Fatos Klosi: Berisha e Nano që njoh unë

A ka dosje të Berishës të kohës së diktaturës dhe a u ka shërbyer agjenturave të huaja kryeministri i sotëm i vendit? Klosi përforcon dyshimet e bëra publike dhe shton pikëpyetje të tjera. Në këtë kontekst ai sqaron pse u bë kontrabanda e naftës me serbët, pse u zhduk Remzi Hoxha, rolin e Berishës dhe të PD-së në trazirat e ’97-s dhe në grushtin e shtetit të 98-s, në vrasjen e Azem Hajdarit etj. Ndërkaq ai tregon pse Fatos Nano dhe Sali Berisha kërkonin “kokën” e Fatos Klosit

Biseda me Prof. Fatos Klosin është interesante. Lexuesi i vëmendshëm do të kuptojë menjëherë misterin që fshihet pas disa fakteve të thjeshta, apo koincidencave, që sipas Klosit nuk janë aspak koincidenca. E tillë u zhvillua dhe kjo intervistë me DITA-n. A ka dosje të Berishës të kohës së diktaturës dhe a u ka shërbyer agjenturave të huaja kryeministri i sotëm i vendit? Klosi përforcon dyshimet e bëra publike dhe shton pikëpyetje të tjera. Në këtë kontekst ai sqaron pse u bë kontrabanda e naftës me serbët, pse u zhduk Remzi Hoxha, rolin e Berishës dhe të PD-së në trazirat e ’97-s dhe në grushtin e shtetit të 98-s, në vrasjen e Azem Hajdarit etj. Ndërkaq ai tregon pse Fatos Nano dhe Sali Berisha kërkonin “kokën” e Fatos Klosit.

– Zoti Klosi, flitet se ka një dosje të Sali Berishës në kohën e diktaturës. Kur ishit kreu i Shërbimit Informativ a jeni bërë kurioz të kontrolloni, a keni pyetur dhe a ka diçka rreth historisë së para viteve ’90 të tij që shqiptarët duhet ta dinë?

– Natyrisht , Ju nuk duhet të prisni nga unë të them a ka patur ose jo dosje. Ato dosje nuk i kam konsideruar kurrë si pronën time, që të mund të them se ç’përmbajnë ato. Unë jam i mendimit që shqiptarët kanë parë, dëgjuar e dinë aq shumë për Sali Berishën pas viteve ’90, sa që s’besoj se kanë nevojë t’i shtojnë diçka atyre nga periudhat e mëparshme. Historia e 20 vjetëve të fundit na ka dhënë shumë material  në këtë aspekt, “koincidenca” të shumta, që sigurisht për këtë arsye s’mund të jenë thjeshtë “koincidenca”.

– Ish-presidenti Bullatoviç i Malit të Zi është shprehur se ka bërë marrëveshje me Berishën për thyerjen e embargos për naftë në favor të Millosheviçit në Serbi. A keni hetuar për këtë në SHISH kur erdhët në detyrë dhe a ka dosje që nuk është bërë publike, pasi veprimtaria kish cenuar integritetin e vendit?

– Edhe në këtë rast do t’ju përgjigjem në të njëjtën mënyrë. Kur Bullatoviçi ka bërë një deklaratë të tillë pse duhet pyetur, a është hetuar dhe nëse ka dosje apo jo. Pastaj s’besoj se e keni harruar që në atë periudhë të gjitha rrugët e Shqipërisë mbanin era naftë. Besoni se për një aktivitet me përmasa të tilla, mund të investohej pa bërë një marrëveshje paraprake? Dhe në fund po ju kujtoj trajtimin grotesk që ju bë problemit kur u tha se embargoja u thye për motive patriotike, “që kosovarët të mos vuanin nga të ftohtit”. E kam dëgjuar këtë version atëherë me një mikun tim kosovar, i cili qeshi duke thënë : “I doli huq, 90% e kosovarëve ngrohen me dru”.

– Çfarë dini për 2 Prillin 1991, pasi është folur për aktivitete të agjenturave të huaja dhe për një nxitje prej tyre të trazirave dhe vrasjeve? A ka patur ish-Sigurimi informacione e materiale me prova, po SHIK dhe më pas SHISH-i juaj?

– Nuk kam prapë ndërmend të implikoj SHIK-un në përgjigjen time. Do të kujtoj për këtë qëllim, opinionet e Z. Nafiz Bezhani, një burri dhe avokati të nderuar, që në procesin e ngjarjeve të 2 prillit ka qenë avokat i familjeve të të rinjve, që u sakrifikuan në atë ngjarje. Avokati  ka bërë një punë të madhe investiguese në atë periudhë, ka kërkuar të bënte dhe më shumë, por është penguar. Të gjitha këto ai i ka shkruar në librin e tij “Procesi i Shekullit”, ku shpreh bindjen se në ngjarje kanë gisht serbët dhe ata që përfituan prej saj.

–  Pse u rrëmbye Remzi Hoxha ? Gjatë hetimeve që keni kryer, pasi SHISH që ju drejtonit zbardhi këtë zhdukje të biznesmenit, a ka dalë ndonjë material që implikonte ish-presidentin Berisha? A kishte prova Remzi Hoxha se Berisha ishte agjent i UDB-së?

– Tashmë është mbyllur një proces gjyqësor për këtë problem dhe janë dhënë verdikte , qoftë dhe të cunguara për çështjen. Fakti që të gjithë të implikuarit në këtë problem “u arratisën” atëherë, me ndihmën Shërbimit, tregon se faji shkonte “shumë lart”. Kurrëkush akoma nuk e ka thënë zyrtarisht përse u ekzekutua Remzi Hoxha, versione kemi dëgjuar plot. Më i mundshmi është versioni që ka ardhur nga miqtë e tij në Maqedoni, i cili e lidh ngjarjen me një kasetë ku ishte regjistruar një takim i Gazidedes me Arkanin e famëkeq të Serbisë, që kish ndodhur diku në kufirin shqiptaro-maqedonas.

– Pse Berisha bashkë me Fatos Nanon kërkonin “kokën” tuaj më 2002? Çfarë fshihej në të vërtetë pas kërkesës së tij për t’ju hequr dhe burgosur juve? Çfarë i zbuluat Berishës që ai ju qep juve dhe ishte gati t’u eliminonte?

-“Kokën” time e kërkoi i pari Fatos Nano, që ishte Kryeministër i vendit. Berishës, natyrisht i pëlqeu shumë kjo nismë, në gjuhën e popullit thuhet “i doli në shteg “. Natyrisht, Berisha që të nesërmen e emërimit tim në SHIK filloi sulmin kundër meje, bile dhe kundër  të parëve të mi, nëpërmjet paçavures “55” dhe vazhdoi deri në Komisionin hetimor, ku foli mbi dy orë kundra meje. Jo se unë kisha zbuluar diçka, Berisha ishte “i zbuluar” nga e gjithë veprimtaria e tij e deriatëhershme , nuk ishte kjo arsyeja, nuk e kishte personalisht me mua. Ai nëpërmjet goditjes së SHIK-ut që unë drejtoja u përpoq të përfitonte politikisht, me shpresën se do të përçante socialistët. Ishte Z. Nano që e ndihmoi në këtë përpjekje.

– A ka Berisha dorë në vrasjen e Azem Hajdarit dhe trazirat e 1998-s? Po në ato të 1997-s? A mund të dalin ndonjë ditë ato dokumente, në se ekzistojnë?

–  Unë nuk kam ndërmend të dal mbi Gjykatën, që e gjykoi çështjen. Por dua të theksoj një kriter të artë : “shih kush përfitoi”, dhe gjithashtu, të kujtoj dy fakte : ngutjen e deklaratave pak minuta pas ngjarjes dhe deklaratat se procesi do të rihapej menjëherë pasi të rimerrej pushteti. Po mbyllet viti i tetë pas rimarrjes së pushtetit dhe s’është dëgjuar qoftë dhe një herë të kujtohet ajo deklaratë.

Për sa i takon trazirave që pasuan, ato u programuan dhe u zbatuan nga zyrat e PD-së. Përsa i takon dokumenteve që ju prisni, do të zhgënjeheni, ato u sabotuan që në atë kohë nga Z. Nano dhe u mbyllën përfundimisht me idilin e tyre të 2002-shit. Ca më pak tani e më vonë, pasi i kanë patur nëpër duar për 8 vite të tëra.

Për sa i takon trazirave të 1997-s kam bindjen se situata degjeneroi në kaos, pas dhënies së urdhrit më antikombëtar të mundshëm, për hapjen e depove të armatimit të ushtrisë.

– Çfarë e lidh Kryeministrin e sotëm me miqësitë me biznesmenë dhe politikanë serbë?

– Me biznesmenët dhe politikanët serbë motivi i lidhjeve janë interesat, natyrisht, jo ato shtetërore apo kombëtare.

– Pse nuk është hetuar asnjëherë Berisha për vitin 1994 për embargon, 1995 për Remzi Hoxhën, 1996 për Piramidat, 1997 për trazirat, 1998 për grushtin e shtetit të armatosur dhe vrasjen e Azem Hajdarit? Në se ka pasur nismë për hetimet, kush i ka penguar?

– Pengesë është bërë sigurisht politika, e të dy anëve. Berisha shpalli amnistinë duke mbuluar gjithçka që kish ndodhur para saj, me çështjen Hajdari nuk guxoi të merrej. Nga ana tjetër, asnjë nga ngjarjet që përmendni ju, nuk u hetua seriozisht dhe këtu qëndron papërgjegjshmëria skandaloze e Fatos Nanos, që në dukje “nuk donte telashe” por që në të vërtetë e kish ngrënë “lugën e çorbës së prishur”.

Nisma ka patur, por ata që i merrnin, gjithmonë janë lënë vetëm apo më keq janë sulmuar, në një mënyrë apo në një tjetër, nga politika e të dyja krahëve.

Siç e shihni në përgjigjet e mija unë nuk kam folur si ish-Drejtori i SHIK-ut por si një qytetar i këtij vëndi, që ka qënë gjithnjë i interesuar se ç’ndodhte në vendin e tij.