“140 milion euro për zyra, makina dhe vila, për teatrin nuk ka lekë”

Kreu i grupit parlamentar të LSI-së, Petrit Vasili, i është rikthyer sot sërish çështjes së Teatrit Kombëtar, ndërsa hodhi akuza ndaj qeverisë.

Vasili thotë se qeveria harxhoi 140 milion euro për zyra, makina dhe vila, ndërsa për teatrin nuk ka.

Sipas Vasilit, qeveria po ia jep teatrin privatit me pretendimin se nuk ka lekë.

“140 milion euro gllabëroi qeveria për zyra, makina e vila, ndërsa për Teatrin Kombëtar s’ka lekë.

Po si s’kanë turp që gënjejnë këta, qeveri e bashki, që do shkatërrojnë Teatrin dhe do t’ia hapin privatëve se gjoja s’kanë lekë.

Këta lekë kanë pasur pa fund dhe vetëm për zyra, makina të shtrenjta për qeveritare e ofiqarë gjithfarësh, vila qeveritare e transferime zyrash, kanë bërë rrush e kumbulla dhe pa ju skuqur faqja fare plot 140 milionë euro

Për vitin 2017 janë plot 30 milionë euro shpenzime vetëm për Kryeministrinë. Në vitin 2015 shpenzimet e luksit për qeverinë arritën në shifrën e 91 milionë eurove dhe në vitin 2016 kjo shumë shkoi në rreth 22 milionë euro.

Pra, 140 milion euro kane batërdisur në tre vitet e fundit, vetëm për zyra dhe lukse të tjera kryeministri dhe të tijtë.

Vetëm lekët që hëngri kryeministri vetëm në 2017 plot 30 milion euro dalin e teproje për Teatrin.

Dhe këta na bëjnë të dëgjojmë idiotësira me teatrin që po shembet, me zjarrfiksa, me tuberkuloz e azbest vetëm e vetëm që të shesin tokën e Tiranës tonë dhe për t’i rrëmbyer paratë”, shkruan Vasili në Facebook.

a.s/dita