Merkatoja politike e dimrit

Xhevdet Shehu

Lajmi më i bujshëm ditën e djeshme ishte ai që kumtonte se Nasip Naço, ish-ministër i LSI-së, kaloi me PS-në, pasi iu gjend në krah Blendi Klosit, koordinatorit të PS-së për qarkun e Beratit. Në të vërtetë nuk ishte ndonjë lajm kushedi se çfarë, por momenti i shpalljes së këtij angazhimi politik katër muaj para zgjedhjeve të 25 prillit, ngjall hamendësime.

Pavarësisht se nuk kam njohje personale me të dhe nuk e kam pirë asnjë kafe deri më sot, mendoj se Nasip Naço ka qenë gjithnjë një politikan i përmbajtur dhe i pa përfolur për abuzime me pushtetin, kur ishte ministër apo një politikan aktiv. Në fund të fundit ai është një i majtë, sikurse deklarohen edhe PS edhe LSI. Por lëvizja e tij e djeshme ka një tjetër domethënie dhe mund të interpretohet në mënyra të ndryshme.

Jemi në merkaton dimërore të futbollit. Blihen dhe shiten lojtarë në gjithë botën. Jemi mësuar me këtë ritual dhe nuk na çudit asgjë kur një futbollist shkon tek një skuadër që e blen më shumë. Personalisht, duke mos qenë një specialist i kësaj fushe, jam kundër këtij pazari që bëhet, pasi më duket si një shkelje flagrante e dinjitetit njerëzor, një nëpërkëmbje dhe poshtërim. Mirëpo kjo ndodh dhe është një realitet.

Ajo që më shqetëson është fakti se si shiten dhe blihen politikanët. Që partitë tona politikë janë shumë të ngjashme më njëra tjetrën, kjo dihet. Prej 30 vjetësh e përjetojmë këtë realitet. Edhe pr5ogramet e tyre ngjajnë së tepërmi me njëra-tjetrën.

Besoj se shqiptarët janë bindur për këtë. Sepse të gjitha partitë janë shkëputur maksimalisht nga trashëgimia e së kaluarës komuniste aq shumë të anatemuar dhe të gjitha përpiqen të paraqiten sa më shumë properëndimore dhe pro-europiane. Pro-amerikane doemos! Përndryshe, zhduken ngaq skena e politikës. Përndryshe nuk ka pushtet dhe nuk ka para, nuk ka privilegje dhe të ardhme.

Nasip Naçoja mbase bëri atë që duhej. Ai nuk është servil politik. Mbase pragmatist, po. Por pragmatizmi në politikë njihet. Ka ndodhur në të kaluarën, do të ndodhë edhe në të ardhmen. Në PS ka akoma ish-deputetë të PD-së që masakruan socialistët në zgjedhjet e manipuluara të 96-s, sikurse në krahun e PD-së sot janë ish-socialistë të tipit Kastriot Islami që ngjiren më shumë se Sali Berisha për gjoja dhunimin e demokracisë.

E pra! Jemi në merkaton dimërore të politikës! Do të kemi çudira shumë! Ca do të hyjnë dhe ca do të dalin! Thënë troç: Pazar! Shitje-blerje! Po idealet ku janë? Do pyesni ju. Eh, Idealet kanë vdekur prej kohësh. Më kujtohet një poezi e Dritëroit e shumë viteve më parë me titullin “Malli për heronjtë”. At Dritëroi me pak fjalë shprehte thelbin e një shqetësimi mbarëshoqëror, një merak që e mundonte përbrenda dhe që e vuante si askush. Ja si shkruante Dritëroi:

Ç’digjeni nga malli për heronjtë?

kushedi kur kthehen nga kjo anë.

Ç’i kërkoni?Pritja është e kotë

S’ka heronj, tani ka pelivanë!