Zbulohet kontrata e shitjes së truallit nga 2 të vdekur tek vjehrri i Bashës

Zbulohen kontratat e skandalit të shitjes së truallit me firmat e pronarëve të vdekur ndaj Xhafer Isufit, vjehrrit të kreut të opozitës, Lulzim Basha. Një proces i tërë ilegal dhe paligjshmëri të dokumentuara, që tashmë janë në duart e Prokurorisë së Vlorës dhe asaj të Tiranës. Hetime edhe për të zbuluar ideatorin e këtij falsifikimi të firmave të të vdekurve, për të ngritur “Pallatin e Bashës”. Gazeta DITA publikoi e para skandalin tre ditë më parë dhe sot po publikojmë kontratën dhe dokumentet. Të vdekurit që kanë firmosur janë Elpiniqi Ndini, që ka ndërruar jetë më 21 tetor 1995 dhe Jorgji Ndini, i biri, që ka vdekur më 20 shtator 2009, kurse kontrata e shitjes është firmosur në tetor të po atij viti, ose dy muaj pas vdekjes së trashëgimtarit të truallit. Por duket se për të thjeshtuar procedurat ligjore juridike dhe zvarritjet në gjykata, dy pronarët e firmës ndërtuese i kanë rënë shkurt kësaj historie, duke i ‘ngjallur’ nënë e bir dhe firmat e tyre shmangnin një seri të tërë procedurash.

Noterja dhe familja Ndini

Zbulohet edhe emri i noteres, Mimoza Shehu, nga Tirana, që ka kryer të gjitha veprimet ligjore dhe legalizuar aktet në prezencë të 23 pjesëtarëve të familjes Ndini nga Uji i Ftohtë Vlorë, mes të cilëve edhe dy të vdekurit nënë e bir, pronarët e vërtetë të truallit dhe pronarëve të firmës së ndërtimit “G.B-A Konstruksion” të përfaqësuar edhe nga vjehrri i Lulzim Bashës. Trualli 1663 metra katrorë në bregdet, është shitur me 15 mijë lekë të reja metri dhe 21 familjarët e gjallë që kanë firmosur përfituan një shumë prej mbi 20 milionë lekësh në total. Kurse dy administratorët vijuan me veprimet e tjera duke dërguar projektin në Bashkinë e Vlorës, ku morën lejen e ndërtimit me 5 kate dhe e përfunduan me 8 kate. Kullat e përfunduara morën emrin “Kompleksi Jon”, por hetimet e muajve të fundit për shkak të efektit të shpronësimeve, ankesave të disa pronarëve të tjerë të truallit, familjes Toto në këtë rast dhe një dosje të vjetër të INUK, zbuluan edhe themelet e këtij skandali.

Çfarë ka ndodhur

Sipas dokumenteve kadastrale, rezulton se familja Ndini ka pasur truall që prej vitit 1937 në Ujin e Ftohtë Vlorë, ku gjendej edhe banesa. Por aty jetonte edhe një tjetër familje vlonjate e vendosur, ajo Toto. Pas vitit 1990, me ngritjen e Komisionit të Kthimit të Pronave, Elpiniqi Ndini dhe djali i saj Jorgji Ndini, kanë përfituar truallin që i ishte marrë nga regjimi pas 1945 dhe ku ishte ngritur shkolla 9-vjeçare. Gjithsej u janë njohur 1 mijë metra katrorë truall. Por duke qenë se deti kishte pësuar një tërheqje në vite, familja Ndini nxitoi dhe bëri kërkesë në gjykatë se harta ishte po ajo, por metrat ishin më tepër dhe kërkonte që t’i njiheshin. Me anë të një eksperti, trupi gjykues ka njohur interpretimin juridik në kundërshtim me ligjet që nuk lejonin konvertimin e detit në tokë private, pavarësisht tërheqjes. Më 1996 gjykata i ka njohur familjes Ndini edhe mbi 600 metra të tjera sipërfaqe. Me dokumentet për 1663 metra katrorë, kjo familje ka shkuar më tej në procedura e negociata për shitje. Më 21 tetor 1995, Elpiniqi Ndini ndërron jetë, kurse gjykata e ka marrë vendimin një vit më pas me kërkesë të djalit të viktimës, trashëgimtarit Jorgji Ndini.

Falsifikimet

Dhe 13 vite më pas, administratorit Xhafer Isufi dhe ortakut të tij, i është dashur që të blejë këtë truall për ndërtim pallati. Por blerja nuk ka qenë e lehtë, pasi Elpiniqi Ndini, trashëgimtarja e truallit dhe djali i saj si pasues, nuk jetonin më. Noterja Mimoza Shehu ka marrë përsipër që të legalizojë kontratën e shitjes dhe aktet, duke kërkuar pjesëtarët e fisit Ndini që ishin të gjallë për firmosje. Kjo, pasi asnjë prej tyre nuk ka pasur trashëgimi të plotë për truallin nga dy të vdekurit dhe ishte e nevojshme firma e tyre që të shmangeshin pretendimet e mëvonshme të pronësisë dhe përplasjet. Në këtë mënyrë, janë siguruar certifikata formale të Elpiniqi dhe Jorgji Ndini, sikur ishin të gjallë, janë falsifikuar firmat (autori që e ka hedhur firmën po hetohet) dhe në fund vulosur kontrata e shitjes 1663 metra katrorë x 15000 lekë metri katrorë. Fisi Ndini ka përfituar në total mbi 20 milionë lekë të reja nga shitja. Kjo procedurë i ka hapur rrugën nisjes së procedurave të lejes dhe ndërtimit në bregdet.

Hetimet

Por ankesat e familjes Toto dhe hetimet e kryera në dokumentacion nga Prokuroria, e cila ka kërkuar në fillim të muajit nëntor certifikatat e vdekjes së Elpiniqi dhe Jorgji Ndini, kanë zbuluar zanafillën e këtij megaskandali korruptiv. Gjendja Civile ka lëshuar dy certifikata vdekje, ku rezulton zyrtarisht se Elpiniqi Ndini kishte ndërruar jetë më 21 tetor 1995 dhe i biri i saj më 20 shtator 2009, 14 vite më pas. Pasi është verifikuar data e kontratës së shitjes, rezultoi 11 tetor 2009. Pra 14 vite pas vdekjes së Elpiniqit dhe 52 ditë pas vdekjes së Jorgjit, të dyshuarit kanë kryer falsifikimin e firmave të të vdekurve, duke legalizuar një akt shitje dhe kthyer të ligjshëm “Pallatin e Bashës”.

Të dyshuarit

Burime zyrtare nga Prokuroria e Vlorës thanë se tashmë panorama e kësaj dosje është mëse e qartë, që në zanafillë. Dokumentacioni i mëparshëm i është bashkangjitur dosjes që ka referuar ministri i Brendshëm në cilësinë e kreut të Task-Forcës, me 49 faqe dhe të tjera materiale shtesë, ku shpjegohen të gjitha parregullsitë dhe përgjegjësitë. Për rastin konkret, pritet të kryhen shoqërimet nga grupi hetimor i noteres Mimoza Shehu që ka bërë kontratën e shitjes, e cila do japë shpjegimet se si është kryer hedhja e firmave, kush ka firmosur në vend të dy të vdekurve dhe nëse ka qenë ajo në dijeni dhe e ka kryer procesin e vetëdijshme. Do të shoqërohen të 21 personat e gjallë të fisit Ndini që kanë hedhur firmat, për të dhënë shpjegime se kush ka firmosur në emër të paraardhësve të tyre të pajetë. Pritet shoqërimi edhe i Xhafer Isufit, vjehrrit të Bashës dhe ortakut të tij në firmën e ndërtimit, për të dëshmuar nëse këto veprime i kanë kryer ata me iniciativën e tyre. Pra këta 24 persona do të japin emrin e autorit të këtij falsifikimi, ose të gjithë do të arrestohen për “moskallëzim krimi”, “shpërdorim detyre”, “falsifikim”. Ka vetëm dy mundësi. Ose noterja ka marrë përsipër gjithçka, ose pronarët e firmës e kanë detyruar të kryej këto akte ilegale. Në kontratë janë edhe firmat e Isufit dhe ortakut të tij, si përfaqësues të “G.B-A Konstruksion”.

Dosja tjetër

Dosja tjetër është ajo e referuar nga Ministria e Brendshme. Si është kthyer deti në tokë private me vendim gjykate, mbi 600 metra, si është përvetësuar përsëri deri në 40 metra det duke e mbushur me inerte nga firma e ndërtimit, si është siguruar leja e ndërtimit me falsifikime aktesh, si është bërë regjistrimi i truallit, apartamenteve, kullave, si është shmangur INUK, si ka neglizhuar prokuroria në hetimet e mëparshme dhe të tjera. Gjithashtu përgjegjësi bie mbi Inspektoriatin Ndërtimor të bashkisë Vlorë. Mendohet se me 24 personat e mësipërm të kontratës së shitjes false me emrat e të vdekurve, pritet t’i bashkohen edhe 20 zyrtarë dhe ish-zyrtarë për dosjen tjetër.

INUK nis shembjen e ‘Pallatit të Bashës’, xhenierët po vendosin tritolin

Nuk ka më asnjë dyshim për procedurat e shembjes së “Kompleksit Jon” në Ujin e Ftohtë Vlorë, pas vendimit të Qeverisë që njohu procesin e shpronësimeve për mbi 8 mijë metra katrorë nëse do provohet ligjshmëria e pronësisë. INUK po rrafshon prej tre ditësh objektet përreth dy kullave 8 katëshe të njohura si pallati i vjehrrit të Lulzim Bashës, ku ka shembur parkimin, pishinat, murin rrethues, ndërsa dje vijoi me aksesorët e objektit, si kolonat mbështetëse të dyqaneve dhe trotuarin, me qëllim lehtësimin e procesit. Banorët boshatisën përfundimisht dje hyrjet, duke hequr orenditë dhe pajisjet, ku njihen 13 familje si pronare apartamentesh. Ata kanë dorëzuar edhe dokumentacionin për apartamentet e tyre, kontratat e blerjes dhe faturat e pagesave. Prej tre ditësh aty inspektojnë edhe specialistët e Xhenios, ata të sektorit Antiminë, autoritete vendore dhe qendrore, për planin e masave. Ditën e djeshme mësohet se ka nisur edhe vendosja e materialeve dhe pajisjeve për sistemimin e lëndës plasëse. Po kështu gjatë gjithë ditës së sotme mësohet se specialistët do vijojnë të vendosin eksploziv në themele dhe kolonat e pallatit. Nuk konfirmohet e saktë sasia që do përdoret për ta rrafshuar, por burime policore i thanë gazetës së për një kullë të tillë do të duhet mbi 300 kg eksploziv për rrafshim të plotë dhe të suksesshëm. Pothuajse e njëjta sasi u përdor edhe për pallatin 7 katësh që ndodhej në Skelë. Eksplozivi që do jetë amonit ose C4, do lidhet me kolonat dhe nëpërmjet pajisjeve do të lidhet me kutinë e komandimit nga ku do shtypet butoni i shpërthimit. Policia e Vlorës ka siguruar objektin për të shmangur incidentet, ndërsa banorët kanë përfituar të shkulin edhe dyert e dritaret, prizat dhe kabllot. Nuk është përcaktuar ende dita e shpërthimit, por kryebashkiaku Gjika ka kërkuar ndihmën e INUK në datën 2 dhjetor. Afati 5 ditor i lënë familjeve skadon ditën e sotme. Burime zyrtare thanë për gazetën se rrafshimi i objektit do të bëhet midis kësaj të diele dhe javës së ardhshme. Procesi i vendosjes së eksplozivit nga xheniot kërkon një afat 48-72 orë në varësi të vështirësive dhe sasisë që do përdoret për eksplodim.

* * *

“Flet jastëku i natës”

Koment

Në krahinën e Myzeqesë ka një shprehje që përdoret shpesh për rolin orientues dhe shpesh përcaktues të bashkëshortes mbi bashkëshortin, veçanërisht kur bashkëshorti është ofiqar. “Flet jastëku i natës”, – është shprehja, që nënkupton orientimin e bisedave dhe vendimeve të ofiqarit gjatë ditës në zyrë, si rrjedhojë e ndikimit të bisedave dhe vendimeve të ofiqarit gjatë natës në shtëpi. Shprehja duket se karakterizon mirëfilli ndikimin që Lulzim Basha ka pasur nga rrethi i njerëzve të bashkëshortes së tij, të cilët nga ana e tyre kanë avancuar në 8 vitet e fundit duke “lulëzuar në biznese”. Hetimi mbi njërin prej këtyre bizneseve, mbi pallatin e ndërtuar në Vlorë, me siguri që ka shkaktuar tronditje në qerthullin e familjes Basha. Vjehrri i Bashës deri më tani rezulton se është implikuar në një skemë të nënshkrimit të kontratës me disa pronarë , ku dy prej pronarëve që kanë nënshkruar shitjen tek vjehrri, në fakt nuk ekzistonin, kishin vdekur me kohë. Ky është një detaj tejet i rëndësishëm, pasi dosja voluminoze hetimore mbi dokumentacionin e pallatit në Vlorë, ka zbuluar se familjet e këtyre pronarëve e kanë siguruar pronën në vitin 1996 nëpërmjet një vendimi gjykate që nuk po gjendet askund. Ky vendim gjykate, i dyshuar si i falsifikuar më pas është regjistruar në hipotekë në vitin 2009, pak para se vjehrri i Bashës, Xhefer Isufi të nënshkruante dhe kontratën me pronarët. Ky vendim gjykate i dyshuar si i falsifikuar, është dhe problemi më serioz për vjehrrin e kreut të PD-së. Prokuroria shumë shpejt do thërrasë gjykatësin që ka emrin dhe do verifikojë kartelat e protokollit të gjykatës. Nëse rezulton i falsifikuar ky vendim, atëherë prokurori do shkojë tek pronarët nga Vlora(ata të gjallët) dhe do i pyesë se ku e kanë siguruar këtë dokument. Dëshmia e këtyre pronarëve mund të zbërthejë dhe skemën e vërtetë, nëse ata thonë: “Po ja, erdhi “X”-i e na tha të firmosnim se për të tjerat i merrte ai përsipër në hipotekë”. Hetuesit dyshojnë se kjo është skema që ka funksionuar dhe nëse dyshimet rezultojnë të vërteta atëherë “X”-i me shumë gjasa quhet Xhafer Isufi. E thënë shkurt, familjarë të afërt të kreut të opozitës mund ta gjejnë veten të implikuar në një skemë zhvatje, të paskrupullt, si grabitës dhe falsifikatorë ordinerë, që pasi zhvatin nisin e ndërtojnë sarajet e tyre. Nëse hetimet do zbardhin këtë pistë që e dyshojnë fort prokurorët, atëherë për Bashën bëhet e qartë se si kreu i opozitës do humbë armën e tij më të fortë: Kartën Morale. Për çfarë mund t’i kërkojë llogari Lulzim Basha qeveritarëve, në kushtet kur familjarë të tij të afërt janë kapur gafil si hajdutë, grabitës dhe falsifikatorë ordinerë? A mundet dot Basha ditën me diell të luajë kartën morale? “Flet jastëku i natës”, – thotë shprehja, por kur jastëku duket sheshit edhe ditën me diell, nis e flet dynjaja dhe prokuroria.