Mulosmani: Për Fatmira Hajdarin dhe të tjerët

Nga Mira Kazhani

Kam dashur gjithmonë që si gazetare të mundja të intervistoja Jaho Salihi Mulosmanin. Një kuriozitet i pashpjegueshëm ndaj këtij profili. Për herë të parë e kontaktova dy vite më parë, por përgjigja e tij ishte nje lajm i keq dhe një i mirë. Lajmi i keq ishte refuzimi. Por lajmi i mire ishte një premtim: Nëse do të vendos që të flas një ditë, do t’ju lajmëroj vetë. Jam tropojan që e mbaj fjalën e dhënë, më pat thënë ai. Para një jave u gjenda para nje telefonate e cila më çoi pas 3 ditësh në burgun e Burrelit. Jaho Salihi vjen i veshur me kostum të zi dhe një këmishë ngjyrë pink i shoqëruar nga dy efektivë të cilët thjesht bënin detyrën teksa e mbanin për krahu por që dukshëm silleshin me respekt ndaj tij. Ai ka fituar gjithë simpatinë e burgut. E përshkruajnë si të disiplinuar, të qetë dhe të distancuar nga të gjithë të tjerët. Në këtë rrëfim të parë para një kamere ai shfaqet i qetë dhe i rrjedhshëm. Flet ngadale, ndonjëherë fshin djersën në ballë, sidomos ku fjala shkon të dy vajzat e tij, që i ka nga martesa me ish- Miss Tropojën, që nuk i ka parë prej 14 vitesh, që kur u arrestua dhe dënua me burgim të përjetshëm. Është arrestuar në moshën 24 vjeç dhe këtë prill ka mbushur 37. Në bisedën 60 minuteshe me të ai flet për të djeshmen dhe të sotmen, por guxon të flasë edhe për të ardhmen. Thotë se në burg dinë shumë sekrete jo vetëm të Tropojës por edhe të 21 janarit, apo të ngjarjeve të tjera që kanë ndodhur vitet e fundit në Tiranë. Çfarë di Jaho Salihi Mulosmani që ne të tjerët nuk e dimë? Pse ai beson tek pafajësia e tij. Pse Sali Berisha nuk u përball me të në sallën e gjyqit? Rrugës për në kthim, kameramani më tha se ne në Tiranë jemi ndoshta më të burgosur sesa Jaho. Nuk e kuptova mirë se çfarë donte të thoshte me këtë kolegu im, por me siguri kur të lexoni këtë intervistë do kuptoni më shumë. Nuk di nëse i mora të gjitha përgjigjet dhe bëra çdo pyetje që do donte kryeredaktori i DITA-s, Thano. Nuk e di as nëse duhet t’i besojmë gjithçkaje që thotë Jaho. Ndoshta intervistova një vrasës, ndoshta një njeri të pafajshëm. Shapin nga sheqeri thonë që duhet ta ndajë vetëm Drejtësia. Vetë Jaho beson shumë tek një njeri në këtë vend. Cili është ai?

(Vijon nga numri i djeshëm)

Mira Kazhani: Çfarë ndjesie të krijon fraza: “I dënuar i përjetshëm”. Ka çaste kur nuk ke më fuqi e do të dorëzohesh, mos të shpresosh më për lirinë tënde…?  
Jaho Mulosmani: Ka çaste që ndihem keq dhe aq më tepër kur e di që je dënuar për diçka që s’e ke bërë. Thjesht u gjenda në vendngjarje.  Unë nuk e kam fshehur kurrë. Edhe të nesërmen në një bisedë që kam pas me Perikli Tetën,  ish-ministrin e Brendshëm të asaj kohe, s’e kam fshehur që isha aty.  Pse? Sepse nuk kisha pse ta mbaja sekret. Nuk kisha asnjë arsye. Nuk ishte diçka e organizuar.

Mira Kazhani: Ju pse u dorëzuat? Jeni penduar që e bëtë, kur mund të kishit ikur, mund edhe të kishit përfituar azil politik diku?
Jaho Mulosmani: Unë nuk jam dorëzuar. Mua më kanë arrestuar. Jam arrestuar nga policia e shtetit të asaj kohe. Janë përralla ato që thuhen lart e poshtë. Jo e morën , jo u dorëzua. Shpikje!

Mira Kazhani: E dija që ishit dorëzuar…
Jaho Mulosmani: Unë nuk i ndal dot hamendësimet. Unë jam arrestuar. Dhe normal që më kanë arrestuar dhe i kam lejuar. Edhe pse isha në vend tim, ne rrethin tim, isha në Tropojë. Por nuk jam dorëzuar dhe normal që për hir të uniformës do i lija ata të bënin detyrën e tyre.

Mira Kazhani: Ju i keni konsumuar të gjitha fazat e apelimit të çështjes. Ku e bazoni shpresën në mos për lirinë, për uljen e dënimit tuaj?
Jaho Mulosmani:  E para unë e kam bë shumicën e burgut.  Dhe në asnjë shtet të Evropës nuk ka dënim 101 vjet burg.  Por të gjithë ata që e kanë dash me pastërti Azemin, duhet të lypin të hapet ajo dosje. Azemi nuk respektohet me kurora lulesh nga njerëz që e nxorën në pritë.  Njerëz që e çuan në vdekje. Duhet me e kërku ata që e kanë dash atë me gjithë zemër.
Mos ta bëjnë për mua, për pafajësinë time. Se të jem i sinqertë mua tash s’më bën më përshtypje çfarë me thonë. Bëra 14 vjet burg, ç’lidhje ka të më thuash je i fajshëm apo je i pafajshëm. Absolutisht. Po për hir të asaj çfarë ka ndodh në të vërtetë duhet me u zbardh ajo dosje. Ti the që ka një dëshmitar. E di ti që dëshmitari për të cilin flasin këta, nuk e ka firmos dëshminë e tij? Nuk ka pranu me e dhënë para kamerës atë natë kur është marrë në pyetje. Shumë dëshmitarëve u është falsifiku firma. Tjetër gjë kanë thënë e tjetër ju është deklaru.
Berisha nuk vjen të dëshmojë, i cili është edhe personi i fundit përpos shoqëruesve të Azemit që ka komuniku me atë pa prezencën e shoqëruesve. Me praninë vetëm të sekretares që ka qenë e ulur në tavolinë të vet. Nuk  dëshmon asgjë Genc Pollo…

Mira Kazhani: A e fajësoni truprojën e Azemit për atë dëshmi? Keni kërkuar të komunikoni me të. Ta pyesni pse?
Jaho Mulosmani: Absolutisht jo!  Çfarë do bënte ai. Kush është ai që të luftojë me kupolën e PD-së?  Nuk është edhe njerëzore me ja lyp këtë. Janë njerëz më karaktere të forta ata që dalin mbi.  Nuk ke çfarë i thua atij të shkretit. Se normal  edhe me ligj për sa kohë nuk e ka firmos, ajo dëshmi është e parregullt. Ta marrim edhe nga malësia, atje ku jemi rrit unë dhe Sala, normal që kur shpif për dikë, mban përgjegjësi.
Se normal vjen në sallë të gjyqit Genc Pollo dhe thotë nuk di asgjë dhe sot bëhet njeri i besueshëm i Berishës. Arben Imami, vjen dhe dëshmon në sallë të gjyqit dhe thotë: “Mua më tha shoferi”.  Po Arben Imami nuk thotë nëse është takuar ose jo me Fatmir Haklajn atë ditë.

Mira Kazhani: Është takuar?
Jaho Mulosmani: Ta thotë ai. Ne kemi ndenjur për drekë tek lokali i tij, i shoferit a i truprojës së tij. Arben Imami në sallë të gjyqit thotë: “më tha shoferi”. Dhe nuk tregon a është taku me Fatmir Haklajn, çfarë ka biseduar me të? A i ka thënë Doktorit, a s’i ka thënë?!
Domethënë ka shumë gjëra teknike, hollësi që një prokuror i mirë, që do ta zbardhë ngjarjen e bën dhe kur të shkojnë me i çu lulet, t’i thonë: – Ti vdiqe por ama bëmë diçka. E zbardhëm vrasjen.

Mira Kazhani: Ju çfarë ndjeni kur e shihni atë kronikën që jepet në çdo ekran në atë datë?
Jaho Mulosmani: Mua më vjen keq që jam gjend atë ditë në atë vend.  Sinqerisht më vjen keq që jam gjend aty. Më vjen keq për familjen e Azemit, për fëmijët, motrën, vëllain dhe që jam gjend unë aty. Sepse e kam njohur personalisht Azemin.

Mira Kazhani: Bashkëshortja e Azemit, Fatmira është gjyqtare. A mendoni se po të kish mundësi ajo do ta çonte përpara këtë çështje?
Jaho Mulosmani:  Ah Fatmira s’ka kërku kurrë me u zbardh çështja!

Mira Kazhani: Pse?
Jaho Mulosmani: Po nuk kërkon Fatmira! Fatmira, Fatmirë është!  Ta lëmë të bëj jetën e vet, qejfin e vet.  Fatmira është desh me qenë e para që ta hapte atë dosje. Ajo ka 3 fëmijë me të, e para duhet ta kish hapur çështjen, e jo me bë pazare me vrasjen e Azemit për interesa të veta.

Mira Kazhani: Drejtësia në Shqipëri ka probleme të mëdha. Jo vetëm që nga dosja e Azem Hajdarit por kanë ndodhur shumë ngjarje, Gërdeci, 21 janari, para disa javësh u vra një biznesmen në mes të Bllokut. Vetë kryeministri Rama duket sikur po thotë se në njëfarë mënyre edhe ai po ndihet i pafuqishëm para kësaj drejtësie. Si mendoni se do vij dita që do bëhët drejtësi për këtë rast?
Jaho Mulosmani: Sigurisht ngjarjet duhen parë në kontekstin e kohës. 8 vite që ata ishin në opozitë (e ka fjalën për PD) ata akuzuan , PS-në, akuzuan Fatosin për vrasjen e Azem Hajdarit. Mirë e keq, PS bëri gjyqin, ashtu si e bëri.

Mira Kazhani: Dhe disa thonë që PS bëri pakt me PD për të gjetur një kokë turku, për të hequr akuzat nga vetja e saj?
Jaho Mulosmani: Jo nuk është e vërtetë. Nuk kam kriju marrëdhënie me PS unë që të më mbronin apo të më  tradhtonin. Dosja Hajdari duhet me u zbardh për me u shfajësue. Ata akuzuan 8 vjet PS për atë vrasje,  dhe vetë nuk e hapën kurrë me pas. PS nuk ka pas lidhje kurrë me atë ngjarje. Çfarë përfitonte PS? Asgjë, përkundrazi.

Mira Kazhani: Kurse në PD mendojnë që e kanë gjetur vrasësin, dhe nuk kanë më interes të merren me këtë çështje…
Jaho Mulosmani: Ok në rregull. Nëse kjo është e vërteta mirë. Ky qe fati dhe do e pranoj. Por duhet zbardhur, mendoj unë. Pastaj ka dhe shumë vrasje të tjera. Pse nuk flasin për vrasjen e Fatmir Xhindit?  E dinë të gjithë se kush e ka vra.  E dinë të gjithë. E dini ju që në burg flitet më shumë sesa flitet jashtë?!

Mira Kazhani: Çfarë thuhet në burg?
Jaho Mulosmani:  Po të them pra të gjithë e dinë kush e vrau Fatmir Xhindin. Me kë është i lidhur ai, ku jeton, kujt krahu politik i takon, PS apo PD…

Mira Kazhani: Po ja tani në pushtet është PS… Por hetimin e bën prokuroria, vendos drejtësia, nuk heton politika…
Jaho Mulosmani: Cila prokurori?  Merret vesh në burg 6 muaj para se kush emërohet prokuror i përgjithshëm.  A ka skandal më të madh?  Më flasin mua këta për drejtësi? Ke prokuror e gjyqtar me miliona euro. Ai Gjin Gjoni është më i varfri nga ata që rrinë në atë tavolinë.
Kjo punë është ndërtuar mbrapsht  dhe po nuk e bëri as Rama, nuk ka shanse ta bëj askush tjetër më. Dalin në parlament dhe flasin ata për trafik droge?! Dhe e dinë të gjithë kush i ka bë avionët me drogë. Pse nuk flasin për skafet e drogës. A e dini pse u bë moratoriumi i skafeve? Nuk flet askush. As për autobuzët e Shkodrës që iknin për në Gjermani plot me hashash. Të kujt janë? E ngatërronin Xhoin me Xhozin.
Të tregoj Berisha se djali i kujt është ndal në autostradën Tiranë- Durrës dhe është gjet i drogum. E kanë ruajtur deri në mëngjes me Gardë të Republikës se po ju vdiste në dorë. Nga droga është financu PD-ja e dinë të gjithë. Droga në Belgjikë, Itali, Angli. Unë e di me çfarë është financu PD.

Mira Kazhani: Çfarë thuhet në burg për lidhjet e të birit me ngjarjen e Gërdecit?
Jaho Mulosmani: Unë kam përshtypjen që askush nuk e ka kuptu Gërdecin. Miliardat e fituara nga një shqiptar aty. Ajo është kapja e shtetit, që flet doktori nëe parlament. Unë çuditem edhe me këta të majtët që nuk ja përmendin, nuk ja thonë.

Mira Kazhani: Pse nuk ja thonë, pse janë kaq të kompleksuar?
Jaho Mulosmani: Nuk janë të kompleksuar. Mendoj që ka të bëj me mentalitetin dhe me stilin si do të bësh politikë. A e ke pa sjelljen e Salës  në parlament? Mirë që bëre si bëre 8 vjet në pushtet, u solle si u solle, por çdo të enjte në parlament është turp me e pa.
Çdo tropojan do ishte hipokrit të thoshte se nuk është krenar që të ketë kryeministrin nga vendi i vet. Edhe pse në fakt Sala nuk është tropojan, ai edhe vetë e ka deklaru’ është nga një fshat i Pukës, por ka lindur dhe është rritur në Tropojë. Ai nuk është Berishë i Tropojës.  Por ai tropojan quhet për sa kohë është lind e rrit aty. Dhe të vjen të ndihesh krenar ta kesh nga vendi yt kryeministrin, por a ka tropojan që ndihet krenar kur dëgjon si flet ai në parlament?  “Lene aman pash zotin. Merret me gratë e motrat”. Tropojan është edhe Besnik Mustafaj, por a e ke ndi ndonjëherë me fol kështu? Nuk flasin kështu tropojanët.
Është një histori nga një fshat atje, quhet Llukë. E di Berisha kur ta dëgjoj këtë. Ka qenë një plakë,  e cila ka jetu edhe ajo shumë, rreth 90 vjet. Mësuesja për më tremb fëmijët ju thoshte: Ikni se erdhi ajo plaka, nuk dua t’ja përmend emrin. Kaq i bezdisshëm është bë dhe Berisha, si plaka e Llukës. Ka edhe këtë Shkurte Pal Vatën e Shkodrës, Xhozin. A ka shkodran që ndihet mirë kur dëgjon atë?

Mira Kazhani: Nuk e ka askush vëmendjen më tek znj.Topalli, tashmë prozhektorët janë drejt zotit Basha…
Jaho Mulosmani: S’e lënë dhe atë të shkretin. Ai duket si i shkolluar jashtë shtetit. Duket perëndimor. Ka stil tjetër, mentalitet tjetër, por nuk po e lënë dhe ai ka bërë gabimin që po imiton Berishën.

Mira Kazhani: Kam lexuar disa intervista tuaja, shkrime rreth jetës tuaj para se të vija këtu dhe historia juaj mu duk si një film aksion, me prita , atentate.  A mendoni se keni jetuar në një kohë të çmendur?
Jaho Mulosmani: Edhe sot ashtu është.

Mira Kazhani: Sot edhe filmohen…
Jaho Mulosmani: E çfarë pastaj? Ja për 21 janarin e filmuar nuk u zbardh asgjë. Ka gjuajt garda… Po e dini ju që ka pasur edhe civil me armë që kanë gjuajtur? Askush nuk flet për to. E dini që Berisha është larguar nga kryeministria dhe më pas është kthyer sërish? Kush e ktheu dhe pse? E dini?

Mira Kazhani: Nga i dini ju të gjitha këto?
Jaho Mulosmani:…A e dini ju që janë telefonu të gjithë drejtorët e burgjeve dhe ju është komunikuar të lidhen vetëm më ministrin e brendshëm, dhe jo me zotin Burgaj? Me Lulin pra, dmth Luli ish figurë, se aty ishte Agroni (Kuliçaj), ai i jepte drejtim.

Mira Kazhani: E keni njohur Kuliçajn më parë?
Jaho Mulosmani: Po. Kemi njohje familjare dhe personale. Agroni, njeri i zgjuar!

Mira Kazhani: Do zbardhet 21 janari?
Jaho Mulosmani: Asgjë nuk është thënë për 21 janarin. U vranë 4 vetë dhe këtë e panë të gjithë. Nuk manipulohej dot. Nuk u gjetën ato stilolapsat, armët që shihte në ëndërr Berisha.
Do doja të shprehja dhimbjen për familjarët. Më ka ardhur shumë keq për atë djalin nga Lezha i cili kish ardh në Tiranë për të prerë biletën për në Stamboll ku do merrte furnizim për dyqanin e tij. Gjynah shumë gjynah. Nuk kallzon askush dhe kush e vrau…

Mira Kazhani: A ju vjen keq për njerëzit që kanë humbur jetën në Tropojë në ato vite?
Jaho Mulosmani: Shumë, për shumë persona më vjen keq…

Mira Kazhani: Cili të mungon më shumë?
Jaho Mulosmani: Normal që Fatmiri. Jam rritur me të dhe kemi pasur marrëdhënie shumë të mira.  E kujtoj shpesh!

Mira Kazhani: Si e kaloni kohën këtu, lexoni libra?
Jaho Mulosmani: Lexoj. Tani po lexoj Pemën e Jeniçerëve.

Mira Kazhani: Këtu në burg më thanë se jeni i dënuari më i disiplinuar dhe që pothuajse nuk keni fare vizita…
Jaho Mulosmani: I kam refuzuar vetë që në fillim vizitat, veç dy miqve të mi që atyre s’kam mund me j’ua ndalu ardhjen.

Mira Kazhani: Pse? Keni frikë për jetën e tyre?
Jaho Mulosmani: Po edhe kam pasur, por gjithsesi çfarë do themi në burg. Nuk dua të bezdis askënd. Nuk më ndihmon kjo gjë.

Mira Kazhani: Nuk ju merr malli? Ju jeni edhe në dhomë vetëm, nuk mërziteni?
Jaho Mulosmani: Po sigurisht që mall kam. Unë kam dy vajza, kam vëllezër, nipër e mbesa për të cilët më merr malli.

Mira Kazhani: Keni edhe bashkëshorten, Miss Tropojën që e kisha marrë vesh gabim se e kishit marrë nuse me rrëmbim?!
Jaho Mulosmani: Jo nuk e kam marrë më rrëmbim. Nuk isha në ato pozita. S’kisha nevojë ta bëja ashtu.

Mira Kazhani: Ju keni dy vajza, a do pranonit që ato të martoheshin me një djalë që ka tipin tuaj, karakterin…
Jaho Mulosmani: Me një djalë në burg? Jo (qesh). Por nëse më ngjan mua, nuk ka asgjë të keqe aq më tepër nëse ato janë të lumtura. Do pranoja zgjedhjen e tyre.

Mira Kazhani: Flisni me vajzat shpesh? I këshilloni?
Jaho Mulosmani: Po, flasim shpesh. Janë adoleshente tani. E madhja është pak natyrë, si ta them është pak maloke. Thotë po, po, por nuk e di sa ma dëgjojnë fjalën. Jemi larg…

Mira Kazhani: Nuk i keni takuar asnjëherë?
Jaho Mulosmani: Jo asnjëherë në 14 vjet.  E madhja ka dëshirë të vijë të më takojë. Shikon në internet Tiranën dhe më thotë që ka dëshirë të vijë. I duket e bukur Tirana.

Mira Kazhani: Çfarë programesh të pëlqen të ndjekësh në TV?
Jaho Mulosmani: Kryesisht emisione politikë, por sa për të shty kohën se fort nuk ju besoj.

Mira Kazhani: Gazetar që i beson ke?
Jaho Mulosmani: Kam miq gazetarë.

Mira Kazhani: Kur zgjoheni në mëngjes?
Jaho Mulosmani: Zakonisht rreth orës 8.

Mira Kazhani: Ju hani ushqimin që bëhet këtu në burg. Është i mirë?
Jaho Mulosmani: Po atë ha. I mirë është.

Mira Kazhani: Kur e keni ngrënë një picë për herë të fundit? Po të duash mund të porositësh?
Jaho Mulosmani: Nuk jam shumë qejfli pice. Por po të dua porosis.

Mira Kazhani: Alkooli të pëlqen?
Jaho Mulosmani: Jo. Kurrë s’kam pirë. As jashtë s’e kam pi.

Mira Kazhani: Je tifoz futbolli?
Jaho Mulosmani: Nuk e ndjek shumë por uroj të fitoj Gjermania.

Mira Kazhani: Si përfundim a besoni se me këtë drejtësi që është ju do mund të zgjidhni diçka?
Jaho Mulosmani: Unë mendoj që kjo qeveri ka një mundësi të mirë.  Ka një kryeministër i cili ka një problem me emrin e tij. Kam dëgjuar se ai do të lërë emër të mirë, të lërë gjurmë.  Mendoj që ka shanse me bë gjëra të mëdha.

Mira Kazhani: Do ju pyesja se kush ishte një njeri që e çmoni, por kam përshtypjen që ma dhatë përgjigjen…
Jaho Mulosmani: Jo jo, se nuk dua të dal kështu sikur… Unë dua të sqaroj diçka. Salën nuk e urrej. Çdo të enjte e ndjek. Për gallatën që bën,  për asgjë tjetër. Nuk e kam urryer asnjëherë dhe asnjëherë nuk është fol për t’i bërë keq atij. Kam dëgju shumë, se gjoja  janë pregatit atentate, por nuk është e vërtetë.
Kam dy vajza dhe do betohesha për to për këtë që them.  E para se nuk kam pasur kurrë arsye.  Dhe e dyta është se e kam pas amanet prej gjyshit tim Berishën. Në atë kohen kur ndodhnin ngjarjet në Tropojë, gjyshi ma pat lënë amanet, atij me mos i ndodh gjë kurrë. Sali Berisha ka qenë në familjen time kur është dekoru stërgjyshi im. Ka dekoru Kullën ku është bë konferenca e Muhrit dhe e përmendi edhe në Tropojë në 2009 por nuk tha e kujt ishte Kulla. Nuk e urrej por as mundem ta admiroj.
Berisha më bën të qesh sa herë e shoh, ndërsa Ramën e vlerësoj. Nëse ai do i bëj realitet ato për të cilat flet, do e admiroja.

Mira Kazhani: Nëse do fitonit lirinë, çfarë jete do bënit? Kush do jetë Jaho i dytë? Do jetonit në Shqipëri?
Jaho Mulosmani: Jetë normale do bëja. Dhe vetëm në Shqipëri. Edhe ta di se do më vrasin, prapë do rri në Shqipëri.

Mira Kazhani: Keni frikë?
Jaho Mulosmani: Unë nuk ndaloj dot askënd të mendoj keq për mua, të mendoj për të më bë keq, a të më vras. Frikë unë nuk kam. Por sigurisht mua mund të më vras edhe një fëmijë, edhe një i fortë, edhe një nga ata killera-at që sillen nëpër Tiranë, por frikë nuk kam. Sikur ta di që nesër me vrasin prapë në Shqipëri do jetoj, ta thashë. Tirana është e bukur por edhe Tropoja. Shoh dhe dëgjoj për rrugën e Valbonës, 8 vjet në pushtet se bën dot një rrugë për atje. Tropoja është vend i bukur dhe me njerëz të mirë. Se ju shihni Salën përditë në televizor dhe kujtoni se janë të gjithë si ai…

Mira Kazhani: Ku e gjeni këtë qetësi dhe optimizëm?
Jaho Mulosmani: Në përgjithësi jam i qetë. Normal ndonjëherë e hupi dhe unë, por përgjithësisht jam natyrë e qetë.