PD ka kandiduar (dhe rikandiduar) një të kërkuar në SHBA për ngacmime seksuale

 Kryetari i komunës Prezë është Ahmet Halili, i ardhur si kandidaturë e Partisë Demokratike është shpallur që në vitin 2002 person në kërkim në Shtetet e Bashkuara për ngacmim seksual të një minoreneje dhe për rrahjen e një personi. Që prej vitit 2002 ai është larguar nga Shtetet e Bashkuara për t’iu shmangur arrestimit por rikthimi në atdhe i ka hapur atij rrugët e karrierës politike, sigurisht nën mbështetjen e Partisë Demokratike dhe vetë kryeministrit të vendit. Historia e Ahmet Halilit, në fakt zbulohet nga letrat që kanë dalë as më shumë e as më pak se sa nga zyrat e kryeministrisë dhe të policisë së shtetit shqiptar. Në fillim të vitit 2007, një shqiptaro-amerikan i quajtur Sinan Gjoni, i dërgon një letër informuese numrit.2 të policisë shqiptare Agron Kuliçajt. Pasi i përshkruante aktivitetin dhe problemet në SHBA të Ahmet Halilit, i cili në këtë periudhë porsa ishte shpallur kandidat i Partisë demokratike për kryetar të komunës Prezë, shqiptaro-amerikani, bashkëlidhur letrës i dërgoi Kuliçajt edhe dokumente të marra në gjykatën amerikane ku kërkohej arrestimi i Ahmet Halilit për ngacmim seksual ndaj një të miture dhe për rrahje. Pasi kanë parë se nga ana e zotit Kuliçaj nuk pati ndonjë reagim, madje nuk u kthye as përgjigje ndaj shtetasit që dërgoi materialin, i njëjti material i dërgohet dhe zyrës së Berishës. Kjo e fundit më datën 22 Qershor 2007 i dërgon materialin e ardhur Agron Kuliçajt dhe e urdhëron atë që të bëjë ndjekjen e kësaj çështje dhe për çdo rezultat të dalë nga hetimi të informonte kryeministrin dhe personin që kishte sjellë denoncimin. Jemi në 22 Qershor 2007, rreth 5 muaj pasi zoti Halili ishte zgjedhur kryetar i komunës Prezë.

Problemet
Në kopjen e dokumenteve që i shkuan Berishës dhe Kuliçajt ndaj Ahmet Halilit gjendet dhe urdhri i gjykatësit amerikan për arrestimin e tij. Sipas këtij dokumenti rezulton se dedektivi amerikan John E. Jesper ka kërkuar urdhër-arresti për shtetasin e dyshuar Ahmet Halili i cili dyshohej për shkelje të rënda të ligjit i cili pa justifikime të ligjshme dhe me qëllim, dyshohet ka bërë kontakt fizik me një natyrë fyese me shtetasen e mitur T.K, duke futur duart nën bluzën  e saj dhe duke i kapur gjokset. Rezulton se njësoj si për rastin e ngacmimit seksual ndaj një të miture, ndaj Halilit ka pasur një urdhër-arrest edhe për rrahje. Denoncuesit e tij shprehen se menjëherë pasi gjykatësi ka kërkuar arrestimin e tij ai është kthyer në Shqipëri. “Ky person quhet Ahmet Halili. Ka shkuar në USA në vitin 1996 së bashku me gruan dhe dy fëmijë, me lotarinë që organizohet nga Departamenti Amerikan i Shtetit në USA. Në vitin 2001 ju dha shtetësia amerikane. Adresa ku familja e tij jeton në USA akoma është….. Woodstock 60098. Ahmet Halili, ka ikur nga USA në Gusht të vitit 2002 pasi ka pasur probleme me policinë. Kërkohet nga policia(Woodstock Police) pasi ka dy fletë-arresti. Njërën për rrahje(felony) dhe tjetrën për ngacmim seksual të një vajze 16-vjeçare(ku menjëherë pas kësaj ngjarje largohet nga USA). Pasi u largua nga USA, Ahmet Halili u kthye në Shqipëri, ku strehoet dhe jeton në fshatin Prezë(afër aeroportit të Rinasit)”, – shkruhet në letrën denoncuese.
Karriera
Pasi është kthyer në Shqipëri duket se Ahmet Halili fillimisht ka nisur punë në doganën e Rinasit, e pas disa vitesh në këtë funksion ai e ka parë veten mjaftueshëm të fuqizuar për të nisur dhe karrierën politike, në njërën prej komunave më të rëndësishme të Tiranës, atë të Prezës, e cila ka nën administrim qindra hektarë tokë me vlerë, tokë e cila është interesante dhe shumë e lakmuar për investitorët pasi gjendet fare pranë aeroportit të vetëm ndërkombëtar që ka Shqipëria. “Pasi ka punuar për disa kohë në doganën e Rinasit në aeroport, së fundi me mashtrime(edhe për jetën e tij në USA) dhe duke shpërndarë para në familjet që do të votonin për të, është zgjedhur kryetar i komunës Prezë të Prefekturës Tiranë”, – shkruajnë denoncuesit e tij në letrën që i kanë dërguar Kuliçajt e më pas dhe vetë Berishës. .

Letra denoncuese dërguar Agron Kuliçajt në vitin 2007

Dërgues: Sinan Gjoni
Woodstock, IL
USA

Për: Ministrinë e Brendshme, Drejtorit të krimeve të Hapura, Z. Agron KULIQI, TIRANË

I nderuar zoti Agron:
Informacioni që po ju dërgoj është për një njeri që ka kryer krime në USA dhe ndodhet në Shqipëri, i cili është kryetar i komunës Prezë.
Ky person quhet Ahmet Halili. Ka shkuar në USA në vitin 1996 së bashku me gruan dhe dy fëmijë, me lotarinë që organizohet nga Departamenti Amerikan i Shtetit në USA. Në vitin 2001 ju dha shtetësia amerikane. Adresa ku familja e tij jeton në USA akoma është….. Woodstock 60098.
Ahmet Halili, ka ikur nga USA në Gusht të vitit 2002 pasi ka pasur probleme me policinë. Kërkohet nga policia(Woodstock Police) pasi ka dy fletë-arresti. Njërën për rrahje(felony) dhe tjetrën për ngacmim seksual të një vajze 16-vjeçare(ku menjëherë pas kësaj ngjarje largohet nga USA). Pasi u largua nga USA, Ahmet Halili u kthye në Shqipëri, ku strehoet dhe jeton në fshatin Prezë(afër aeroportit të Rinasit). Pasi ka punuar për disa kohë në doganën e Rinasit në aeroport, së fundi me mashtrime(edhe për jetën e tij në USA) dhe duke shpërndarë para në familjet që do të votonin për të, është zgjedhur kryetar i komunës Prezë të Prefekturës Tiranë. Bashkëngjitur keni një kopje të akuzave të bëra ndaj tij. Fletët e arrestit të lëshuara që në vitin 2002 janë akoma të pa ekzekutuara, pasi personi në fjalë është larguar nga USA. Në momentin që ai do të rifutet në USA do të arrestohet menjëherë.
Për të verifikuar informacionin e mësipërm, kontaktoni policinë e qytetit Woodstock në shtetin e Ilinoisit në numrin e telefonit…….
Besojmë se ju i nderuari zoti Agron, do të merrni të tëra masat e nevojshme në përputhje me ligjin, me qëllim që kriminelë të tillë të mos jenë më në të tilla poste shtetërore, por të vihen para drejtësisë. Dhe në një kohë që kryeministri i Shqipërisë është betuar përpara shqiptarëve se do të ketë zero tolerancë në luftën kundër krimit dhe korrupsionit, këtij krimineli i jepet imunitet.

Shkarkimet e kryetarëve të komunave të firmosura nga Berisha

                                                                                                     29 Maj 2008
Shkarkohet nga detyra kryetari i Komunës Kashar, Alfred Sulaj, pas skandalit të abuzimeve me tokat. Vendimi është marrë në mbledhjen e Këshillit të Ministrave dhe motivi kryesor për shkarkimin e Sulajt ishin shkeljet e rënda ligjore. Sipas relacionit të përgatitur nga ministri i Brendshëm, Bujar Nishani, në emrin e Alfred Sulajt për periudhën 200-2007 rezultojnë se janë kryer një sërë veprimesh të paligjshme në bashkëpunim me drejtues dhe nëpunës të Komunës Kashar, në lidhje me ndarjen dhe administrimin e tokës bujqësore.

31 Korrik 2008
Kryeministri Berisha shkarkon nga detyra kryetarin e Komunës Kolsh, Abedin Oruçi, i cili ishte arrestuar disa ditë më parë nga policia kosovare për trafik dhe prostitucion. Me propozimin e ministrit të Brendshëm, Këshilli i Ministrave vendosi që Abedin Oruçi, kryetar i Komunës Kolsh, të shkarkohet nga kjo detyrë, për shkelje të rënda ligjore. Ky vendim ka hyrë në fuqi menjëherë. Ish-kryetari i Komunës Kolsh të Rrethit të Kukësit ishte zgjedhur për herë të tretë në krye të detyrës së tij, ndërkohë që është penalizuar nga policia, por edhe nga Këshilli i Ministrave për shkak të shkeljeve të rënda ligjore.

30 Qershor 2010
Kryeministri Berisha ka shkarkuar nga detyra kryetarin e komunës Trebinjë të qarkut të Korçës, Gjergji Buzo. Vendimi u mor në mbledhjen e qeverisë e cila vendosi shkarkimin e tij për shkelje të rënda të ligjit. “Në mbështetje të nenve 100 e 115, pika 1, të Kushtetutës, dhe të shkronjës “a”, të nenit 42, të ligjit nr.8652, datë 31.7.2000, “Për organizimin dhe funksionimin e qeverisjes vendore”, me propozimin e ministrit të Brendshëm, Këshilli i Ministrave vendosi shkarkimin nga detyra, për shkelje të rënda të ligjit, të kryetarit të komunës Trebinjë, të qarkut të Korçës, z. Gjergji Buzo” thuhet në faqen e internetit të kryeministrisë ku theksohet se vendimi për shkarkimin e tij hyn në fuqi menjëherë.

2 Mars 2011
Qeveria Berisha ka shkarkuar dy kryetarë komunash pasi janë paditur penalisht në Prokurori nga Inspektorati i Lartë i Deklarimit dhe Kontrollit të Pasurisë për fshehje pasurie dhe deklarim të rremë. Të shkarkuarit janë kryetari i Komunës Dajt, shtetasi Kujtim Qefalia dhe kryetari i komunës Gosë në Kavajë, shtetasi Sinan Shala.

25 korrik 2012

Këshilli i Ministrave miratoi, shkarkimin nga detyra të kryetarit të komunës Rrethina, Kleves Muja dhe të kryetarit të komunës Lenie, Astrit Bici. Propozimi për shkarkimin nga detyra të kryetari të komunës Rrethina, Kleves Muja është bërë me propozim të ministrit të Brendshëm, bazuar në dokumentacionin e Policisë së Shtetit për pjesëmarrje të tij në grupe të organizuara kriminale të drogës në Itali dhe kërkesës që pala shqiptare ka marrë për ekstradimin e tij nga autoritetet e drejtësisë së këtij shteti. Propozimi për shkarkimin e kryetarit të komunës Lenie, Astrit Bici është bërë gjithashtu nga ministri i Brendshëm, bazuar në raportin e Kontrollit të lartë të Shtetit, në të cilin janë evidentuar shkelje të rënda të ligjit në veprimtarinë e tij si kryetar komune.

27 Shkurt 2013
Këshilli i Ministrave ka vendosur të shkarkojë nga detyra kryetarin e komunës Dardhas Aleksandër Çela. Vendimi është marrë në mbështetje të neneve 100 e 115, pika 1, të Kushtetutës, dhe të  shkronjës “b”, të nenit 42, të ligjit nr.8652, datë 31.7.2000, “Për organizimin dhe funksionimin e qeverisjes vendore”, me propozimin e ministrit të Brendshëm.

Kur i ke me dosje i do edhe më shumë

Redaksionale

Dokumentet dhe historia e kryetarit të komunës Prezë që sjell sot “DITA”, shkojnë përtej “scoop”-it gazetaresk të një njeriu që i arratiset drejtësisë në SHBA dhe vjen e bëhet kryetar komune në Shqipëri. Skandali i vërtetë qëndron në fakt, as më shumë e as më pak në zyrën e kryeministrit shqiptar. Fabula është e thjeshtë. Dy shqiptaro-amerikanë pasi mësojnë se Partia Demokratike caktoi Ahmet Halilin si kandidat për kryetar komune në vitin 2007, nxituan të njoftonin Agron Kuliçajn se ky njeri kishte probleme ligjore në SHBA. Pasi Ahmet Halili u bë kryetar komune në 18 Shkurt 2007, ata i dërguan të njëjtën letër dhe zyrës së Berishës. Ky i fundit, procedurën e respektoi dhe formalisht urdhëroi Kuliçajn që ta ndiqte çështjen. Kjo ishte procedura, është gjithnjë standarde; Berisha s’të fal për “çështje nderi”. Por përtej procedurës së Berishës si kryeministër kemi dhe Berishën si politikan, e këtu ekuacioni komplikohet. Një kryeministri dhe burri shteti nuk i bëjnë nder përfaqësues me probleme si Halili, por një politikani klanor dhe kryetari i një grupi të fuqishëm interesi, individë me dosje pikante penale si Halili, janë shërbëtorë të garantuar, ndofta më të mirët e më të përulurit ndër të gjithë shërbëtorët e devotshëm. Këtë e konfirmon dhe rikandidimi i Halilit në zgjedhjet lokale të vitit 2011, vit kur PD-ja e rikandidoi atë per mandatin e dytë.

Ata dy denoncues shqiptaro-amerikanë që vunë në dijeni Berishën dhe Kuliçajn për “skandalin” që dinin në lidhje me kandidimin e Halilit, ishin më se të informuar për problemet e Halilit në SHBA, por ajo që nuk dinin ishte fakti se Berishës, i shkonin përditë informacione dhe relacione për dosje penale ndaj shumë zyrtarëve shqiptarë dhe për Berishën kjo nuk është aspak një çështje parimore apo çështje për tu alarmuar, është pjesë e një rutine të fiksuar mirë tashmë të punës së tij: “Bëjeni gati dosjen dhe ma lini mbi tryezë, po hodhi vickla mbi tavolinë ia kemi”. Dy denoncuesit shqiptaro-amerikanë, pa e ditur, në fakt kanë “blinduar’ pozitat e Ahmet Halilit pranë Berishës, pasi kryeministri të do më shumë nëse ke dhe një dosje penale, i duhesh më shumë kur ke “ngrënë çorbë”, pasi të ka nën kontroll, të ka të kapur dhe prej dy dekadash Berisha ua ka mësuar aq mirë vlerën dosjeve saqë është kusht për t’iu afruar dhe jo kusht për tu distancuar fakti nëse ke një dosje apo ndonjë problem që Berisha e di dhe bën sikur nuk e di. Ahmet Halili bëri ç’bëri në SHBA tashmë është kryetar komune, Berishës aq i bën se ç’farë ka bërë Halili në SHBA dhe çfarë përfaqëson për shoqërinë një individ me precedentë të tillë, dosjen ia ka mbi tavolinë. Kështu që komunari që menaxhon qindra hektarë toka në një komunë të rëndësishme pranë aeroportit të vetëm ndërkombëtar shqiptar mund të vazhdojë punën i qetë, për sa kohë që sekretin e tij e ruajnë kryeministri dhe njeriu tij kyç në polici.

Foto LSA 18 mars 2010:Kryeministri Sali Berisha dhe Presidenti (asokohe ministri i Drejtesise) Bujar Nishani dhe kryekomunari i Prezes, gjate ceremonise se inagurimit te fillimit te punimeve ne rrugen qender e komunes Preze-rruga nacionale.