Aleanca Kuq e Zi dhe rënia e kauzës

Kishte ditë qe Aleanca Kuqezi kishte paralajmëruar opinionin publik se ne datën 1 maj drejtuesi i kësaj partie zoti Kreshnik Spahiu dhe përkrahësit e saj do te largonin nga pushteti shtetasin Berisha. Dje u zhvillua manifestimi i tkurrur qe u mbyll me një veprim simbolik. Një jelek antiplumb i cili u hoq nga trupi i një te riu, u mor nga zoti Spahiu dhe u flak nga ai në drejtim të kryeministrisë, pa arritur tek ajo; ca se zoti Spahiu ndodhej në një distancë të pallogaritur mirë prej tij, ca sepse ai nuk e zotëronte forcën e duhur për të dërguar objektin në shenjë. Vetë simbolika e përdorimit të jelekut antiplumb si devizë mbyllëse e manifestimit ishte huazuar nga gazeta DITA e djeshme, dhe zoti Spahiu pati të gjithë kohën e nevojshme që ta kopjonte këtë ide prej saj.

Lëvizja ose Partia Aleanca Kuqezi u lajmërua e më pas u shfaq bujshëm para publikut shqiptar duke ndjekur dy drejtime njëkohësisht, denoncimin e qeverisjes dhe në veçanti denoncimin e drejtimit të saj nga  kryeministri Berisha, dhe ndjekjen e kauzës patriotike e nacionaliste duke filluar me denoncimin e marrëveshjes se Qeverisë Shqipëtare me Qeverinë Greke, për hapësirën ujore të jugut të Shqipërisë.

Është për t’u theksuar se rrethet intelektuale dhe politike të Tiranës, asnjëherë nuk e morën seriozisht zotin Spahiu madje e panë me mosbesim atë për një sërë arsyesh që lidheshin me të kaluarën e zotit Spahiu si një njeri i Berishës herë në hije e herë në publik, së fundmi i vendosur prej tij si nënkryetar i Këshillit të Lartë të Drejtësisë, por edhe nga fakti se kjo lëvizje e re dhe ky lider i shfaqur rishtas, me kërkesa radikale për luftë kundër korrupsionit e për ndëshkim ligjor, asnjëherë nuk iu përgjigj në mënyrë transparente pyetjes së bërë nga shumë analistë se ku i gjente fondet për të realizuar aktivitetet e tij. Pyetje kjo që shtrohet përsëri sot dhe përsëri do të mbetet pa përgjigje.

Zoti Spahiu filloi të trajtonte disa çështje me karakter nacionalist dhe të mbushte një hapësirë bosh në këtë drejtim, e lënë e tillë për shkak  të konjukturave politike të partive shqiptare në qarkullim. Vecaërisht lëvizja tentoi të mbushte hapësirën nacionaliste të cënuar seriozisht nga qeveria dhe kryeministri. Për shkak të këtyre qëndrimeve që edhe kështu përgjithësisht nuk kanë patur një linjë të qartë, të menduar mirë, të programuar e të strukturuar si duhej, fillimisht njerëz të ndryshëm, panë tek Aleanca Kuqezi një lloj forcë që mendonte t’i jepte përgjigje nacionalizmit serb nga njëra anë dhe shovinizmit grek e formave të tij nga ana tjetër. Radikalizimi i qëndrimeve nacionaliste e antiqeveritare dhe sidomos radikalizimi i qëndrimeve kundër shtetasit Berisha, krijuan idenë se erdhi koha që të vendoset drejtësi dhe sidomos qeveritarët e korruptuar me shtetasin Berisha në krye të shkojnë të japin llogari para saj.

Por teza e nacionalizmit të zotit Spahiu, pasi u kopjua e u përdor keq nga zoti Berisha, u bë objekt kritikash nga ndërkombëtarët dhe Shtetet e Bashkuara të Amerikës e Bashkimi Evropian të cilët folën në një zë për dëmin që i sillte Shqiperisë, faktorit shqipëtar në rajon, e çështjes shqiptare në përgjithësi, por edhe rajonit,  përdorimi i nacionalizmit si mjet politik për të fituar ca vota më shumë. Ndërkombëtarët i tërhoqën veshin (term ky i përdorur shpesh këto ditët e fundit) zotit Berisha  dhe njëkohësisht këshilluan zotin Spahiu të ulte tonet nacionaliste e të ndiqte një orientim tjetër politik . Në këtë mënyrë zotit Spahiu i ra kauza nacionaliste e i mbeti vetëm radikalizmi opozitar për të vendosur drejtësi.

Pikërisht me këtë staturë dhe me përkrahës të pakonfirmuar mirë, zoti Spahiu hyri në negociata për të përcaktuar qëndrimin që do të mbante ai dhe partia e tij, nëse do të hynin vetëm në zgjedhje apo do të bashkoheshin me frontin opozitar me gjithë zhvillimet brenda tij. Sic është edhe e njohur tani mes debatesh e dilemash të shumta zoti Spahiu vendosi të mos bashkohej me frontin opozitar, gjë që shkaktoi edhe një largim të shumë drejtuesve dhe përkrahësve të Aleancës Kuqezi.

Manifestimi i djeshëm i Aleancës Kuqezi, i përkrahur kësaj rradhe nga një ditë shume e bukur me diell, tregoi se nuk u përkrah nga ndjekësit e zotit Spahiu, dhe pati rënie drastike të pjësmarrësve në të, në krahasim me tubimin e mëparshëm që megjithëse i mbajtur në një ditë me shi, ishte në numër më i madh se tubimi i djeshëm.

A ishte tubimi i djeshëm një test dhe tregues i rënies së forcës së Aleancës Kuqezi? Por pse ra kauza e Aleancës Kuqezi? Pse ra pjesëmarrja e përkrahësve të Aleancës Kuqezi? Pse daljet e Spahiut në media nuk përbëjnë më lajm? A i bëri mirë llogaritë Spahiu? A ka patur megallomani në të gjithë veprimet e shfaqjet e tij? A donte t’i imponohej Spahiu frontit opozitar, dhe sidomos Partisë Socialiste për të përfituar disa mandate direkt nga lista e PS, apo për të marrë disa poste në qeveri për një numër të caktuar votash? A do të ketë sukses ai në zgjdhjet e 23 qershorit?

Këto janë një sërë pyetjesh që opinioni publik ngre pas paraqitjes së djeshme të kësaj force politike, por le të qëndrojmë te llogaritë e zotit Spahiu dhe te gabimet e tij.

Në aspektin programor – Para së gjithash vetë lëvizja u fillua pa një program të plotë afatshkurtër e afatgjatë, pa objektiva të qarta, pa përcaktuar interesat që duheshin përfaqësuar, pa patur synime të tjera sociale në mënyrë që të ruhej më mirë orientimi afatmesëm e afatgjatë.

Në aspektin organizativ – Paraqitja jo si një forcë politike e organizuar e strukturuar dhe me funksione të cilat u krijuan deri diku në qendër por që nuk arritën të strukturoheshin në bazë dhe nuk arritën të shtriheshin në të gjithë territorin shqiptar.

Në aspektin e drejtimit e lidershipit – Lëvizja u drejtua përgjithësisht nga njerëz të ndryshëm pa përvojë në drejtimin e lartë të shtetit apo institucioneve të cilët më parë nuk kishin eksperiencë politike, ose kishin qenë në nivele të ulta drejtimi në ndonjë parti tjetër më parë. Mungesa e eksperiencës në drejtim dhe magallomania e shfaqur disa herë la gjurmë në deklarata politike dhe në shfaqjet në publik duke krijuar idenë ë një lëvizje nganjëherë jashtë realitetit. Lidershipi doli jashtë realitetit edhe në aspektin e përllogaritjes numerike. Përkrahësit në një sallë sporti apo edhe në një mjedis të  hapur, ardhur nga të gjithë qytetet ku Aleanca ka përkrahës, mund të jenë shumë shumë katër deri në pesëmijë persona. Por ky numur në referim të sistemit zgjedhor në Shqipëri nuk të jep deputetë, aq më tepër nëse në zgjedhje nuk futesh në një koalicion. Duke luajtur me numrat dhe duke menduar se do të bënte një lloj shantazhi tek zoti Rama si lideri i opozitës, vuri kushte të cilat çdo njohës i mirë i realitetit nuk do t’i pranonte. Në këtë mënyrë zoti Spahiu rrezikohet të mos marrë asnjë deputet në votimet e 23 Qershorit, dhe rrezikon që të mbyllë përfundimisht lëvizjen pas këtyre votimeve sepse jo vetëm nuk do të ketë rezultate, por nuk do të ketë më as përkrahës për ta ndjekuar në një drejtim pa objekt.

Por gabimi i fundit i zotit Spahiu që gjithashtu do ta dëmtojë atë në vazhdim, është dalja e djeshme para një sfondi ku dukeshin Rama dhe Berisha, të perceptuar në të si dy personazhe të barabartë për t’u goditur opozitarisht. Kjo mënyrë e ideuar nga Spahiu u shoqërua edhe me fjalimin e tij ku sulmoi zotin Rama me ide dhe fjalë të paqarta, por përsëri me një megallomani jashtë realitetit se ai do të vendoste se si do të ishte drejtimi politik i vendit pas zgjedhjeve. Tema e barazimit të Rames me Berishën është një temë që i shkon për shtat Berishës, por që për opinionin e gjerë është një temë e shterur dhe dita dites në këtë fushatë Rama po ecën në një rrugë të cilën edhe ai vetë po e shkel për herë të parë, i pakrahasuar jo vetëm me Berishën që tashmë i lodhur e i konsumuar që nuk ju thotë me asgjë shqiptarëve, por as me drejtues të partive të vjetra e të reja. Zoti Rama ka një program të përgatitur nga ekspertët më të mirë të vendit, ai po prezantohet si një lider jo konfliktual që po bashkëbisedon me shqiptarët për qeverisjen e nesërme, dhe që nëpërmjet programit, organizimit, përfaqësimit, por dhe forcës politike e numerike, ka dhe mundesinë që të mbledhë rreth tij të gjithë ata që duan të rrëzojnë Berishën.

Qëndrimi i zotit Spahiu në manifestimin e djeshëm po largon prej tij të gjithë ata që duan largimin e Berishës, dhe po i çon ata drejt frontit opozitar të drejtuar nga zoti Rama. Ai nuk ka përllogaritur mire distancen, por nuk ka as forcën e duhur per te goditur objektivin. Le te ndjekim zhvillimet e ardhshme dhe të shohim nëse koha do na japë të drejtë.