Korrupsioni në pritje të Presidentit

Duhej të ishte një pjesë rutinore e punës së Këshillit të Lartë të Drejtësisë. Pas kapjes në flagrancë të një gjyqtareje për korrupsion me lekët ende në çantë, dhe arrestimit nga policia, KLD duhej të mblidhej për të miratuar kërkesën e prokurorisë për vijimin e procedurave penale të arrestit, hetimit etj. Mirëpo Këshilli nuk mblidhet dot, veç nëse anëtarët e tij bëhen bashkë privatisht për të bërë një dorë muhabet. Atë duhet ta thërrasë kryetari i KLD-së, pra, Presidenti i Republikës, ose nënkryetari, realisht drejtuesi dhe organizuesi i jetës institucionale të kupolës së drejtësisë.

Konkretisht, jemi në situatën që nënkryetar kjo KLD nuk ka, ndërsa kryetarin, siç na shkruante një lexues i DITA-s, “e ka që më mirë mos qoftë”. Këmbëngulja e Nishanit dhe mbështetësve të tij në KLD për të mos zgjedhur nënkryetarin, i cili sipas ligjit duhet përzgjedhur mes emrave në KLD që i ka votuar Kuvendi i Shqipërisë, me stërmundime është tentuar të vishet edhe me një varak arsyetimi institucional. “Punën e përditshme teknike të nënkryetarit, e kryen më së miri edhe sekretari i përgjithshëm”, pat thënë presidenti në një intervistë për Zërin e Amerikës, i pyetur për këtë ngërç të zgjatur.

Siç e kemi thënë e siç dihet, sekretari i përgjithshëm i KLD është Pjerin Prendi, kunati i anëtarit të Këshillit dhe tashmë proverbialit Gjin Gjoni. Ja që në rastin konkret, kunati i Presidencës nuk e mbledh dot KLD ndërsa presidenti është ende në Gjermani. Ku me të drejtë kryen detyrën institucionale dhe duket se ka folur fjalë shumë të mira për vlerat themelore dhe mirëkuptimin mes kombeve.

Por ama, këtë detyrën tjetër, shumë konkrete dhe tejet kyçe për drejtësinë e shkalafitur shqiptare, Nishani po tregon angazhimin maksimal për të mos e kryer. Dhe KLD do të mblidhet nesër në orën 5 pasdite, për t’u quajtur “një mbledhje e thirrur”, ku të pranishmit, me “sugjerimin” e anëtarit Gjin Gjoni, do presin sa të vijë Nishani.

DITA ka analizuar së fundmi një procesverbal mbledhjeje të KLD-së, ku ka dalë qartë cilësia qesharake e marrjes së vendimeve nga qeveria e gjyqësorit. Por shefi i KLD-së, presidenti, të cilit i mjafton kunati i Gjinit kur nuk është vetë, nuk dorëzohet. Përballë kritikave dhe ekspozimit të skandaleve, ku po dalin edhe shifra konkrete sesa dhjetra e qindra mijë euro blihen vendet e punës nëpër gjykata, KLD miraton më shumicë votash edhe krerë gjykatash që nuk janë në përputhje me kriteret që detyron ligji, dhe çdo kundërshtime quan “provokacija”.

Ka për të mbetur në histori fjalët “heroike” që ai i ka drejtuar mikut të tij Gjin Gjoni: “E shikon që neve këtu na duhet të përballemi me provokime të rënda. Por ne do rezistojmë…”.

Rezisto president, rezisto, dhe foli homologut gjerman për virtytet e tua. Tek e fundit, krahasuar me shifrat që vijnë vërdallë nëpër KLD, të merresh me dy milionë lekët e vjetra të një gjyqtareje të Lezhës, është si të djegësh Stambollin për një gjilpërë./DITA

Materialin e detajuar për mosmbledhjen e KLD-së e gjeni KETU