A është Fullani “Sanaderi shqiptar”?

Dje guvernatori i Bankës Qendrore Ardian Fullani kaloi natën e parë në një mjedis paraburgimi në Drejtorinë e Policisë së Tiranës.

Me të gdhirë dita, shumë ngjarje “bankare” pasuan njëra-tjetrën, ai ishte ende në detyrë, dhe njerëzit e mediat, me kureshtje për të mësuar diçka më shumë, ndoqën çdo deklaratë, qëndrim, takim politik që bëri vaki lidhur me temën kryesore me emrin Banka e Shqipërisë.

Padyshim, tërhoqi vëmendje të posaçme aktiviteti tejet i ngjeshur i kryeministrit Edi Rama, i sapokthyer nga samiti i NATO-s në Uells: Takim që herët në mëngjes me aleatin dhe kryetarin Kuvendit Ilir Meta, kontakte e biseda me “partnerë dhe ekspertë ndërkombëtarë pranë qeverisë”, siç njofton deklarata për shtyp e selisë rozë, pa harruar edhe takimin me përfaqësuesit e FMN-së.

Gjithë linja e aksionit qeveritar dje ka qenë tranzicioni sa më normal (në një situatë kaq anormale) dhe mirëfunksionimi i Bankës së Shqipërisë, brenda parametrave të pavarësisë së saj institucionale.

Megjithë këto lëvizje, ajo që mbetet e pandryshuar nga dje në sot, është pyetja jonë: Kush e “trimëroi” organin e akuzës që vendosi të përshpejtojë etapat deri tani disi të ngeshme të hetimit, dhe të kërkojë nga gjykata firmosjen e urdhrit të arrestit?

Dje hodhëm tre opsione, por duket se e vërteta është më pranë opsionit të tretë: Vendimi është marrë nën presionin e jashtëm.

Zgjedhja e ditës kur kryeministri ishte i zënë me një agjendë madhore jashtë vendit, (thuhet se edhe kryeprokurori Llalla nuk ndodhej në Tiranë), nuk është e rastësishme.

Ashtu siç nuk ishte e tillë vizita në Tiranë dhe takimi me kreun e PD-së Basha, e një deputeti gjerman të partisë së kancelares Merkel, CDU.

Duke lënë mënjanë ndërkaq, thirrjet e vazhdueshme ndërkombëtare në vite, për luftë konkrete kundër korrupsionit, le të kujtojmë vetëm kërkesën e prerë të Merkelit ndaj kryeministrit shqiptar, “dekonspiruar” nga vetë Rama: “Keni korrupsion shumë të lartë dhe gjyqësor tejet problematik. Pa i luftuar ato, është e kotë të kërkoni investime serioze dhe mbështetje për anëtarësim në BE”.

Duhet thënë se në pohimin e paragrafit të mësipërm nuk ka asgjë “të keqe”. Dora-dorës që Shqipëria integrohet në struktura jetike ndërkombëtare, serioziteti me të cilin na trajtojnë, është baraz me seriozitetin që ne i japim vetes.

Nuk është më çudi sot, që Shqipëria si anëtare e NATO-s, i kërkon Aleancës të hapë një korridor partneriteti të veçantë për Kosovën, apo të qortojë Maqedoninë për trajtimin e shqiptarëve atje.

Nga ana tjetër, udha e vendeve të reja aspiruese për t’u integruar në BE është plot me shembuj të tillë. Kroacia, shembulli më i freskët, nuk ngurroi të burgosë kryeministrin e vet Ivo Sanader, i akuzuar për korrupsion dhe ryshfete. Dhe Sanader përtej kartelës së vet penale, ishte ndër arkitektët e hapave integrues të vendit të tij.

A është guvernatori Fullani, Ivo Sanaderi ynë? Sipas burimeve të gazetës, ai del sot, ditën e diel në orën 11 para gjykatës, pas natës së dytë në qeli. Por sido që të shkojë odiseja gjyqësore e porsafilluar, e sigurtë është se ai dhe Banka Qëndrore këtej e tutje do jenë dy kapituj të ndryshëm. Këshilli Mbikëqyrës e shkarkoi dje në darkë dhe tani ai është ish. Klasa politike shqiptare, me ca siklete e dha viston që ngërçi i BSH-së të zgjidhet, paçka se kreu i opozitës Basha, nxitoi të luajë prapë “politikanësh” dhe të anatemojë mazhorancën se gjithçka e bën për të shtënë në dorë Bankën e Shqipërisë.

I vetmi që nuk po ndihet, është deputeti Sali Berisha. Ish kryeministri që kishte paralajmëruar kataklizmë financiare nëse prekej guvernatori, postoi dje foto buzë plazhit me kalimtarë e dasmorë. Këta të fundit, duket se ja kanë marrë dorën dhe dinë ku ta hasin, ndaj nxitojnë të nxjerrin foto si me një monument shëtitës që duhet ta shfrytëzojnë për koleksionin e tyre fotografik sa kanë mundësi. Edhe ca ditë, sa të mbajnë temperaturat, e gjejnë “të paraburgosur” në rërën e Lalzit.