BASHA SI BUMERANG NË KOKËN E PROTESTËS

Do të protestoj edhe unë në 8 dhjetor kundër korrupsionit 200 milionësh të rrugës Durrës-Kukës! Edhe unë do protestoj kundër krimit të përbindshëm dhe të pandëshkuar të 21 janarit! Do protestoj edhe unë për faljen tradhtisht të një pjese të ujërave detare Greqisë! Këto janë disa nga ironitë e shpërndara nëpër internet lidhur me protestën e sotme të PD. Dhe të gjitha shigjetojnë liderin e protestës Lulzim Basha. Sepse në të gjitha këto korrupsione apo krime, ai ka qenë protagonist kryesor. Është ky një rast i rrallë në historinë e politikës kur një lider që organizon një proteste është bumerang i kësaj proteste.

***

Kur figura në lidershipin e PD si Eduard Selami, apo dhe Arben Imami vetëm dje, pohojnë se opozita nuk ngjall shpresë, kanë parasysh pikërisht këtë kundërthënie, këtë konflikt të së kaluarës së afërt të Bashës me idealet që pretendon të ndjekë. Basha ankohet kundër asaj që e quan arrogancë e qeverisë por nuk mund të fshehë dot faktin e arrogancës ekstreme, mishërim i së cilës ai vetë është. Arroganca nuk është gjë tjetër veçse besimi i verbër se njerëzit do t’i nënshtrohen vullnetit apo kapriçiove të tua. Dhe është arrogancë të besosh, si Basha, që shqiptarët do të të ndjekin pas në protestë “kundër korrupsionit” kur jo vetëm je i diskredituar në një super-skandal korruptiv prej qindra milionë eurosh, por edhe nuk je në gjendje të justifikosh pasurinë tënde personale. Dhe flet për luftë kundër “diktaturës së padrejtësisë” t’i që ju shmange gjykimit me lloj lloj trukesh dhe procedurash, t’i që je vetë produkt i kësaj diktature të padrejtësisë?! Është arrogancë të shpallësh se “gjithë populli shqiptar” po të ndjek në luftën për dekriminalizimin kur je vetë i përfshirë në krimin më të rëndë të tranzicionit, atë të vrasjes nga qeveria të protestuesve të pafajshëm në 21 janar. Por arroganca e lidershipit të PD kulmoi dje me kërcënimet e Berishës për revolucionin që sot do përmbysë qeverinë. Një arrogancë që cilësimin “demokratik” për revolucionin, e përdor vetëm si gjethe fiku për të maskuar dhunën antidemokratike. Një provë se shpresa e vetme e kësaj opozite që nuk ngjall shpresë, nuk është demokracia por dhuna dhe incidentet e dhunshme destabilizuese. Një zanat naziskin që Berisha ka treguar në këto 25 vjet se e njeh shumë mirë.

***

“Gjithë populli në protestë”! – ngjiret Basha. Po a ka gënjeshtër më totalitare se kjo?! Edhe vetë regjimi totalitar i diktaturës së proletariatit nuk pretendonte se i merrte 100 për qind të votave apo të mbështetjes, megjithëse pushtetin e vet e quante “popullor”. Ndaj e zhvillonte dhe luftën e klasave. Një lidership i përgjegjshëm dhe koshient për pluralitetin e pikëpamjeve dhe organizimeve në një shtet demokratik liberal, nuk mund ta pretendojë që t’i shkojë pas i gjithë populli. Por Basha dhe Berisha e pretendojnë jo vetëm sepse nuk janë çliruar kurrë nga mendësitë totalitare, por edhe pse janë arrogantë dhe të papërgjegjshëm. Dhe po të mos qenë të tillë nuk do firmosnin, pa e vrarë shumë mendjen, faljen Greqisë të një pjese të ujërave detare të Atdheut.

***

Protesta e sotme e PD nuk është asgjë tjetër veçse vazhdim i strategjisë së lidershipit të saj të shpallur që ditën që humbi pushtetin: Rrëzimi sa më i shpejtë dhe me çdo kusht (madje duke aluduar edhe për dhunë dhe revolucion) i qeverisë Rama. Një përmbysje që Basha dhe lidershipi i PD e kërkon ankthshëm jo sepse merakoset për korrupsionin, taksat e larta, papunësinë apo “gremisjen e Shqipërisë”. E kërkon për krejt tjetër gjë. E kërkon që të obstruktojë dhe të shtyjë për në kalendat greke atë që e tremb më shumë, reformën në drejtësi që po afron dhe që, për shkak të mbështetjes së fuqishme që kjo reformë po merr nga ndërkombëtarët, e ndjen që nuk e frenon dot. “Antikomunizmi”, si lajtmotiv i protestës, është, ndër të tjera, vetëm maska e vjetëruar, streha e fundit e këtyre sharlatanëve të korruptuar dhe të diskredituar.

***

Asnjë qeveri nuk është e imunizuar nga korrupsioni. Përfshi edhe qeverinë Rama. Por është e pamundur të gjesh, duke vënë në punë edhe fantazinë e opozitës, në bilancin e kësaj qeverisje 2 vjeçare superskandale si ai i Gërdecit, i rrugës Durrës-Kukës apo si krimi i 21 janarit. Dikush mund të thotë se Gërdeci apo rruga Durrës-Kukës janë histori të kaluara. Një gjë e tillë është e pavërtetë sepse drejtësia nuk ka folur. Të korruptuarit që vodhën dje janë akoma në kokën e politikës dhe nuk mund të mos vjedhin edhe nesër në kokë të qeverisë. Aq më tepër kur nuk kanë vuajtur as edhe ndëshkimin më të vogël nga drejtësia. Ndaj nuk ka më keq se kur demokracia, e lënë pa drejtësi, keqpërdoret me sukses për të risjellë në pushtet një klan politik të korruptuar. Shqiptarët e panë sesi klani politik i Berishës, u korruptua edhe më rëndë gjatë qeverisjes së dytë. Kuptohet lehtë se ç’mund të ndodhte për herë të tretë. Do të qe “e treta e vërteta” e diktaturës së korrupsionit që do ta mposhtte përfundimisht Shqipërinë.

***

Prandaj edhe zgjedhjet e parakohshme, që kërkon Basha, do i ofronin shqiptarëve ose përsëri qeverinë që kanë sot ose, në rastin më të keq, qeverisjen e Bashës dhe Berishës që mbetet, e provuar me fakte, më e korruptuara e tranzicionit. Ndaj detyrohemi të përsërisim se pa kryerjen e reformës në drejtësi, pa spastrimin e politikës prej të kriminalizuarve dhe të korruptuarve (spastrim që mund ta bëjë vetëm një pushtet i pavarur drejtësie), çdo rotacion pushteti nuk mund të sjellë asnjë përmirësim. Madje, në momentet e tanishme, mund ta kalonte pushtetin në duar shumë më të korruptuara dhe të kriminalizuara. Si ato të Bashës dhe Berishës. Shumica e shqiptarëve e di këtë. Prandaj Basha është pika më e dobët, bumerangu i protestës së një lidershipi të pashpresë.