Basha pranon një sondazh të ri për Agron Dukën në Durrës

Partia Demokratike duket se po tërhiqet nga qëndrimi i saj për Bashkinë e Durrësit, për të cilin republikanët kanë propozuar kandidaturën e deputetit Agron Duka.

Burime nga PD konfirmojnë për TemA se dy partitë kanë rënë dakort që në qytetin bregdetar të zhvillohet një tjetër sondazh, ku krahas dy emrave të propozuar nga selia blu Ardian Muka dhe Arqile Gorea, të përfshihet edhe emri i Dukës.

Burimet theksojnë se në takimin e zhvilluar mes Mediut dhe Bashës, është rënë dakort se nëse Duka rezulton fitues nga sondazhi, atëherë ai do të përfaqësojë opozitën në zgjedhjet e 21 Qershorit për bashkinë e Durrësit.

Në të kundërt, republikanët do të tërhiqen nga kjo bashki dhe do të nënshkruajnë marrëveshjen me demokratët.

Republikanët i kanë propozuar Partisë Demokratike 14 emra kandidatësh për bashki në zgjedhjet e 21 qershorit, por deri tani mësohet se PD i ka dhënë katër bashki,Librazhdin, Ersekën, Tepelenën dhe Beratin, ku dy bashkitë e fundit nuk ishin pjesë e kërkesë fillestare të republikanëve.

Negociatat mes këtyre dy forcave politike pritet të finalizohen brenda kësaj jave për të përcaktuar më pas formulën e prezantimit në koalicion ose jo për procesin zgjedhor.

Ndërkohë, PDK e Nard Ndokës me shumë gjasa do të pranojë bashkinë e Pukës dhe të Vaut të Dejës.

Po ashtu, kërkesa e Partisë Bashkimi Liberal Demokrat për të kandiduar kryetari Arjan Starova në Elbasan, nuk është pranuar, ndërsa demokratët do të kandidojnë Ardian Turkun.