5 Maji nuk është festë politike

Letër e nënshkruar

Kamber Nebiaj, Përmet

Këto ditë po flitet shumë në media e gazeta për 5 Majin, ditën e Dëshmorëve; në veçanti për homazhet, që u zhvilluan në qytetin e Përmetit. Kjo datë është ditë e shënuar dhe ka mbetur në histori para e pas viteve ‘90. Në këtë ditë, mbarë populli ynë drejtohet pranë varrezave të dëshmorëve, te lapidarët e tyre, për të përkujtuar ata që dhanë jetën në lulen e rinisë. Bashkë me popullin janë dhe krerët më të lartë të shtetit, si dhe përfaqësuesit e partive politike, të majtë e të djathtë. Pra, 5 Maji nuk është festë politike. Nuk ka asgjë të keqe që shkollat të bëjnë homazhe në këtë ditë të shënuar. Programet shkollore kanë orë të lira për edukimin patriotik e atdhetar. Nxënësit njihen me historinë e popullit tonë. Historia nuk shuhet, kalon nga njëri brez te tjetri. Sa për dorën grusht, nuk duhej përdorur nga nxënësit, kjo ishte ngjarje rastësore, që s’ka lidhje me shkollën e arsimin. Kamber Nebiaj, Përmet.