1
Gjithë jetën do vuash mes dhimbjes e stresit
Po i fale besën të pabesit,
Po i fale besën, po i more mënde
Veten e ke vrarë ti me dorën tënde!…
2
Asnjëherë në libër
S’janë shkruar afatet
Po këtu do lahen
Të gjitha mëkatet!…
3
Po iu hap dera të ligës
S’ndrin më Hënë e s’ndrin më yll,
Po iu hap dera të ligës
S’ka burrë nëne që e mbyll!…
4
Kur vjen sëmundja e djallit
Ti digjesh si zjarri i eshkës
Se vjen me vrapin e kalit
Dhe ikën me hapin e breshkës!…
5
Kush me mjaltë të lyen
Dihet, s’të do shumë,
Po dhe kush të gjuan
Bën të njëjtën punë!…
6
Çdo gjë përfundon
Në një çast të vetëm
Kur një errësirë
Ta mbulon krejt jetën!…
7
Dhe para meje shpeshherë
Këto dy vargje janë shkruar:
“Më mirë kasolle në këmbë
Se sa Kështjellë e rrëzuar!…”
8
Dhe vijnë me dritë të rrallë
Dy vargje të tjerë, të thekur:
“Më mirë trumcak e i gjallë
Sesa shqiponjë, po e vdekur!.”
9
Ka diçka në jetë
Që nuk do sforcim
Dhe kjo është Mirënjohja,
More miku im!…
10
Kur je në të errët
Mos e humb vërtet
Se të ndizet drita
Andej nga s’e pret!…
11
Asnjeri në fshat
S’ta hapte shtëpinë,
Po ti nuk lëvizje
Se doje Kadinë!…
12
Ta vunë kufirin
Tutje në Virua:
Ti vajzën e Priftit
Kërkoje për grua!…
13
Ta vunë kufirin
Te thana me lule
Dhe ti nga inati
Gjithë thanën e shkule.
Dhe bëre si bëre
Ece dhe një metër
Po aty, për dreq,
Ishte thana tjetër.
Ndaj dëgjo nga unë
Dy fjalë me vlerë:
“Po t’u vu kufiri
S’çan dot asnjëherë!…”
14
Kë shtëpinë me gjashtë oxhakë
Gjashtë oxhakë, o miku im,
Pamë e pamë një jet’ të tërë,
Asnjeri nuk nxori tym!…