BALETI I BYROSË

“Silleni ligjin për Byronë e Hetimit, pse e fshihni, pse e mbani në sirtarë, frikacakë? Kush ju pengon, hë?”

Nuk ka kaluar më shumë se një javë, kur “presioni” i mësipërm i Lulzim Bashës ndaj mazhorancës së majtë, për një projektligj që në fakt ishte premtim elektoral i PS-së, ishte përgatitur dhe dakordësuar dhe thjesht pritej një frymë konsensusi që do t’i jepte Byrosë Kombëtare të Hetimit, që në krye të herës, një bazë legjitimiteti të pakundërshtueshme, i solli “frytet”. Aq shpejt, sa dhe vetë PD u gjet pa mendje.

Qeveria kaloi draftin në fjalë dhe do ta çojë në Kuvend. Dhe në një reagim që e çon gjendjen qesharake ku ndodhet opozita, në skaje të paimagjinueshme, Basha e Berisha deklaruan se nuk është ky varianti që ata kishin dakordësuar me ndërkombëtarët. Për hir të së vërtetës, kur bënin “presion”, ata nuk folën për kurrfarë detajesh e gustosh të tyret për Byronë. Por është e qartë se gjithë kleçka ishte tek bindja e PD-së se brenda mazhorancës kishte mospërputhje qëndrimesh për mënyrën sesi do ndërtohej e si do funksiononte Byroja e Hetimit.

Kjo nuk ndodhi, dhe Lulzim Basha vërtetoi atë që të gjithë e dinë, se ai nuk është kryetar i PD-së. Duke hedhur poshtë Byronë që e kërkonte me kaq zell, tashmë (dhe me sa vonesë) në të njëjtën gjatësi vale me shefin e vërtetë të partisë, Basha u hapi sytë edhe përfaqësuesve ndërkombëtarë në Tiranë.

Le të kujtojmë këtu se duke mos pranuar më t’i bien rrotull, para pak ditësh ambasadorët Lu e Vlahutin e më pas eurodeputeti Kukan, u takuan direkt me deputetin e thjeshtë shqiptar Berisha, si për temën e dekriminalizimit, edhe reformën në drejtësi. Kjo do të thotë, në universe të tjera, që për disa probleme të rëndësishme që lidhen me kryetarin e PS-së, sot diplomatët kyçë në Tiranë të takohen me Fatos Nanon.

Për t’u kthyer te Byroja Kombëtare e Hetimit, ministri i Brendshëm sqaroi dje se kjo njësi do ta varet paralelisht nga qeveria dhe prokurori i përgjithshëm. Duket një zhvendosje e dukshme nga ideja fillestare. Ndërkohë, asnjë projekt konkret nuk ka shpalosur PD, edhe gjatë orëve kur afshi i Byrosë e shtynte të thërriste publikisht, “silleni, silleni Byronë”.

Ky karagjozllëk, ky balet prej fëmijësh kopshti ka nervozuar edhe të qetin Eduard Selami, deputetin ish kryetar që u kthye në PD pas shumë vitesh ekzil dhe pas një paqeje (termat e së cilës ende nuk i dimë), me Sali Berishën. I cili ka kërkuar seriozitet dhe informacion të ndarë me kolegët në parti, që SHQUP-i të mos detyrohet të gëlltisë pilula të tilla. Edhe të tjerë deputetë kanë shprehur acarim me këtë gjendje. Në mos për gjë tjetër, ky balet Berisha-Basha me Byronë, paska prodhuar edhe diçka pozitive në atë parti./DITA