106 familje të ish të përndjekurve që marrin këstin e parë (LISTA)

Gazeta Dita zbardh emrat e 106 ish-të përndjekur që përfitojnë këstin e parë të dëmshpërblimit. Shuma e përcaktuar në bazë të VKM 501 për këta emra tashmë është depozituar në Thesarin e shtetit dhe duke filluar që nga dita e hënë do të bëhet kalimi i parave në llogaritë bankare që ata kanë plotësuar në dokumentacion. Kjo është lista e dytë që brenda një muaji merr këstin e parë të dëmshpërblimit. Por Ministria e Financave bën të qartë se pagesat do të vijojnë për këtë shtresë të shoqërisë, ndaj kërkon prej tyre plotësimin e duhur të dokumentacionit, pasi sipas specialistëve në këtë dikaster, shumë emra kanë mbetur të paplotësuar, duke mbetur një shkak i mos kalimit të pagesave.

Cilat janë dokumentet që duhen për të përfituar dëmshpërblimin

Çdo ish-i dënuar apo trashëgimtar ligjor, që është listuar në një V.K.M. për dëmshpërblimin e ish- të përndjekurve politikë,  duhet të postojë dokumentacionin e kërkuar në një nga pikat e Postës Shqiptare, të çdo rrethi, në adresën: “MINISTRIA E FINANCAVE, DREJTORIA E PAGESAVE DHE DËMSHPËRBLIMEVE”. Sipas rasteve dhe radhës së trashëgimisë, ja cilat janë dokumentet e nevojshme për të përfituar dëmshpërblim. Për ish-të dënuarit që jetojnë; dokument identifikimi, numër llogarie aktive në një bankë të nivelit të dytë. Për trashëgimtarët e ish-të përndjekurve që nuk jetojnë më; akt trashëgimie,  çertifikatë vdekje të të dënuarit, çertifikatë trungu të të dënuarit, numër llogarie bankare aktive për çdo përfitues ose prokurë, dokument identifikimi për përfituesit. Nëse një ose disa nga trashëgimtarët e radhës së parë nuk jetojnë më, atëherë njëri nga trashëgimtarët në marrëveshje, do të postojë këto dokumente; akt noterial trashëgimie për çdo trashëgimtar të rradhës së parë që nuk jeton më, çertifikatë vdekje për çdo trashëgimtar të radhës së parë që nuk jeton më, çertifikatë të trungut familjar të çdo trashëgimtari të radhës së parë që nuk jeton më, numër llogarie aktive bankare për të gjithë trashëgimtarët  e trashëgimtarëve të radhës së parë që nuk jetojnë më,  fotokopje të Kartës së Identitetit apo Pasaportës të çdo trashëgimtari që vjen nga trashëgimtarët e radhës së parë, që i lind e drejta për dëmshpërblim. Duhet qartësuar fakti se në rastet kur ish- i përndjekuri nuk jeton më, një dosje quhet e rregullt dhe e gatshme për t’u paguar, vetëm atëherë kur të gjithë trashëgimtarët pa përjashtim, do të kenë dorëzuar (postuar) dokumentacionin e përmendur më lart për të gjitha rastet e trashëgimisë . Në të kundërt, askush nuk mund të paguhet i veçantë, derisa i gjithë dokumentacioni i dosjes të jetë i plotë për të gjithë. Kjo listë përmban numrin e dosjes dhe emrin e ish-të dënuarit politik, emrat e trashëgimtarit ose trashëgimtarëve ligjorë, dokumentacionin që përmban dosja, si dhe dokumentacionin i cili i mungon dosjes përkatëse, duke i klasifikuar dosjet si të gatshme për t’u paguar ose jo.