Java që po nisim pritet të shoqërohet me debate të ashpra në Kuvend. Kjo pasi burimet parlamentare bëjnë të ditur se tashmë ka mbërritur për diskutim shitja e 4 HEC-eve, Ulëz, Shkopet, Bistrica I dhe Bistrica II. Deputetët socialistë e kanë kundërshtuar këtë privatizim të tyre, që pritet të merret nga Kurum Internacional me një vlerë prej 110 milionë eurosh, duke kërkuar anullimin e këtij vendimi. Tashmë kanë mbetur komisionet kuvendore si mundësia për të kundërshtuar këtë vendim, vec kallzimit penal të bërë në prokurori për këtë cështje. Për shitjen e katër objekteve u zhvilluan dy tenderë, njëri për Ulzën dhe Shkopetin, kurse tjetri për dy Bistricat. Interesimi ishte më i madh për HEC-et në Jug (Bistricat), pasi u paraqitën 7 oferta, kurse për dy të tjerat ishin 4 oferta, megjithatë kompanitë pjesëmarrëse ishin po ato. Partia Socialiste ka ritheksuar gjatë kësaj kohe se privatizimi i 4 HEC-eve është një gabim i madh dhe një veprim që shkon kundër interesave të shqiptarëve. Të 4 HEC-et kanë një fuqi të instaluar prej 78 Megavatt fuqi dhe prodhojnë mesatarisht rreth 400 milionë KWh në vit, që duke u shumëzuar me 2.2 lekë (që është çmimi i vendosur nga ERE sipas tabelës bashkëlidhur të tarifave të shitjes së energjisë nga këto HEC-e) bëjnë 880 milionë lekë. Pra për të plotësuar sot nevojat e konsumatorëve shqiptarë për rreth 400 milion KWh qeveria shqiptare shpenzon sot 880 milionë lekë ose rreth 6.4 milionë euro, kanë qenë argumentet e socialistëve. Ndërkohë qeveria shqiptare pret me padurim ti shesë këto katër HEC-e në mënyrë që të përmirësojë pak buxhetin e shtetit. Madje paratë që pritet të merren nga ky privatizim do të shkojnë për të likujduar borxhet që ju kanë biznesve, me qëllim për të përmirësuar pak atmosferën e krijuar sipërmarrje private qeveri në prag të fushatës zgjedhore. Të gjitha këto cojnë në definicionin se privatizimi do të kryhet sa më shpejt, pa marrë në konsideratë zërin e opozitës për anullimin e tyre.