që qaravitjet, apo ankesat thënë me gjuhë korrekte zyrtare, të ishin konfidenciale dhe t`i kurseheshin publikut me çdo mënyrë? Vret keq kur në një vend si ky i yni, me mbi njëqind telashe edhe financiare për metër katrorë, Presidenca e kreu i saj, në vend që të jenë një model sjelljeje e modestie, bëjnë gërrnjarin si ata pleqtë e pagdhendur e të rrjedhur nga mosha. Aq më tepër kur Presidenca dhe kreu i saj, kanë sot kuotat më të ulta të prestigjit e rolit në zhvillimet shumëpërmasore të vendit. Dhe këto kuota, nuk rriten më fonde, por me qasje burrërore e morale ndaj vendit e përgjegjësive. Sepse në fund, bilançet nuk bëhen më para por me vlera. Një fund të turpshëm ose me nder, nuk e përcaktojnë milionat, por aktet e larta në shërbim të vendit, për të patur një përgjigje të denja pyetjet hipotetike e çdokujt: Ky burrë (pra Nishani), për çfarë duhet mbajtur mend?! Për çfarë duhet të hyjë në Histori?! Çfarë i la një vlerë a standart moral popullit të tij, sa qe në krye?! Këto duhet ta sikletosin e ta lënë pa gjumë, e jo milionat që i duhen për qoka zyrtare!

Rubrikën ‘Monitorime’ mund ta lexoni çdo ditë në DITA