Klosi: Brukseli foli troç. Brokaj: Antikorrupsioni duhet të nisë nga Berisha

Fatos Klosi:

Po e dëgjova këtë deklaratë të zotit Vuljanic dhe më pëlqeu shumë. Është hera e parë që Brukseli flet troç. Unë mendoj se apeli i Brukselit ishte për arrestimin e Sali Berishës. Berisha nuk është si qytetarët e tjerë të këtij vendi. Ai ka qeverisur për tetë vjet dhe Brukseli e ka monitoruar atë në çdo hap. Ata kanë fakte dhe nuk flasin kot. Mbi Berishën rëndojnë një mal akuzash si për vrasjet e 21 janarit, Gërdeci, për korrupsionin gjigand etj. Mendoj se ata kanë krijuar një bindje të fortë deri sa u bë kjo deklaratë. Ky është një apel i fuqishëm. Por, këtu duhet të kemi parasysh diçka thelbësore. Nuk është qeveria që arreston. Qeveria evidenton faktet, shkeljet ligjore që janë bërë, denoncon dhe pastaj prokuroria vepron, kryen aktet ligjore sipas përgjegjësisë. Për shembull, është detyrë e qeverisë që të auditojë gjithë administratën e mëparshme dhe e ka nisur mirë me auditivet në Ministrinë e Mbrojtjes, të Brendshme, atë të Financave etj. Po qe se rezulton se iks ministër, Imami, Bode a ndonjë tjetër, deri edhe Berisha, qeveria të bëjë kallëzimin penal në Prokurori dhe i takon asaj të bëjë punën e saj, domethënë të ulë në bankën e të akuzuarve fajtorët. Gjithsesi, unë e vlerësoj si shumë pozitive dhe inkurajuese deklaratën e Brukselit. Sepse pa u vendosur drejtësia, është e kotë të flasim për progres.

Brokaj: Të arrestohen së pari Berisha dhe ministrat e tij

Dr. Sabit Brokaj komenton për gazetën ‘DITA’ deklaratën e raportuesit për Shqipërinë, Nicola Vuljanic. Brokaj tha se, nëse Shqipëria kërkon të luftojë korrupsionin, duhet ta fillojë pikërisht nga Berisha. Këtë unë e kam thënë me kohë, pasi Berisha ka krijuar kulturën e mosndëshkueshmërisë në këtë vend. Sipas tij, ish-kryeministri Sali Berisha dhe ministrat e tij duhet të dërgohen para drejtësisë, pasi provat për korrupsionit dhe veprimet e tyre antilogjore janë evidente. Përmendim dosjen për rrugën Durrës-Kukës, kur u sajua një shpikje monstruoze vetëm për të mos u dënuar përgjegjësit. Pa folur këtu për krime të tjera që Berisha dhe ministrat e tij kanë bërë gjatë tetë vjetëve në qeverisje si Gërdeci, 21 janari dhe pa shkuar më tutje tek 97-a apo 98-a.  Lufta kundër korrupsionit duhet të fillojë nga ata që e krijuan dhe e ngritën në sistem korrupsionin. Pikërisht nga koka dhe personi që është themeluesi i tij. Përgjegjës për vendosjen në sistem të korrupsionit në Shqipëri, janë Berisha me ministrat e tij. Provat kanë dalë me kohë. Dosjet janë në prokurori të patrajtuara, të shtyra, të shmangura. Apeli i raportuesit për Shqipërinë, Vuljanic, është i qartë dhe organet shqiptare të drejtësisë duhet të jenë të inkurajuara për të vepruar urgjentisht, tha Dr. Brokaj.

Bernd Fischer: Berisha ka frikë nga arrestimi…

Studiuesi dhe profesori i njohur amerikan, Bernd Fisher, njëherësh  dhe analist i historisë dhe çështjes shqiptare, në një intervistë ekskluzive për gazetën “DITA” tri javë para zgjedhjeve të 23 qershorit ishte i pari që përmendte publikisht mundësinë e arrestimit të Berishës pas humbjes së pushtetit. Ai e ka konsideruar demokracinë nën Berishën në Shqipëri një ‘demokraci autoritariste’ dhe arsyetonte pse e ka krahasuar vendin tonë me Ukrainën dhe Venezuelën. Ja fragmenti nga intervista e botuar në ‘DITA’ më 30 maj 2013:

– Profesor Fischer, Kryeministri aktual Sali Berisha, pas tetë vjetësh në qeverisje po kërkon me ngulm një mandat të tretë. A ka motiv për ta kërkuar këtë?

– Unë them se motivimi i Z. Berisha është që të mbesë në pushtet për aq kohë sa ai mundet. Ai gjithashtu mund të frikësohet nga arrestimi nëse humbet pushtetin. Unë mendoj gjithashtu se ai e sheh interesin e vet si interes shtetëror – pra, çfarë është e mirë për zotin Berisha, është e mirë për Shqipërinë. Unë mendoj se në një moment kjo mund të ketë qenë e vërtetë, por ajo nuk është më e vërtetë. Z. Berisha e ka dominuar Shqipërinë që prej rënies së komunizmit. Vitet e tij në pushtet kanë prodhuar një tablo të përzier. Sigurisht që ka pasur arritje të rëndësishme, duke përfshirë edhe hedhjen e themeleve për një demokraci funksionuese dhe të ekonomisë së tregut, duke zhvilluar një politikë të jashtme konstruktive në përgjithësi, dhe duke u shpërblyer me anëtarësimin e Shqipërisë në NATO. Por unë kam frikë se zoti Berisha nuk ka arritur aq sa kishte mundësi të arrinte. Mandati i tij më i fundit ka qenë tërësisht negativ dhe Shqipëria në shumë mënyra ka bërë hapa mbrapa. Ai ka vënë në rrezik demokracinë. Shprehjet e tij nacionaliste i kanë tëhuajtur fqinjët dhe miqtë. Ai nuk ka qenë i zoti t’i bëjë ballë  korrupsionit dhe krimit të organizuar që mbretërojnë në vend. Ekonomia nuk është e shëndetshme dhe gjithnjë e më shumë shqiptarët jetojnë në një gjendje të rëndë të varfërisë. Sigurisht shumë prej vështirësive ekonomike të Shqipërisë vijnë edhe për shkak të rënies ekonomike globale, por politikat e Z. Berisha nuk kanë ndihmuar për të dalë nga kjo gjendje. Shqipëria mund të ishte më pranë BE-së. Mund të kishte më shumë investime të huaja direkte. Z. Berisha fajëson opozitën për shumë nga këto, por përgjegjësia mbetet kryesisht në anën e qeverisë. Qeveria merr kredi për sukseset e Shqipërisë, dhe ajo duhet të marrë përgjegjësinë për dështimet e saj. Qeveria e ka fuqinë dhe përgjegjësinë për të vepruar me maturi dhe të kërkojë kompromis për të fituar bashkëpunimin e opozitës. Z. Berisha përderisa ka bërë shumë rrallë debate  dhe kompromise të arsyeshme në të kaluarën, që nuk duket se janë në natyrën e tij, ai ka pak gjasa ta bëjë këtë në të ardhmen.

 *Marrë me shkurtime nga shkrimet e kopertinës së sotme të DITA. Faleminderit që na lexoni