Heshtja (e kotë) e Ambasadorit Ceka

Gazeta “DITA” botoi në numrin e djeshëm, tre dokumente  që vërtetonin se ndaj Neritan Cekës ka nisur një procedim penal në Greqi. Dokumentet ishin pjesë e një letërkëmbimi i kryer në muajin korrik, mes Prokurorisë së Tiranës dhe Ministrisë së Jashtme të Shqipërisë, në lidhje me këtë çështje.

Tentuam një reagim  më së pari nga vetë zoti Ceka. Ky reagim nuk erdhi, në asnjë moment, madje zoti Ceka, ishte kujdesur që të fikte dhe një numër telefoni personal për të cilin është bërë i famshëm se e përdor prej 15 vitesh dhe se “po i telefonove aty, e gjen gjithnjë”.

Zoti Ceka, sot ushtron detyrën shtetërore të Ambasadorit të Shqipërisë në Itali. Pra ai nuk është një individ i thjeshtë, apo një qytetar normal, aspak, është përfaqësues dhe zyrtar shtetëror, përfaqësues publik. Këtë e dimë të gjithë, e di dhe zoti Ceka vetë, me siguri. Ndaj dhe si minimum, zoti Ceka personalisht, ose nëpërmjet institucionit të Ministrisë së Jashtme, i detyroheshin opinionit publik një qëndrim. Qoftë dhe një qëndrim të tipit: “Nuk kemi ende të dhëna të plota mbi këtë çështje dhe do të bëjmë të ditur qëndrimin tonë në respekt edhe të detyrimit për të ruajtur sekretin hetimor”.

Dy rreshta përgjigje janë detyrim për opinionin publik, në kushtet kur “sekreti” i ruajtur me fanatizëm për rreth dy muaj me radhë, nuk është më dhe aq sekret, pas publikimit të dokumenteve.  Por nëse vetë ambasadori Ceka dhe Ministria e Jashtme fshihen të reagojnë, siç do ishte e denjë për një institucion dhe një zyrtar shtetëror në kushtet e zbardhjes së rrethanave botërisht në gazetë, nga prokuroria shqiptare kompleksimi duket edhe më i madh. Fundjava ishte një justifikim i gatshëm, për të shmangur dhe interesimin e gazetës, madje nisen te qarkullonin zëra se “s’po të linin gurë pa lëvizur për të gjetur personin që kishte përgjegjësinë për ekspozimin e këtyre dokumenteve”.

Çfarë i bën të ndihen në një siklet kaq të madh? Përse duhet ruajtur me kaq shumë fanatizëm motivi i procedimit penal të ambasadorit Ceka në Greqi, në kushtet kur, pas dy ditësh, në Kallamatë, do të nisë dhe një gjyq publik për këtë çështje dhe gjyqi do zbardhë vetë fabulën që implikon Cekën?

Gjatë gjithë ditës së djeshme, kanë qarkulluar dhjetëra variante dhe informacione mbi arsyet e procedimit penal të Neritan Cekës,  por në respekt të informimit korrekt të publikut, gazeta “DITA” refuzon të rendisë të dhënat e ardhura në rrugë informale. Për sa kohë nuk ofrohet  një variant kompetent zyrtar, nuk e marrim mundimin të spekulojmë, s’kemi pse. Por në respekt të informimit korrekt të publikut dhe në kushtet kur institucionet shqiptare nuk bëjnë transparencë, minimalisht kemi detyrimin t’u bëjmë sot një thirrje publike për të reaguar, ndërsa ribotojmë të plotë dhe dokumentacionin dhe artikullin e djeshëm të gazetës mbi këtë çështje.

Në ndërkohë këto “24 orë” të paktën na shërbyen për të kuptuar se zoti Ceka, Ministria e Jashtme, por edhe Prokuroria Shqiptare, janë tërësisht të interesuara dhe të investuara në mbrojtje tarafesh dhe dinë të injorojnë si askush tjetër opinionin publik shqiptar kur “tarafi e ka mizën nën kësulë”.

Shkresat me sigel sekret: Prokuroria greke kërkon Neritan Cekën (3 nga faksimilet)

Rreth 10 ditë përpara zgjedhjeve të 23 Qershorit, pranë Ministrisë së Drejtësisë në Tiranë, vjen një dosje nga ministria greke e Drejtësisë. Prokuroria greke e Kallamatës kërkonte “kokën” e ambasadorit Shqiptar në Romë, Neritan Ceka.

Ai ishte shpallur i pandehur në shtetin helen, ndërsa gjykata e Kallamatës kishte aprovuar statusin e tij si i pandehur.

Aktet nga Greqia kanë ardhur në Tiranë më datën 11 Qershor 2013 por sikundër e kërkon procedura, aktet duan kohën e tyre për përkthim, ndaj dhe i janë kaluar në muajin korrik prokurorisë së Tiranës.

Pikërisht shkresat që prokuroria e Tiranës ka lëshuar pas administrimit të dosjes greke, disponohen nga gazeta “Dita”.

Më datën 15 korrik prokurori i Tiranës, Adnan Kosova, i dërgon Ministrisë së Jashtme praktikën me kërkesën për të marrë në pyetje për llogari të prokurorisë greke të Kallamatës ambasadorin Neritan Ceka.

Sipas shkresës zoti Ceka ftohej që më datën 25 Korrik të vinte në Tiranë për të dhënë deklarime në lidhje me disa pyetje që ishin të interesuar ti bënin atij prokurorët grekë të Kallamatës. Nga shkresa kuptohet se këta të fundit ndërkohë, e kishin shpallur të pandehur zotin Ceka, madje në shkresë sqarohej se në lidhje me çështjen në ngarkim të tij, Gjykata e Kallamatës do të çelë gjyqin më datën 25 Shtator, pra të mërkurën që vjen. Në letërkëmbime, Cekës i kërkohet që të konfirmonte njoftimin e bërë nga prokuroria e Tiranës dhe të shkonte brenda datës 25 Korrik në Tiranë dhe të jepte deklarimet e tij.

Misteri

Gazeta “Dita” pasi administroi shkresat e dërguara drejt Ministrisë së Jashtme për “çështjen Ceka” u përpoq të mësonte më tepër rreth natyrës së veprës penale për të cilën akuzohet Ceka në shtetin helen, por njësoj si në shkresat që kanë firmosur, prokurorët kanë mbajtur qëndrim: “Top Secret” edhe në raport me interesimin e gazetës.

Duket se edhe nga pala greke kjo çështje është trajtuar me një kujdes të veçantë. Kjo kuptohet, pasi prokurorët e kërkojnë me ngulm Neritan Cekën, madje e kanë shpallur dhe të pandehur, por i kanë lënë shansin që të japë garanci te homologët shqiptarë në prokurorinë e Tiranës, se më datën 25 Shtator 2013 ai do të paraqitet vetë me vullnetin e tij në gjykatën greke.

Por në fund të shkresës, që i ka shkuar Ministrisë së Jashtme, Ceka paralajmërohet se:

“Në rast mosparaqitje ditën dhe orën e caktuar, pa pasur pengesë të ligjshme, paralajmëroheni se në bazë të nenit 308 të Kodit të Procedurës Penale, mund të urdhërohet shoqërimi i detyruar nga Policia Gjyqësore”.

Ngelet për t’u parë se ku i ka dalë prokurorëve grekë emri i Neritan Cekës dhe sa serioze është fabula penale për të cilën prokurorët grekë e kanë klasifikuar ambasadorin Ceka si të pandehur, të implikuar. Kjo pjesë e historisë, ndonëse më e rëndësishmja mbetet ende e pazbardhur, për shkak të trajtimit nën shkresa me siglën “sekret hetimor” nga prokurorët shqiptarë dhe ata grekë të kësaj çështje.